UNA valora positivamente la sentencia del Tribunal Supremo del desmonte del Alto Aboño

Alto Aboño -Semeya Asturias Verde-

UNIDÁ NACIONALISTA ASTURIANA VALORA POSITIVAMENTE LA SENTENCIA DEL TRIBUNAL SUPREMO, Y ESIXE A L'AUTORIDÁ PORTUARIA QUE RENUNCIE AL DESMONTE DEL ALTO ABOÑO.
A la vista de la sentencia del Tribunal Supremu, na que ordena la suspensión cautelar del Plan d'Utilización d'Espacios Portuarios d'El Musel y la paralización del desmonte del Alto Aboño, dende UNIDÁ NACIONALISTA ASTURIANA de Carreño, sopelexamos:
La sentencia del Tribunal Supremu da la razón a les asociaciones vecinales, grupos ecoloxistes y partíos políticos que nos opusimos dende un entamu al desmonte del Alto Aboño, y que llevamos movilizándonos dende fai 5 años.
Por primer vez, no referente a les obres d'Ampliación del Musel, el xuzgao tien en cuenta los argumentos medioambientales alegaos por Carreño, y priorizalos con respeuto a los económicos, invocaos pol Ayuntamientu Xixón, l'Autoridá Portuaria y el Gobiernu del Principáu.
La sentencia demuestra que'l procedimientu llegal y xurídicu emplegau pola Autoridá Portuaria pa ampliar hacia Carreño el puertu d'El Musel ta mal fechu dende un principiu, y non respeta la llegalidá vixente.
Teniendo en cuenta les declaraciones del Conseyeru d'Infraestructures Francisco González Buendía, nes que diz que “...la suspensión cautelar non tendrá nengún efeutu sobre les obres d'ampliación del puertu...”, dende UNIDÁ NACIONALISTA ASTURIANA esiximos al gobiernu del Principáu y a la Autoridá Portuaria que renuncien a ocupar y desmontar l'Alto Aboño, y a incluilo nel espaciu portuariu.
Tamién entendemos qu'hai qu'esixir responsabilidades a los que permitieron l'accesu de les máquines y el derribu de les viviendes del Alto Aboño, y habrá qu'entamar les indemnizaciones correspondientes.
Por otru lláu, y anque esta sentencia danos la razón y ye un pilancu importante pa impedir el desmonte del Alto Aboño, hai que seguir movilizandose y presionando socialmente pa impedir la espansión del Puertu del Musel hacia Carreño.
Dende UNA reiteramos el nuesu rechazu a l'ampliación del Puertu del Musel y a la ocupación de los terrenos del Alto Aboño, polos graves perxuicios económicos, ambientales y sociales que supón pa Carreño y p'Asturies.

UNIDÁ NACIONALISTA ASTURIANA VALORA LA SENTENCIA DE L’AUDIENCIA NACIONAL SOBRE’L DESMONTE DEL ALTO ABOÑO

Dende UNIDÁ NACIONALISTA ASTURIANA mostrámonos sorprendíos ante la sentencia de l’Audiencia Nacional que resuelve la petición del Ayuntamientu Carreño de paralizar les obres de desmonte del Altu Aboño, y muestra'l so rotundu rechazu a los argumentos daos polos maxistraos de l’Audiencia Nacional. Entendemos además, que con esti precedente, ye difícil esperar una sentencia favorable a Carreño nel otru Recursu pendiente de resolución.
Esta sentencia qu’UNIDÁ NACIONALISTA ASTURIANA conoz agora, ye la rempuesta a una de les dos partes de que se compón el Recursu presentáu por Carreño ante l’Audiencia Nacional:
PRIMERA PARTE: Por un llau l’Ayuntamientu Interpón Recursu Contenciosu-Alministrativu ante la Orden del Ministeriu de Fomentu, de 1 de Febreru de 2008, pola que s'aprueba la modificación del Plan d’Usu de los Espacios Portuarios de Xixón-Musel, y frente a la desestimación del recursu presentáu contra la Resolución de 20 d’Ochobre de 2007 de la Secretaría Xeneral pa la Prevención de la Contaminación y el Cambiu Climáticu, pola que se decide non someter a Estudiu d’Impautu Ambiental el Plan d’Usu de los Espacios Portuarios. Esto ye, l’Ayuntamientu considera que p’ampliar la zona portuaria al Alto Aboño, tien que facese previamente un Estudiu d’Impautu Ambiental.
SEGUNDA PARTE: Por otru llau, y visto que’l primer recursu puede tardar años en resolvese, l’Ayuntamientu solicita la suspensión de les Obres de Desmonte del Altu Aboño hasta que non se resuelva’l primer recursu. De non ser asina y d’entamar les obres, l’Altu Aboño puede tar desmontáu antes de que l’Audiencia Nacional resuelva la petición de Carreño de facer un Estudiu d’Impautu Ambiental. Sobre esta segunda parte del Recursu, ye sobre’l que l’Audiencia Nacional emite sentencia agora, rechazando los argumentos de Carreño y rechazando la petición de paralizar les obres.

Dende UNIDÁ NACIONALISTA ASTURIANA mostramos el nuesu total desacuerdu cola sentencia y sopelexamos:
• L’Audiencia Nacional, cuando diz que “la suspensión de la Obra podría ocasionar un seriu quebranto al interés xeneral, dao que se trata d’un Plan afectante a una actuación con gran proyeición de futuru”, usa argumentos políticos pa emitir el so veredictu, polo que la so supuesta imparcialidá queda nuevamente n’entredichu. Non sabemos por qué hai interés xeneral, cuando a día de güei nin el Gobiernu nin l’Autoridá Portuaria quieren dicir qué van colocar nel Altu Aboño que ye imprescindible pal furrulamientu del Puertu.
• Vemos como l’Audiencia Nacional apoya xurídicamente los intereses centralistes del Estáu, dexando desamparaos y desprotexíos a los vecinos y vecines y a los conceyos pequeños frente a los intereses de los más poderosos. Esto queda demostrao cuando diz que los intereses “defendíos pola Abogacía del Estáu y l’Ayuntamientu de Xixón son de mayor envergadura que los invocaos por Carreño”.
• Diz además que “la suspensión de la Orden supondría la conxestión del Puertu en curtiu plazu, lo qu’acarrea perxuicios económicos al Conceyu de Xixón”. Dende UNA entendemos qu’esto non pasaría si Xixón y l’Autoridá Portuaria reservaren los sos terrenos pa l'actividá Industrial Portuaria, cuando ta destinándolos a colocar actividaes non vinculaes al Puertu (Regasificadora, Central de Ciclu Combinao, Acuariu, Talasoterapia, Urbanizaciones, etc, y agora falen d’un Muséu Naval). Queremos además recordar que cola obra d’ampliación del Puertu del Musel, la esplanada que se va construir nel mar ye equivalente a 300 campos de fútbol. Si con esto non ye bastante, pueden renunciar a la construcción d'instalaciones tan innecesaries, peligroses y contaminantes como la Regasificadora o la Central de Ciclu Combinao.
• L’Audiencia Nacional non asume como argumentu válidu los daños ambientales argumentaos por Carreño, y coloca en primer llugar los argumentos de tipu económicu invocaos por Xixón. Diz además, que los materiales procedentes del desmonte podríen depositase agora na Obra d’Ampliación del Musel, y asina “evitar un importante problema futuru pa desaloxar el material frutu del desmonte y urbanización”. Con esto demuéstrase que'l principal oxetu de desmontar l’Altu Aboño ye la necesidá de material de rellenu pa construir la inmensa esplanada contemplada nel Proyeutu d’Ampliación del Musel.
• Con esta sentencia además, cuando diz que “frente a los intereses de Carreño álcense los intereses del Ayuntamientu de Xixón”, l’Audiencia Nacional fai competente al Ayuntamientu de Xixón pa ordenar y planificar el territoriu del Conceyu de Carreño. Esto ye, Xixón ya non solo se puede facer cola mayor parte de los terrenos ganaos al mar nel rellenu d’Aboño, qu'históricamente siempre fueron de Carreño, sinón qu’agora una sentencia tamién diz que Xixón ye competente pa ordenar y planificar l’Alto Aboño, que ta indiscutiblemente dientro de Carreño.
Dende UNIDÁ NACIONALISTA ASTURIANA queremos reiteranos na oposición a la obra d’Ampliación del Puertu del Musel por razones sociales, ambientales y económiques, como llevamos faciendo dende l’añu 2002, y reiteramos la oposición al Desmonte del Altu Aboño. Creemos además que mientres tolos grupos políticos de Carreño temos claramente a la escontra del Desmonte, l’Ayuntamientu tien mecanismos pa siguir impidiéndolo, y asina vamos esixílo al equipu gobiernu y al resto de grupos políticos.

Santi Artime
UNIDÁ NACIONALISTA ASTURIANA
TEXTO DE LA SENTENCIA

UNIDÁ NACIONALISTA ASTURIANA apoya’l recursu n’Audiencia Nacional y la suspensión de les obre de Desmonte Altu Aboño

Dende UNIDÁ NACIONALISTA ASTURIANA, apoyamos el Recursu ante l’Audiencia Nacional y apoyamos tamién la suspensión de les obres mientres esti recursu non se resuelva xudicialmente, y queremos reiteranos na oposición a la obra d’Ampliación del Puertu del Musel por razones sociales, ambientales y económiques, como llevamos faciendo dende l’añu 2002, y reiteramos la oposición al desmonte del Altu Aboño.
Queremos tamién, como ya ficimos nos medios de comunicación, pidir equí, públicamente dende UNIDÁ NACIONALISTA, la destitución de Menéndez Rexach como presidente de l’Autoridá Portuaria de Xixón pol proyeutu d’Ampliación del puertu del Musel tal como ta contemplao, pola so nefasta xestión, pol intentu de desmonte del Altu Aboño en contra de los plantegamientos de Carreño, pol intentu d’engañu a los vecinos y vecines, y pol pocu respetu que tien ante esti recursu llegal plantegao dende Carreño. Entendemos que l'Autoridá Portuaria demuestra mui pocu espíritu democráticu y mui pocu respeutu pola xusticia, polos representantes públicos de Carreño y polos propios vecinos y vecines.
Por nuestra parte, vamos llegar hasta’l final, y creemos que sí se puede parar el desmonte y la destrucción del Altu Aboño si dende Carreño tolos grupos políticos nos mantenemos na oposición frontal al proyeutu, y confiamos en que'l Recursu se resuelva favorablemente a los intereses de Carreño, porque según los xuristes de la Casa Conceyu y la Mancomunidá Cabu Peñes, hai razones pa ello.
UNIDÁ NACIONALISTA ASTURIANA

UNIDÁ NACIONALISTA ASTURIANA OPÓNSE A l'AMPLIACIÓN DE LA ESPLANACIÓN DE TUDELA VEGUÍN

Dende UNIDÁ NACIONALISTA ASTURIANA oponémonos al proyeutu p’ampliar la superficie d’esplanación solicitada por Tudela Veguín, S.A., que ya fue entamada nel añu 2006 nos terrenos averaos a la propia fábrica. Esta llicencia d’esplanación concedía fai 2 años provocó un gran rechazu ente los vecinos d’Albandi y Carrió, y supón que la zona industrial d’Aboño siga creciendo y medrando hacia l’Oeste. A día de güei, l'AVV de Xibares tien presentao un contencioso por esti tema, que sigue sin resolvese.
El proyeutu en sí ye una ampliación del proyeutu de Payares de 2005, pa facer una esplanación con voladures nos terrenos de Tudela Veguín, averaos a los que ya tienen concedía la llicencia. Compriende una superficie de 45.000 m2, con un volumen de desmonte de 320.180 m3, de los qu'una parte importante pueden usase na esplanada d’El Musel.
Dende UNIDÁ NACIONALISTA ASTURIANA camentamos que l’ampliación de la llicencia d’esplanación que se solicita al ayuntamientu, ye un desmonte encubierto del Altu d’Aboño, cuyu principal interés y fin, tamién ye consiguir material de rellenu pa la obra d’ampliación del puertu del Musel. Esto vien a ratifícalo'l que Tudela Veguín, nel documentu que presenta, en nengún momentu xustifica’l proyeutu, nin por una necesidá de la fábrica d'ampliar les instalaciones, nin la negativa a conceder la llicencia supón que se vaya impidir nenguna inversión o comprometer puestos de trabayu. Solamente se xustifica pol “interés social”, que ye mui discutible. Toos sabemos que finalmente, dempués de sacar el material pa rellenar el Musel, esti espacio será ocupao p'almacenar nueves montañes de mineral.
Finalmente, dende UNIDÁ NACIONALISTA ASTURIANA, proponemos que se faiga l'alternativa 0 que plantega nel Estudiu d’Impautu Ambiental, que ye “non facer l'ampliación de la esplanación”, y negarémonos na Comisión de Mediu Ambiente y d’Urbanismu a conceder la llicencia pal proyeutu.