UNIDÁ NACIONALISTA ASTURIANA APOYARÁ LES ORDENANCES FISCALES

UNIDÁ NACIONALISTA ASTURIANA, tras ser aceptaes les sos propuestes, aprobará les Ordenances Fiscales pal 2009.
Dende UNIDÁ NACIONALISTA ASTURIANA, entendemos que les Ordenances Fiscales non tienen que ser un meru documentu de recaudación d’impuestos, sinón que tienen que buscar oxetivos y sirvir como instrumentu pa meyorar el Conceyu. Ta claro qu’a naide-y presta pagar impuestos, pero son necesarios pa crear una sociedá más igualitaria y xusta, y pa repartir la riqueza de los que más tienen.
Durante estos años, UNIDÁ NACIONALISTA ASTURIANA propuso y consiguió que s’aprobaren delles medides:
Bonificaciones fiscales p'aquelles viviendes qu'instalen o tengan instalaos sistemes pal aprovechamientu lléutricu de la enerxía solar p'autoconsumo (bonificaciones nel IBI y nel ICIO).
Bonificaciones fiscales p'aquelles obres o instalaciones que favorezan les condiciones d’habitabilidá de los discapacitaos (bonificaciones nel ICIO).
Bonificaciones del 90% del IBI pa les viviendes con enerxía solar.
Bonificaciones fiscales nel IBI pa les cooperatives agraries qu’existan o s’instalen en Carreño.
Propusimos crear nuevos tramos según consumo na tasa d’abastecimientu d’agua, diferenciando entre consumo pa uso ganadero, industrial o domésticu.
Bonificaciones fiscales nel ICIO p'aquelles obres de rehabilitación d’edificios con interés social, cultural, históricu o artísticu que lo xustifiquen.
Bonificaciones na viñeta pa los coches que tengan menor incidencia na contaminación, como los lléutricos o híbridos.
Bonificación nel ICIO pa obres de construcción de foses séptiques.
Bonificación nel ICIO pa obres d’aforru enerxéticu o d’instalación d’enerxíes renovables. etc
Pal añu 2009, UNIDÁ NACIONALISTA ASTURIANA fizo delles propuestes que busquen siguir meyorando les Ordenances Fiscales de Carreño, y tras la negociación col restu de grupos políticos, finalmente aceutáronse les siguientes:
 Propónse una bonificación nel IBI pa families numberoses, d’un un 30% pa viviendes con valor catastral menor a 25.000 €, y del 20% pa viendes con valor catastral ente 25.000 y 40.000 €.
 Propónse rebaxar nun 25% l'incrementu del IPC aplicable a la Tasa Fiscal 301 (conocía como Viñeta). Esto ye, mientres l’IPC aplicable al restu d’impuestos y tases ye del 4.5, pal casu la viñeta l’incrementu ye un 25% menor, del 3.375. Este ye un impuestu direutu aplicable a los ciudadanos, y del qu'únicamente los vecinos y vecines se va beneficiar.
 Respeutu a la Tasa Verde, dende los servicios económicos de la Casa Conceyu, entienden qu'agora non hai fixaos los mecanismos pa poder aplicala. Puestos además en contautu col Ayuntamientu gallegu de Cerceda, únicu qu’hasta agora la tien en vigor, esplícasenos que nunca la pudieron cobrar, y que s’encuentren el pleitos llegales coles empreses por esta tasa. Dende UNIDÁ NACIONALISTA ASTURIANA trabayaremos na Casa Conceyu pa poder aplicala l’añu qu’entra, y esixiremos al equipu gobiernu que cree los mecanismos necesarios pa poder aplicala: cálculu de güeya ecolóxica (Huella Ecológica) del conceyu, asesoramientu llegal, cálculos de costes del control de les emisiones, cálculu de daños a cultivos, etc. Mientres tanto, propusimos y fue aprobao, aplicar un incrementu del 40% pal IBI Especial, que se cobra al Puertu de Xixón y a la Térmica d’Aboño. Esto supón que la recaudación aplicable a esti impuestu pa estes empreses aumenta en 115.000 €, que puede dir destinao a los mesmos oxetivos pa los que diba destinao la Tasa Verde, como ye meyorar el mediu Ambiente y la calidá de vida de los vecinos.
Poro, tras ser aceutaes les nuestres propuestes, UNIDÁ NACIONALISTA ASTURIANA va apoyar la propuesta d'Ordenances Fiscales pal añu 2009 presentada pol equipu gobiernu, y qu’amiesta estes propuestes.
Santi Artime. UNIDÁ NACIONALISTA ASTURIANA

UNIDÁ NACIONALISTA ASTURIANA apoya’l recursu n’Audiencia Nacional y la suspensión de les obre de Desmonte Altu Aboño

Dende UNIDÁ NACIONALISTA ASTURIANA, apoyamos el Recursu ante l’Audiencia Nacional y apoyamos tamién la suspensión de les obres mientres esti recursu non se resuelva xudicialmente, y queremos reiteranos na oposición a la obra d’Ampliación del Puertu del Musel por razones sociales, ambientales y económiques, como llevamos faciendo dende l’añu 2002, y reiteramos la oposición al desmonte del Altu Aboño.
Queremos tamién, como ya ficimos nos medios de comunicación, pidir equí, públicamente dende UNIDÁ NACIONALISTA, la destitución de Menéndez Rexach como presidente de l’Autoridá Portuaria de Xixón pol proyeutu d’Ampliación del puertu del Musel tal como ta contemplao, pola so nefasta xestión, pol intentu de desmonte del Altu Aboño en contra de los plantegamientos de Carreño, pol intentu d’engañu a los vecinos y vecines, y pol pocu respetu que tien ante esti recursu llegal plantegao dende Carreño. Entendemos que l'Autoridá Portuaria demuestra mui pocu espíritu democráticu y mui pocu respeutu pola xusticia, polos representantes públicos de Carreño y polos propios vecinos y vecines.
Por nuestra parte, vamos llegar hasta’l final, y creemos que sí se puede parar el desmonte y la destrucción del Altu Aboño si dende Carreño tolos grupos políticos nos mantenemos na oposición frontal al proyeutu, y confiamos en que'l Recursu se resuelva favorablemente a los intereses de Carreño, porque según los xuristes de la Casa Conceyu y la Mancomunidá Cabu Peñes, hai razones pa ello.
UNIDÁ NACIONALISTA ASTURIANA

UNIDÁ NACIONALISTA ASTURIANA OPÓNSE A l'AMPLIACIÓN DE LA ESPLANACIÓN DE TUDELA VEGUÍN

Dende UNIDÁ NACIONALISTA ASTURIANA oponémonos al proyeutu p’ampliar la superficie d’esplanación solicitada por Tudela Veguín, S.A., que ya fue entamada nel añu 2006 nos terrenos averaos a la propia fábrica. Esta llicencia d’esplanación concedía fai 2 años provocó un gran rechazu ente los vecinos d’Albandi y Carrió, y supón que la zona industrial d’Aboño siga creciendo y medrando hacia l’Oeste. A día de güei, l'AVV de Xibares tien presentao un contencioso por esti tema, que sigue sin resolvese.
El proyeutu en sí ye una ampliación del proyeutu de Payares de 2005, pa facer una esplanación con voladures nos terrenos de Tudela Veguín, averaos a los que ya tienen concedía la llicencia. Compriende una superficie de 45.000 m2, con un volumen de desmonte de 320.180 m3, de los qu'una parte importante pueden usase na esplanada d’El Musel.
Dende UNIDÁ NACIONALISTA ASTURIANA camentamos que l’ampliación de la llicencia d’esplanación que se solicita al ayuntamientu, ye un desmonte encubierto del Altu d’Aboño, cuyu principal interés y fin, tamién ye consiguir material de rellenu pa la obra d’ampliación del puertu del Musel. Esto vien a ratifícalo'l que Tudela Veguín, nel documentu que presenta, en nengún momentu xustifica’l proyeutu, nin por una necesidá de la fábrica d'ampliar les instalaciones, nin la negativa a conceder la llicencia supón que se vaya impidir nenguna inversión o comprometer puestos de trabayu. Solamente se xustifica pol “interés social”, que ye mui discutible. Toos sabemos que finalmente, dempués de sacar el material pa rellenar el Musel, esti espacio será ocupao p'almacenar nueves montañes de mineral.
Finalmente, dende UNIDÁ NACIONALISTA ASTURIANA, proponemos que se faiga l'alternativa 0 que plantega nel Estudiu d’Impautu Ambiental, que ye “non facer l'ampliación de la esplanación”, y negarémonos na Comisión de Mediu Ambiente y d’Urbanismu a conceder la llicencia pal proyeutu.

SEGUNDU CERTAME DE CURTIOS EN LLINGUA ASTURIANA DE LA MANCOMUNIDÁ D’EL CABU PEÑES

Ye oxetu del concursu’l facer un curtiu en Llingua Asturiana (de temática llibre) con un llargor d’unos quince minutos recoyendo amás una referencia de la propia Mancomunidá y del Serviciu de Normalización Llingüística asina como de la Conseyería de Cultura y Turismu como muérganos o entidaes qu’entamen y/o sofiten esti certame.
La entrega de la documentación pue facese en mano (nes oficines de la Mancomunidá con señes: C/Braulio Busto, 2 – 2u, 33430 Candás – Carreño; tfnu. 985872421, n’horariu d’atención al públicu de 9:00 a 14:00 hores), por persona interpuesta, o per corréu certificáu y con acuse recibu (paquete postal exprés), en tal casu tien de remitise per fax al nu 985 87 25 22, dientro del plazu presentación, el resguardu del mentáu unviu.
Ha presentase nuna carpeta o sobre col títulu: “Segundu Certame de Curtios en Llingua Asturiana de la Mancomunidá Cabu Peñes” asina como’l nomatu del autor. Dientro del sobre ha axuntase un sobre zarráu colos datos del autor (nome, apellíos, señes, teléfonu y nomatu) y títulu del trabayu. La fecha tope pa entregar esti material sedrá’l 1 d’avientu de 2008 (llunes) a les 14:00 hores.
Pa más información pue consultar llamando al Serviciu de Normalización Llingüística de la Mancomunidá n’horariu de 10:00 a 14:00 hores y nos tfnos. 985872406 (martes y xueves) y 985883532 (llunes, miércoles y vienres) o per corréu electrónicu a la dirección: mmcp.llingua@asturnet.es
Les BASES del CONCURSU puen consultase na páxina web de la Mancomunidá Cabu Peñes: www.faronorte.org asina como n’otres páxines y medios afayadizos.

Convocatoria por una República Asturiana n’Uviéu

La federación de partíos Unidá Nacionalista Asturiana (UNA) vien de facer un llamáu a la participación de la so militancia na manifestación convocada pol coleutivu Ensame República Asturiana, en defensa de los valores repúblicanos, socialistes y soberanistes p’Asturies, el próximu xueves a les 20:00 hores n’Uviéu.
D’esta miente, la so estaya de mocedá, UNA-Mocedá, va participar activamente na convocatoria y amás d’ello valora mui positivamente’l so calter unitariu. Poro, pide a toles asturianes y asturianos, especialmente a la xente mozo, que amuese’l so sofitu asistiendo a la manifestación prevista’l día enantes de los “Premios Príncipe de Asturias”.

La Tasa Verde pa Carreño y les propuestes d'Unidá Nacionalista Asturiana pa les Ordenances Fiscales

L'Ayuntamientu Carreño ta nestes selmanes nel procesu d'ellaboración y revisión de los Impuestos y les Ordenances Fiscales pal añu 2009. En les propuestes d'Unidá Nacionalista Asturiana destaca la Tasa Verde, esto ye, una tasa con vocación ambiental sobre les emisiones de CO2 y SO2

Dende UNIDÁ NACIONALISTA ASTURIANA, entendemos que les Ordenances Fiscales non tienen que ser un meru documentu de recaudación d'impuestos, sinón que tienen que buscar oxetivos y sirvir como instrumentu pa meyorar el Conceyu. Y UNA felicitase de que tolos años se desarrolle un debate d'esti tipu, qu'hasta la llegada de la izquierda nacionaliega a la Casa Conceyu non se daba, y les propuestes llimitábense a subides lliniales, pero nunca proponiendo intencionalidaes y oxetivos. Ta claro qu'a naide-y presta pagar impuestos, pero son necesarios pa crear una sociedá más igualitaria y xusta, y pa repartir la riqueza de los que más tienen. Nesti sen, como dende fai 6 años, presentamos a la Comisión d'Hacienda nueves propuestes cola intención de dar más carga social y mediambiental a la política fiscal de Carreño.
Durante estos años, UNIDÁ NACIONALISTA ASTURIANA propuso y consiguió que s'aprobaren delles medides como bonificaciones nel IBI y nel ICIO rellacionaes cola instalación d'enerxía renovable o obres d'aprovechamientu enerxéticu; nuevos tramos según el consumo na Tasa d'Abastecimientu d'Agua, diferenciando entre consumo pa uso ganadero, industrial o domésticu; bonificaciones pa obres de rehabilitación d'edificios catalogaos; bonificaciones p'aquelles obres o instalaciones que favorezan les condiciones d'habitabilidá de los discapacitaos; bonificaciones na "viñeta" pa los vehículos que contaminen menos; bonificaciones pola instalación de foses séptiques y depuradores, bonificaciones pa les empreses por facer contratos de llarga duración, etc.

Pal añu 2009, UNIDÁ NACIONALISTA ASTURIANA fai tres propuestes, buscando oxetivos mediambientales y sociales:

- En xeneral, proponemos una subida que nel casu de les Tases ye del últimu IPC Interañal conocío (4.5%), y pa los Impuestos una subida del 75% del últimu IPC Interañal conocío (3,4%). - Proponemos, nel casu de families numberoses, una bonificación nel IBI del 25% pa la vivienda habitual y con un valor catastral menor de 60.000 €, fixando tamién un máximu d'ingresos y de patrimoniu pa los beneficiarios.

- Proponemos grabar nel Impuestu del IBI a les viviendes vacies o desocupades, pa facilitar que se saquen al mercáu, bien en venta o alquiler, y consiguir facilitar l'accesu a la vivienda. Entendemos que ye con propuestes d'esti tipu como se puede entamar a solucionar el problema de vivienda que sufrimos n'Asturies y Carreño. Entendemos que non ye lóxico qu'en Candás existan más de 700 viviendes "vacies o desocupades" según fuentes del propio Principáu, y la única solución que se plantega ye construyir más. Exemplos como'l de Lluanco, onde dempués de facer 6.000 viviendes el preciu non baxó, la xente mozo sigue sin poder independizase, y la mayoría son usades como 2ª residencia 2 meses al añu, demuéstramos que siguir construyendo non ye'l camín pa solucionar el problema de vivienda d'esti País.

- Proponemos, como idega más novedosa, la creación d'una TASA VERDE. Esto ye, una tasa con vocación ambiental, qu'a día de güei solamente t'aprobada nun ayuntamientu d'A Coruña, anque más ayuntamientos ya tan plantegándose creala. Esta tasa sería un instrumentu fiscal aplicable a les grandes empreses, qu'incide sobre'l coste que supón pa la Casa Conceyu la llabor alministrativa d'inspección, control y autorización pa continuar l'actividá xeneradora d'emisiones de CO2 y SO2, y pa ello, fixaríase una cuota por tonelada emitida al añu de CO2 y SO2. Creemos qu'hai que facer real la máxima de "el que contamina, paga", y paga polo menos el coste real de sufrir esa contaminación. D'esta manera la Casa Conceyu podría emplegar más fondos pa meyorar el mediu ambiente y la calidá de vida, imputables y recaudables a les empreses a través d'esa tasa. Por exemplu, recaudaría dineru pol coste que-y supón la creación de la Oficina Ambiental, pol coste de la compra d'aparatos mididores de la contaminación, pola puesta a disposición de los vecinos de los medios materiales y llegales pa meyorar la calidá de vida, pola creación de barreres vexetales y reforestación, o pol coste que supondrá, si se lleva a cabo, crear un nuevu emplazamientu pa los vecinos más afeutaos pola actividá industrial.

Dende UNIDÁ NACIONALISTA ASTURIANA, entendemos qu'en Carreño esisten problemes por resolver lo suficientemente graves como pa proponer esos oxetivos, estos cambios y esta nueva Tasa Verde: problemes de vivienda, especulación urbanística, pérdida de patrimoniu, necesidaes sociales, necesidaes educatives, o problemes mediambientales, y con unes ordenances fiscales non se van iguar de sópitu, pero tienen que, polo menos, espresar una intencionalidá pa resolver estos problemes. Creemos que solamente fai falta la voluntá política pa llevales a cabu.

UNIDÁ NACIONALISTA ASTURIANA respeutu a la sovención de COGERSA

Con respeutu a la polémica creada ente les AAVV d'Ambás y Tamón pola sovención que tolos años concede COGERSA, dende UNIDÁ NACIONALISTA ASTURIANA sopelexamos:
Dende fai 10 años, COGERSA concede sovenciones (nesti añu de 54.000 €) a cada una de les parroquies llimítrofes col vertederu, hasta un total de 4, correspondientes a los conceyos de Xixón, Llanera, Corvera y Carreño. Hasta l'añu 2006, la sovención que daba COGERSA yera únicamente pa la parroquia d'Ambás, y con esta sovención los vecinos proponíen les obres y les inversiones que se teníen que facer. A partir del añu 2007, COGERSA incluye na sovención tamién a la parroquia de Tamón, sin aumentar l'importe y sin especificar cómo se tien que repartir nin qué porcentaxe ye pa caúna de les AAVV. A partir d'esi momentu, Ambás niégase a renunciar a una parte, y Tamón esixe'l 50% de la sovención.
Dende que se crea'l problema nel añu 2007, UNIDÁ NACIONALISTA ASTURIANA xunto col resto de partíos políticos del Ayuntamientu Carreño, vien esixendo a COGERSA qu'amplíe al doble la sovención que concede en Carreño, pa qu'Ambás non pierda dineru, y pa que Tamón reciba una sovención igual a la del restu de parroquies. A día de güei siguimos esixendo que COGERSA amplíe la sovención pa que tanto Ambás como Tamón reciban lo mesmo que reciben el restu de parroquies afectaes d'otros conceyos.
Dende UNIDÁ NACIONALISTA ASTURIANA comprendemos totalmente la postura de les dos AAVV, tanto la d'Ambás, que non quier perder dineru, como la de Tamón, que reclama lo qu'entiende que ye suyo. Nesti casu, la función del ayuntamientu ye únicamente facilitar a l'AVV la fiscalización de les factures, axilizar la contratación y facer un siguimientu de les obres. Entendemos qu'esti ye un problema que crea y que tien que resolver COGERSA, aumentando la sovención o indicando cuánto dineru ye pa cada parroquia. La mayor dificultá pa repartir el dineru y tomar una decisión ta nes propies condiciones que pon COGERSA, qu'esixe que los vecinos de les dos parroquies dean el visto bueno a les obres que s'executen con cargu a la sovención. Si cualquiera de les dos asociaciones se niega a aceptar el repartu o les actuaciones, la sovención quedaría paralizada. Poro, l'Ayuntamientu tien les manes atades mientres que non haya un alcuerdu de les dos Asociaciones Vecinales, o COGERSA amplíe la sovención. Si l'Ayuntamientu decide repartila al 50%, y Ambás se niega, paralizaríase la sovención. Por otru llau, si l'Ayuntamientu decide que seya íntegramente p'Ambás, y Tamón non lo aceuta, la sovención tamién quedaría paralizada.
La postura D'UNIDÁ NACIONALISTA ASTURIANA ye la mesma que fai un añu: siguir esixendo que se duplique la sovención, y mientres tanto que la Casa Conceyu siga almacenándola hasta que COGERSA especifique cómo hai que repartila, o hasta que les AAVV d'Ambás y de Tamón, se pongan d'alcuerdu. Otra posibilidá, anque esto podría suponer la cancelación de la sovención, ye devolvela y que COGERSA la xestione direutamente colos vecinos.
Pa finar, tamién queremos denunciar esta estratexa de COGERSA d'enfrentar a los vecinos. Si los vecinos tan engarraos pola llimosna que supón la sovención, estos non van organizase pa esixir garantíes ambientales y controles nel vertederu, nin van esixir medides de seguridá pol tráficu de camiones nos accesos, nin van siquiera parase a plantegar un debate sobre la idoniedá de la Incineradora que se pretende costruir, y que va empeorar más tovía les condiciones de vida de los vecinos averaos al vertederu y de tol área central asturianu, y a la qu'UNIDÁ NACIONALISTA ASTURIANA s'opón xunto con otros munchos colectivos ecoloxistes y vecinales.

UNIDÁ NACIONALISTA ASTURIANA de CARREÑO

Propuesta d'apagón el 17 de setiembre pa concienciar sobre'l cambiu climáticu

Santiago Artime, Conceyal d'UNIDÁ NACIONALISTA ASTURIANA nel Aytu Carreño, solicitó na Comisión de Mediu Ambiente, que l'Ayuntamientu Carreño se sume a la convocatoria de facer un apagón simbólicu pa concienciar sobre'l cambiu climáticu y el derroche enerxéticu.
La convocatoria tá fecha a nivel mundial por numberosos colectivos sociales, ecoloxistes, y ONG's, pal día 17 de Setiembre, y será de 10 minutos, ente les 21:50 y les 22:00 hores, y quier ser una llamada d'atención sobre'l consumu descomanáu y la illuminación non necesaria.
La propuesta foi aceutada por tolos grupos políticos, y l'equipu gobiernu comprometióse a organizar col serviciu d'obres el corte de suministro elléutricu nel alumbrao y nos edificios públicos (biblioteca, edificiu polivalente, ayuntamientu, etc), siempre respetando les medides de seguridá necesaries.
Dende UNIDÁ NACIONALISTA ASTURIANA non queremos pasar sin criticar la doble MORAL y LA contradictoria postura del PSOE y PP que secunden convocatories d'esti tipu, y sin embargu apuesten por modelos económicos y enerxéticos que nos llenen de Centrales Eléctriques y Regasificadores, produciendo enerxía ensin xacíu, contaminante, insostenible ya irracional. Modelos enerxéticos qu'estrocen el paisaxe y acaben cola estructura económica tradicional y los seutores productivos tradicionales, y que non dexen n'Asturies nin riqueza, nin puestos de trabayu, nin beneficios económicos, y sin embargu allóñennos ca vegada más de los alcuerdos algamaos en Kyoto.
Poro, tenemos bien nidio que de nada sirve un apagón simbólicu si esti non va acompañao d'un cambiu de conciencia por parte la clase política. Hai que recordar que n'Asturies tan n'estudiu unos 8 proyeutos de ciclu combináu de 400 megavatios, asina como más de 20 parques eólicos.
Dende UNIDÁ NACIONALISTA ASTURIANA queremos facer un llamamientu y animar a tolos vecinos y vecines de Carreño pa que secunden esta iniciativa, apagando los aparatos elléutricos y la illuminación durante 10 minutos, ente les 21:50 y les 22:00 hores, el próximu día 17 de Setiembre.
UNIDÁ NACIONALISTA ASTURIANA de Carreño

UNIDÁ NACIONALISTA ASTURIANA celebra’l 8 de Setiembre presentando’l so proyectu políticu en Carreño

Dende la federación de partíos, plantégase’l “Día de la Nación Asturiana” como un bon momentu pa denunciar la reforma estatutaria del PSOE y PP y afitar l’alternativa que representa la izquierda nacionalista.
La Xunta Executiva de la federación d’izquierda nacionalista, dio anuncia esta mañana que la formación va facer esti añu’l Día de la Nación Asturiana nel conceyu de Carreño, en concreto en Candás, au cunta con representación municipal a traviés del conceyal Santiago Artime.UNIDÁ NACIONALISTA ASTURIANA (UNA) naz tres refundase UNIDÁ, coalición electoral formada pola xuntura ente Izquierda Asturiana (IAS) y Andecha Astur (AA), nuna federación de partíos y recuperar la siegla histórica de la izquierda nacionalista UNA, cola qu’algamó, nos años 90, representación na Xunta Xeneral del Principáu.
Dende la Xunta Executiva d’UNA plantégase que’l 8 de Setiembre ye un bon momentu pa entamar a afitar y articular l’alternativa que la izquierda nacionalista propón p’Asturies y que se va dir presentando per tola xeografía asturiana nos próximos meses.
Los actos concretos del 8 de Septiembre van centrase na denuncia de la reforma del estatutu d’Autonomía que PSOE y PP pactaren p’Asturies y que dende UNIDÁ NACIONALISTA ASTURIANA (UNA) considérense humillantes, irresponsables, discriminatorios y ayenos dafechu a les necesidaes del país.
Nos próximos díes dende la Xunta Executiva va dase a la conocencia pública les actividaes concretes, polítiques y lúdiques, que van tener llugar el llunes 8 a les 12h nel Centru Polivalente de Candás.
Más información Unidá Nacionalista Asturiana

Manifestación contra el desmonte del Alto de Aboño y en defensa de las playas de Peña María y Xivares

Vídeos
Manifestación

Manifiestu

UNIDÁ NACIONALISTA ASTURIANA-Andecha Carreño apoya la manifestación convocada pal 27 de Xunetu pola AVV de Xibares "El Tranqueru"

UNIDÁ NACIONALISTA ASTURIANA-Andecha Carreño comunicó a los representantes de l'Asociación de Vecinos de Xibares "El Tranqueru", que sofita y participará na manifestación que convoquen el Domingo 27 de Xunetu, en Defensa del Mediu Ambiente y a la escontra del Desmonte del Altu Aboño y la desapaición de les playes de Xibares y Peña María, y el so entornu.
Una de les razones que motiven la convocatoria d'esta manifestación ye la carta unviada al Ayuntamientu Carreño por Fernando M. Rexach, presidente de l'Autoridá Portuaria de Xixón, y ratificada pol Conseyu d'Alministración d'esta Autoridá Portuaria, na que pide a la Corporación de Carreño "que desista del recurso interpuesto contra la misma y facilite, en el ámbito de sus competencias, las actuaciones tendentes a la puesta en explotación de los terrenos del Alto de Aboño".
Ye ablucante ver cómo na carta se xustifica'l desmonte del Altu Aboño "por la necesidad que tienen todos los puertos con previsiones de aumentar sus movimientos y ocupación, de disponer de superficie terrestre para actividades portuarias complementarias, así como por la escasez que de las mismas tiene nuestro puerto para las indicadas actividades", cuando sin embargu, na esplanada rellenada na desembocadura de la Ría d'Aboño va instalase una central de ciclu combináu, que non ye una actividá portuaria, nin ye complementaria nin necesaria pal puertu. Tovía, a día de güei, nunca naide dixo qué ye lo que quieren instalar nel Altu Aboño que ye imprescindible pal funcionamientu del Puertu d'El Musel. Poro, siguimos creyendo que detrás del desmonte del Altu Aboño escondese únicamente la necesidá urxente de material de rellenu pa la esplanada del nuevu Puertu d'El Musel, como UNIDÁ NACIONALISTA ASTURIANA-Andecha Carreño siempre dixo.
Ye tamién ablucante cómo n'otra parte de la carta, cuando fala del desmonte, diz que "Con esta solución, se hace posible la explotación de los terrenos del Concejo de Carreño" y "se resuelve el problema derivado de conseguir una adecuada ubicación para los materiales procedentes del desmonte y explanación del Alto de Aboño, lo que repercute de forma muy positiva en la protección del medioambiente". O cómo l'Autoridá Portuaria sigue asegurando que les playes de Xibares y Peña María non van vese afectades, anque vayan realizase "obras de taluzado y consiguiente urbanización" y vayan tar rodeades por instalaciones industriales. Entendemos que facer estes afirmaciones pa xustificar el desmonte del Altu Aboño ye una falta de respetu a los vecinos y vecines de Carreño, y al más elemental sentíu común.
Dende UNIDÁ NACIONALISTA ASTURIANA-Andecha Carreño creemos que'l nuesu conceyu ya fai tiempu que superó la capacidá pa siguir asumiendo industria pesada y contaminante, ratificámonos na decisión de presentar un recursu ante l'Audiencia Nacional por non someter el proyeutu de desmonte a Estudiu d'Impautu Ambiental, y comprometémonos a siguir denunciando y oponiéndonos a los proyeutos que dañen el Mediu Ambiente.
Entendemos que la movilización ciudadana ye imprescindible pa parar la destrucción d'esta parte de la costa de Carreño y d'Asturies, y solo nosotros, los vecinos y vecines, podemos impidilo. Poro, queremos animar a tol mundiu a participar el Domingu na manifestación pacífica convocada pola AVV El Tranqueru, que recorrerá gran parte de la costa de Carreño, dende Xibares hasta Candás.

UNIDÁ NACIONALISTA ASTURIANA-Andecha Carreño

Rechazu d'Unidá – Andecha Carreño a la paralización de la sovención al Club Victoria de Perlora

Dende UNIDÁ-Andecha Carreño, y como ya manifestamos na cabera Comisión de Deportes celebrada'l 4-07-08, rechazamos la decisión adoptada pola mayoría de grupos políticos del Ayuntamientu Carreño de paralizar la sovención del añu 2008 correspondiente al Club Victoria de Perlora, asina como rechazamos tamién adoptar midíes de fuerza contra esti club deportivu pola ruptura del alcuerdu de filialidá col Candás C.F.
La decisión de romper esti conveniu, anque non la compartamos, ye una decisión tomada llexítimamente por un club priváu como ye'l Club Victoria de Perlora, que pertenez a los socios y non al Ayuntamientu, y que non vamos entrar a cuestionar nin va suponer pa UNIDÁ-Andecha Carreño un argumentu en contra a la hora de conceder les sovenciones añales.
Sí creemos necesario, como asina solicitamos, que'l conceyal de Deportes medie pa reconducir esta decisión y meyorar la rellación ente los dos clubs, pa que sigan lligaos pol conveniu de filialidá y que l'históricu Club Victoria de Perlora siga siendo quien forme, fomente y desarrolle'l fútbol base en Carreño, pero de nenguna manera apoyamos l'adopción d'esti tipu de midíes de fuerza.
Entendemos que ye obligación de los ayuntamientos apoyar y facilitar el desarrollu de les actividaes que desarrollen les asociaciones, y preocúpanos esta actitú y esti precedente adoptáu pola mayoría de los grupos políticos, que puede suponer entrar a valorar abiertamente la concesión y la cuantía de les sovenciones a les Asociaciones Deportives, Culturales, Xuveniles, de Festeyos, etc, según coincidan los sos plantegamientos y los sos oxetivos colos de los grupos políticos, polo que solicitamos que se reconsidere esta decisión, que non se paralice la sovención añal al Club Victoria de Perlora, y que non se valoren estes cuestiones na concesión de les sovenciones.

Santi Artime. UNIDÁ-Andecha Carreño

Valoración d'Unidá – Andecha Carreño de la petición del Equipu Gobiernu del Ayuntamientu d'aconceyase cola Autoridá Portuaria de Xixón

Na cabera Comisión d´Ordenación del Territoriu, Infraestructures y Vivienda, celebrada el 17-06-08, l'equipu gobiernu del Ayuntamientu Carreño informó a los grupos políticos de la carta enviada'l 29 de Mayu pol Presidente de L'Autoridá Portuaria de Xixón, Fernando Menéndez Rexach, solicitando al Ayuntamientu Carreño que reconsidere la decisión de recurrir ante l'Audiencia Nacional el proyeutu de desmonte del Altu Aboño. Por otra parte, l'equipu gobiernu tamién anunció la decisión de solicitar una reunión col Conseyu d'Alministración de l'Autoridá Portuaria pa escuchar los nuevos argumentos y valorar nuevamente la necesidá del desmonte y la posibilidá de retirar el recursu, polo que solicitó al restu de grupos políticos facer la petición conxunta.
Dende UNIDÁ-Andecha Carreño anunciamos públicamente, como ya diximos na Comisión, que nosotros non apoyamos esta petición del equipu Gobiernu, y non vamos solicitar la reunión pa valorar nuevamente'l proyeutu. Queremos reiterar que siguimos tanto totalmente a la escontra del desmonte del Altu Aboño, y manifestamos que siguimos y siguiremos apoyando'l recursu ante l'Audiencia Nacional, ya qu'entendemos que ye la única forma d'impidir esti atentáu al Mediu Ambiente, y de frenar la espansión de nueves actividaes altamente contaminantes hacia Carreño.
Entendemos que los argumentos que siempre espusimos contra la forma en que se fai l'ampliación del Puertu del Musel, contra la so espansión hacia Carreño, y contra l'apuesta que tien el Gobiernu del PSOE por un modelu económicu altamente contaminante, obsoletu, que contradiz lo alcordao nel Tratáu de Kioto y que non dexa riqueza n'Asturies siguen siendo totalmente válidos.
Tamién queremos reiterar el compromisu d'UNIDÁ-Andecha Carreño cola proteición del Mediu Ambiente, coles polítiques de desarrollu sostenible y colos vecinos y vecines de Xibares y Aboño na nuestra oposición al desmonte del Altu Aboño.
Nesa mesma Comisión, tamién mantuvimos que, en casu de celebrase esi aconceyamientu cola Autoridá Portuaria, UNIDÁ-Andecha Carreño valoraría la posibilidá d'acudir, pero non pa que nos convenzan de la necesidá de llevar a cabu esi desmonte, sinón pa esponer nuevamente los argumentos contra l'ampliación del Puertu del Musel y el desmonte. De la mesma manera, tamién solicitamos que s'invitara a les AAVV de Xibares y Carrió a participar nella, contando esta propuesta col rechazu unánime del restu de grupos políticos.

UNIDÁ-Andecha Carreño pide axilizar les obres de La Mata y acusa a PP, PSOE ya IU de mentir a los vecinos y vecines

Na Cabera Comisión d'Urbanismu, UNIDÁ-Andecha Carreño pidió al equipu gobiernu qu'axilice los trámites pa llevar a cabu les obres nes instalaciones deportives de La Mata, no referente a la construcción de la nueva Tribuna y al campu de yerba artificial.
Tamién acusamos a PSOE, PP ya IU, partíos con representación na Xunta Xeneral del Principáu, de mentir a los vecinos y vecines de Carreño cuando anunciaron l'aportación de 600.000 € pa les instalaciones deportives de La Mata, aportación qu'estos grupos apoyaben, y que finalmente paez ser que va quedar na metá, 300.000 € (según apaez publicao el 13 de Xunu nel boletín de la Xunta Xeneral). Esperamos qu'espliquen esta decisión de recortar l'aportación inicial al 50 %, que toos quixeron vender como un llogru suyu, pola qu'estos grupos quixeron colocase medayes ante los vecinos y vecines, y de la qu'agora nenguno d'ellos se responsabiliza.
Dende UNIDÁ-Andecha Carreño preocúpanos tamién que, a día de güei, l'equipu gobiernu non tenga claru'l destín concretu y les condiciones del creitu aprobáu pol Principáu, nin se mos informe de qué va contemplar el proyeutu pa facer la nueva tribuna, y si les piticiones tanto del Candás C.F. como del Club Victoria van tenese en cuenta.
Anque agora tovía non hai la disponibilidá económica (el presupuestu del Ayuntamientu y l'aportación del Principáu tan aprobaos, pero encuéntrense en periodu de publicación y d'alegaciones), creemos que se puede dir avanzándose na ellaboración de los proyeutos téunicos, na demolición de la tribuna clausurada, o na tramitación de los permisos necesarios (el campu de Fútbol de la Mata sigue siendo de titularidá del Principáu, polo que ye necesario qu'esta alministración dea'l so permisu pa llevar a cabu les obres). Ente la llicitación de les obres, y el plazu de construcción de la tribuna tamos falando de más de 3 meses, polo qu'anque ya non dea tiempu a que tean finaes les obres pal entamu la temporada deportiva, a finales d'Agostu, ye necesario que s'encuentren avanzaes pa qu'interfieran lo menos posible na planificación y nel desarrollu l'actividá deportiva del Candás C.F. y del Club Victoria. Pola so parte, na Comisión, l'equipu gobiernu comprometióse a priorizar na oficina téunica la ellaboración del proyeutu de construcción de la tribuna.
Creemos que con esta aportación económica (del Ayuntamientu y del Principáu), y contemplando les demandes necesaries del Candás C.F. y del Club Victoria, pueden tar resueltos en parte, los problemes de les instalaciones deportives de la Mata, onde caún de los clubes puede xestionar y facese responsable d'un campu de fútbol natural. Pola so parte, el Patronatu Deportivu Municipal podrá encargase de xestionar, organizar y planificar l'usu del campu de yerba artificial, pa usu tanto de los clubs, como pal fútbol aficionáu y amater.

Santi Artime
Conceyal d'UNIDÁ-Andecha Carreño

Intervención d'Unidá-Andecha Carreño nel plenu de presupuestos 2008, el 4 de Xunu, 2008

Como ya anunciamos na cabera comisión d'Hacienda, non vamos apoyar el presupuestu municipal. Hai que dar un solu votu pa too: presupuestu l'ayuntamientu, presupuestu los patronatos, plantiya municipal y pa la ufierta d'emplegu público. Sí apoyamos munches de les partíes, sí apoyamos los presupuestos de los patronatos, pero hai que dar un solu votu, y dende UNIDÁ-Andecha Carreño, dempués de valorar el presupuestu en so conxuntu, asina como de valorar l'aición de gobiernu del caberu añu, vamos dalu a la escontra.
Ye esti un presupuestu que toos contábemos que diba aprobase colos votos de PSOE, IU y URAS, pero sorpréndemos la decisión d'UICA, que tamién va aprobalos sin sacar, al menos al nuesu entender, una propuesta relevante. Gran parte de les sos peticiones esplicaes na Comisión d'Hacienda son estudios, estudios previos, planes y concursos d'idegues. Cuando la llexislatura pasada foron el partíu que más vegaes y más bruscamente polemizó coles actitudes del equipu gobiernu, qu'agora cambie'l so votu y vaya de la mano del PSOE al que descalificaron de toles maneres, d'IU que fizo desapaecer l'aparcamientu de 1u Mayu y del que quedó bautizáu como superconceyal, non lo entendemos.
Dende UNIDÁ-Andecha Carreño creemos que tenemos razones abondes pa esplicar a los vecinos el nuesu votu negativu, y voi intentar esponelo:
Por un llau, porque'l presupuestu municipal entendemos qu'hai qu'intentar que tea aprobao nel primer trimestre del añu. Había'l compromisu públicu además, asumío pol equipu gobiernu durante'l debate del presupuestu del añu 2007, de tenelo p'antes del mes de Febreru, y tamos en Xunu, y ya pasó mediu añu 2008. Non mos val la disculpa de que non se puede tener primero, cuando na mayoría los conceyos apruébenlo nesti plazu de 3 meses. Sabéis que retrasalu tanto trai problemes, dificulta xustificar gastos, o por exemplu, siempre lo comento nes comisiones, dificulta de les AAVV, Asociaciones Culturales, de Festeyos, etc, pa planificar adecuadamente les sos actividaes.
D'otra miente, tampoco cumple ún de los puntos programáticos y políticos básicos d'UNIDÁ, como ye afondar na Democracia Participativa y la Participación Ciudadana. Creemos que fomentar la Participación ye la única manera de da-yos a los vecinos/es la capacidá d'actuar direutamente, y de da-yos la capacidá real de facer cambios na vida política municipal y nos presupuestos municipales. Y mientres esto non se faiga, y ye verdá qu'al entamu va ser abegosu pola novedá, pero polo menos non exista la intención de facelo, mientres non se siga l'exemplu d'otros Ayuntamientos qu'ellaboraron y ellaboren los presupuestos de forma participativa colos vecinos/es, la Izquierda Nacionaliega representada na Casa Conceyu non aprobará un presupuestu municipal. Entendemos que non queráis ellaborar los presupuestos d'esta manera que pidimos, pero nosotros llevámoslo nel programa eleutoral y vamos ser coherentes con ello.
L'equipu gobiernu munches veces argumenta que presentándolos al Conseyu de Participación Ciudadana ye bastante, y ya los fai asina participativos. Creo que tais equivocaos neso. Entendemos que la forma de presentalo a les AAVV non ye l'adecuada. Y non soi yo solo quien lo digo. Tamién vos lo dicen les propies AAVV, qu'asina ellos non pueden posicionase, qu'esta non ye la manera de presentalo, que sin tiempu pa revisalo y pa valoralo col restu los vecinos ellos non van dicir nada.
Los sindicatos municipales, presentes na Comisión de Personal, tamién espresaron el so rechazu al presupuestu. Pueden compartise o non los sos plantegamientos, pero na cabera Comisión de Personal, y traslladao a votación la plantiya municipal, tolos sindicatos votaron a la escontra de la so aprobación por non contener les demandes que plantegaben en materia llaboral.
Cuando falamos de les inversiones na Zona Rural, siempre, dende que tamos representaos na Casa Conceyu, criticamos el Plan Integral. Nosotros siempre dicimos qu'esto non ye un Plan Integral, y que les parroquies rurales de Carreño tienen munches necesidaes y non únicamente d'asfaltu y de lluz. Entendemos que con meyores polítiques dende los Ayuntamientos y dende Asturies pueden meyorase les inversiones y rentabilizar meyor el dineru. Con parte d'estes perres, podría crease, por exemplu, un serviciu d'autobús rural, qu'acerque a los vecinos/es a Candás o a otros puntos del conceyu, al ambulatoriu, a la plaza o pala mocedá los sábados pola nueche.
Siguimos sin ver dineru p'actuar nel patrimoniu históricu desperdigao pol conceyu. Siempre falamos d'un plan Arqueolóxicu pal Monte Areo o pa evitar que s'esboroñe'l Torruxón de Yebio. Y siguimos sin ver que camude l'actitú pa con esi patrimoniu. Fai poco, tovía denunciamos la corta sin control que se taba faciendo al llau del Castru La Barrera. Ye dalgo que vengo denunciando continuamente sin qu'haya un mecanismu organizáu y sistemáticu na Casa Conceyu pa evitalo. Y refiérome a que, por exemplu, danse llicencies pa plantar montes d'ocalitos en zones onde hai fontes públiques (creo que toos sabemos qu'un monte d'ocalitos enriba'l manantial d'una fonte col tiempu acaba secándola). Creo qu'hai qu'articular los mecanismos necesarios na Oficina Téunica pa impidilo y que se protexan adecuadamente'l nuesu patrimoniu natural, cultural y históricu. Llevo algo que llevo denunciando dende la llexislatura pasada y non veo que se tomen midíes que dean resultaos.
Sigue sin haber nengún tipu de política de mocedá. Por non tener, non tienen un sitiu onde xuntase y organizase. Son los olvidaos poles alministraciones. Y sigue sin haber tampoco polítiques de vivienda pa la mocedá. Non se si la burbuxa inmobiliaria esplotó, dúdolo, pero los problemes p'acceder a una vivienda por parte la mocedá siguen siendo los mesmos. Y dende la Casa Conceyu tien qu'actuase. Nosotros siguimos falando d'una Casa la Mocedá y de la creación d'un Parque de Vivienda público. Entiendo que non lo veis, non tais d'alcuerdu, en tolos plenos de presupuestos me los dicís, pero nosotros siguimos creyendo que ye necesario.
Non tamos pa nada d'alcuerdu cola partida de 170.000 € destinada a costruir l'acera pa la piscina. Siempre defendimos que'l camín más curtiu, más guapu y más seguru pa dir a la piscina yera'l camín del Sevillanu, siguimos defendiéndolo, y non tamos d'alcuerdu con facer esta acera. ¿Fízose la ponte?
Sigue sin destinase'l 0.7% pa cooperación internacional. Y non solo non mos vamos acercando a esa cifra, sinón que cada vegada'l porcentaxe ye menor. Pasamos d'un 0.48, un 0.46 un 0.52 l'añu que más s'acercó a esa cifra, a ponenos esti añu nun 0.33. Entendemos qu'a tolos partíos se-yos llena la boca falando de solidaridá y d'ayuda al desarrollu, y dempués non queda namás qu'en papel moyáu y non hai de verdá un braeru compromisu. Entendemos que polo menos esi 0'7% tendría que tar reservao p'apoyar iniciatives de cooperación, lo mesmu que s'aseguren los sueldos a los funcionarios o se sabe qu'hai que pagar la lluz.
Non vemos nenguna partida destinada a siguir avanzando realmente na creación d'un Muséu la Pesca y la Industria Conservera n'Ortiz. Creo que'l proyeutu ta bastante abandonao y paralizáu, y espero que non quede en papel moyao, como los proyeutos tamién plasmaos en planos que ya se presentaron nos 80 y 90 na Casa Conceyu. Hai una partida de 60.000 destinada a restaurar pieces que tan en mal estáu. Paez ser que valió p'algo la polémica de fai dos años, pero creemos que munches d'elles ya se perdieron. Vamos intentar salvar lo que queda, ye imprescindible, pero esto non ye invertir pa facer realidá'l Muséu.
Entendemos además, que con un presupuestu non solo s'aprueba'l repartu de les perres, sinón que tamién sa aprueba o non l'actividá política del equipu gobiernu nel caberu añu. Sí ye verdá que non hubo polémiques importantes, non como na pasada llexislatura, pero non podemos dar la nuesa aprobación a la xestión del equipu gobiernu.
Con respeutu al Mediu Ambiente en Carreño y a les midíes que se tomen, vamos dar un marxen de confianza a la Conceyala. La situación mediambiental ye ún de los temes más críticos en Carreño y tá trabayándose, creo que con resultaos más lentos de lo deseable, pero creo que tan faciéndose coses. Vamos esperar a los resultaos a mediu plazu asina como al debate del PXOU, pa dende UNIDÁ-Andecha Carreño volver a plantegar delles propuestes, y ver la postura final d'IU. Aplaudimos decisiones como la denuncia del desmonte del Altu Aboño a l'Audiencia Nacional, tomada por unanimidá por tolos grupos o'l sistema de recoyida de basoria urbana con cubos de quita y pon, pero sigue habiendo actitúes y decisiones que nos preocupen, como por exemplu que ni PSOE nin IU votaren la moción contra la Regasificadora, sin entender realmente'l riesgu que supón esa istalación pal mediu Ambiente y pa la seguridá de los vecinos/es de Carreño.
Sigue sin haber un control urbanísticu eficiente, y sigue siéndose mui permisivu coles empreses y costructores. Vertederos d'empreses costructores na trasera de la Fábrica d'Albo, o situaciones como la que sufrimos los vecinos de la Calle'l Carbayu, más de 3 meses llevantada, entendemos que requieren que se tomen midíes con mayor rapidez. O situaciones como la del Barriu'l Pibidal, a quien quedó de dásellos solución pal branu pasáu, dempués pa les navidaes, y ya tamos nel branu otra vegada. Actuaciones como'l pasu soterráu de les vies al aparcamientu'l Molín, que non respeta l'accesu a minusválidos, y que sí creemos que ye fácilmente solucionable, entendemos que son equivocaes y qu'hai que meyorar.
Sigue sin dase una solución al problema del aparcamientu, nin acaba d'abrise de verdá un braeru debate ente los grupos políticos de la Casa Conceyu pa buscar soluciones. Atrevome a dicir que la única midida que se tomó y que se vió de verdá algo, foi la d'Andecha d'habilitar el llateral de la Plaza la Baragaña. Y non me val el prau de Gervasia. Eso non ye nenguna solución, y va intentar facese esti añu otra vegada. Espero, de verdá, que la Conceyala d'Urbanismu recapacite y non lo permita esti branu.
La situación de la llingua ye la mesma que na llexislatura pasada. Hai una falta de respetu y despreciu pa col asturianu y los asturfalantes. Hai una toponimia oficial, aprobada por tolos grupos que tamos güei equí representaos, y que non s'emplega anque lo pida insistentemente y anque haya una Moción aprobada nun plenu municipal. Sí me paez positivu esi conveniu que se va firmar cola academia la Llingua Asturiana y la creación d'una beca d'investigación toponímica. Y felicito por ello al conceyal de Cultura. Pero lo socedío va poco cola páxina Web Oficial del Ayuntamientu Carreño demuestra que siguís considerándolo algo accesorio y que puede esperar, cuando la única manera de salvar el mayor patrimoniu cultural d'Asturies ye defendela y emplegala, aplicando midíes pa dignificar, normalizar y oficializar el so usu. A la hora d'afrontar midíes normalizadores pa la llingua, dende l'equipu gobiernu munches vegaes discúlpense col argumentu presupuestariu, polo qu'entendemos qu'al non haber partida específica reservada, non hai una intención real de dignificar y normalizar la llingua asturiana.
Observamos una total descoordinación ente'l gobiernu de Carreño y el del Principáu. Y eso que son los dos del PSOE. Nótase descoordinación y falta de pesu en temes como l'ampliación del Musel hacia Carreño y el desmonte l'altu Aboño, como la situación de la CV Perlora, como lo socedío cola grada y col campu'l Candás, y qu'agora sí paez que va invertise dineru del Principáu. Esta descoordinación non ye nada bueno pa Carreño. Y creemos que ye responsabilidá del equipu Gobiernu, y del PSOE sobre tou, que pa eso coinciden en Carreñu y Asturies, negociar ante'l Principáu les inversiones y los proyeutos que tienen pa Carreño. Los fechos dannos la razón de que les coses non se tan faciendo de forma correcha.
Quiero tamién remembrar, que'l presupuestu vótase en conxuntu, y que ye un únicu votu, y que sí ye verdá que dende Andecha tamos d'alcuerdu con delles partíes qu'apaecen ehí reflexaes, munches de les cuáles sofitamos nes diferentes comisiones d'ayuntamientu.
Si sofitamos la inversión de 275.000 pa la Tribuna del Candás, y viendo agora que'l Principáu va invertir otros 600.000, creemos que puede quedar una zona deportiva curiosa, y solucionar los problemes qu'hai pa usar los campos de futbol, vestuarios, la situación del Club Victoria, etc. Anque sí ye verdá que preocúpanos lo poco definío que ta tou.
Sofitamos partíes como la de proyeutos mediambientales, el centru de día, los planes pa modernizar l'Ayuntamientu, l'ampliación de la Biblioteca, les partíes destináes a meyorar el suministru d'agua y el saniamientu, etc.
Les nueses propuestes tan recoyíes nel nuesu programa eleutoral, que ye lo que venimos defender equí, en nome de los vecinos/es que nos dieron la confianza nel eleiciones. Non tenéis namás que garrar el programa, o atender les peticiones qu'UNIDÁ-Andecha Carreño fai nes Comisiones pa tener el nuesu apoyu. Tanto la ellaboración del presupuestu participativu como les propuestes que plantegamos son viables y munches d'elles prioritaries pa Carreño, y non fai falta namás que la voluntá política pa desarrollales y llevales a cabu, y mientres que non haya esa voluntá política, Andecha Astur non aprobará nengún presupuestu d'esta Casa Conceyu.

UNIDÁ-Andecha Carreño pide al equipu gobiernu que tome medies pa protexer el Castru La Barrera

El pasáu 14 de Mayu, UNIDÁ-Andecha Carreño treslladó a la Comisión de Mediu Ambiente'l peligru que supón pal castru La Barrera la corta d'un monte d'ocalitos na zona, que puede afeutar a los fosos y muros que queden en pié, asina como a posibles pieces que pudieren tar enterraes. A día de güei, nunca s'escavó nin se fizo una estudiu completu d'él. Nel Castru atopáronse un recipiente de caliza monolíticu rectangular, asina como un hachu de Bronce con talón gruesu en "H", catalogáu como de tipu "asturianu", y que lo mesmu que la pieza anterior, ta desapaecíu.

Anque'l monte que se ta cortando non correspuende exautamente cola situación del Castru, la posible esistencia de restos na redolada y el que nunca se ficiera una escavación y un estudiu completu que fixe la estensión real, faen necesario estremar les precauciones. Revisando la llicencia pa la corta del monte, vemos cómo en nengún llau s'alvirtió a la empresa maderera de la esistencia d'esti elementu patrimonial, nin se condicionó la llicencia o se mandó vixilar la posible apaición de restos arqueolóxicos.
Nel Plenu Municipal del 29 de Mayu, UNIDÁ-Andecha Carreño volvió entrugar por esta situación, comunicándonos l'equipu gobiernu que de momentu non se tomara nenguna midía. Finalmente nel Plenu, UNIDÁ-Andecha Carreño algamó'l compromisu de les Conceyalíes de Mediu Ambiente y de Cultura d'adoptar les medies de protección necesaries nos próximos díes, asina como de ponese en contautu cola Comisión de Patrimoniu del Principáu d'Asturies, por si fuera necesaria la so intervención.El Castru La Barrera, asitiáo en Llorgozana, ye de medianes dimensiones (70 x 40 metros) y atopase a media lladera, concentrándose les defenses na vertiente d'accesu (Norte), anque tien restos de fosos nos llaterales. A día de güei, nunca s'escavó nin se fizo una estudiu completu d'él. Nel Castru atopáronse un recipiente de caliza monolíticu rectangular, asina como un hachu de Bronce con talón gruesu en "H", catalogáu como de tipu "asturianu", y que lo mesmu que la pieza anterior, ta desapaecíu. Esti Hachu de Bronce fue atopáu por un vecín de la zona nel añu 1978, y el rastru piérdese hasta qu'INTERPOL tuviera conocimientu de que fuere subastáu illegalmente n'Estaos Xuníos (EEUU) en 2002. Anguañu sigue desapaecíu.
Por otru llau, entendemos que ye necesario que dende l'Ayuntamientu, cuando se conceden llicencies, se vixilen meyor los elementos del patrimoniu y s'organice meyor la so proteición. A día de güei, cuando se conceden llicencies, non se fai una comprobación sistemática de les posibles afecciones a los Bienes del Inventariu de Patrimoniu Cultural y Natural de Carreño (afecciones a castros, fontes, caminos reales, yacimientos llíticos, etc) y depende del posible conocimientu por parte'l téunico na materia o los conceyales presentes nes Comisiones, de la esistencia de bienes catalogaos. Entendemos que ye necesario camudar esti proceder, y que dende la Casa Conceyu se tomen les medíes organizatives necesaries p'asegurar la proteición del nuesu patrimoniu históricu y natural.
UNIDÁ-Andecha Carreño

UNIDÁ-Andecha Carreño pide al equipu gobiernu del Ayuntamientu Carreño que tome medies p'acondicionar el Parque y la Calle del Carbayu

Esta situación fue denunciada delles vegaes por UNIDÁ-Andecha Carreño nes Comisiones d'Urbanismu de los últimos meses, sin qu'hasta'l momentu se vean resultaos nin soluciones.

A día de güei, paez ser que'l problema ta en qu'Hidroeléctrica tien que retirar una columna de tendíu elléutricu, que se retrasa una y otra vegada, y que fai que la empresa constructora non pueda completar l'arreglu del Parque y l'asfaltáu de la cai.
Non ye xustificable que más de dos meses dempués de retirar los bancos, los xuegos infantiles y de llevantar el firme, esta zona de Candás siga nestes condiciones, y ún de los parques más usaos de Candás pola xente mayor y los rapacinos non pueda ser disfrutao dende fai más de tres meses.
Esta situación de suciedá na calzada, de falta de mobiliariu urbanu y de ser escesivamente permisivu coles empreses y constructores dase fundamentalmente nes obres del estrarradiu de Candás (La Matiella, Piñeres, Perán, etc). Entendemos que'l mesmu procuru y vixilancia que se tien nes cais y obres del centru de Candás, hai que tenelo coles obres de los barrios de les afueres, pa non crear vecinos de 1ª y de 2ª.
Por otru llau, dende UNIDÁ-Andecha Carreño siguiremos pidiendo al equipu Gobiernu qu'integre nel parque del Carbayu l'almacén situáu na zona del Manantial, ampliando los aparcamientos y la zona verde. Entendemos qu'esti almacén dexó d'usase porque incumple les medides de seguridá que s'esixen dende fai 2 años pa tolos manantiales y captaciones d'agua, y la única alternativa ye eliminalu y acondicionalu como zona verde.
Santi Artime. UNIDÁ-Andecha Carreño

XXIX Día les lletres asturianes

UNIDÁ llama a la participación na manifestación del 9 de mayu nel Día de les Lletres

UNIDÁ fixo güei públicu un comunicáu nel que se llama a la participación de tolos asturianos y asturianes na manifestación que como tolos años convoca la Xunta pola Defensa de la Llingua Asturiana con motivu del Día de les Lletres Asturianes.
Dende UNIDÁ entiéndese qu’esti ha ser un día de celebración de la llingua d’Asturies pero tamién de reivindicación de los derechos que se-yos nieguen a los falantes y al conxuntu d’Asturies como pueblu.

N'alcordanza del llevantamientu d'Asturies de 1808 frente al exércitu napoleónico

UNIDÁ-Andecha Carreño presenta una moción na Mancomunidá del Cabu Peñes, n'alcordanza del llevantamientu d'Asturies de 1808. La moción foi presentada na Comisión de Réximen Interior de la Mancomunidá del Cabu Peñes, que se celebró'l 6 de Mayu. Foi aprobada colos votos a favor de tolos grupos políticos esceuto'l PP que s'astuvo, a la espera de posicionase na Xunta de Mancomunidá, que se celebrará nes próximes selmanes y onde tendrá que ratificase nuevamente l'aprobación de la Moción, colos votos de tolos grupos políticos.

- Moción. Esposición de motivos
El llevantamientu d'Asturies en Mayu de 1808 contra les tropes franceses, ye ún de los acontecimientos más notables qu'ofrez la nuesa hestoria.El 25 de Mayu de 1808, ante la ocupación francesa, la Xunta Xeneral d'Asturies constituyía en Xunta Suprema de Gobiernu, con atribuciones de Soberanía, declara formalmente la Guerra a Francia, manda embaxadores a Inglaterra y alcuerda la creación d'un exércitu popular asturianu.Nos díes siguientes, tanto Carreño como Gozón súmense a la declaración de la Xunta Xeneral y comiencen a movilizase, siendo la nobleza rural y los llabradores los principales protagonistes. Créense patrulles nes villes, protéxese la costa y los caminos de los conceyos, y recuéyense suministros y armamentu.
La comarca de Peñes vese protagonista el 28 de Mayu de 1808, cuando "un rapacín de Candás" media ente los embaxadores asturianos unviaos pola Xunta Xeneral y un barcu Inglés fondiáu frente a les costes de Lluanco, nel que queden embarcaos.
El 9 de Xunetu de 1808 créase'l Reximientu de Candás y Lluanco, compuestu por 700 soldaos, la mayor parte de Gozón y Carreño. Esti reximientu sufrió una importante derrota el 10 y 11 de Payares de 1808, na batalla d'Espinosa de los Monteros (Burgos), na que morrieron más de 350 persones. Otres batalles importantes nes que participó foron en Santander, Salamanca, Badaxoz, Zamora, Vitoria, Bayona, etc.
A partir del 19 de Xunetu de 1808, por mandatu de la Xunta Xeneral, organízase L'Alarma de los conceyos, que taba compuesta por tolos vecinos, esceuto los vieyos, muyeres y neños. El 20 de Mayu de 1809, L'Alarma de Gozón y Carreño foi convocada en Valliniello, onde sufrieron una gran derrota, con más de 200 muertos.
La primera invasión de los conceyos y ocupación de Lluanco y Candás produzse'l 21 de Mayu de 1809 y duró un mes. Hubo nueves invasiones dende Xineru de 1810 hasta Xunu de 1811, dende Payares de 1811 hasta Xineru de 1812, y finalmente dende Mayu hasta'l 14 de Xunu d'esi mesmu añu, cuando les tropes franceses colen d'Asturies.
Estos fechos representen un periodu trascendental de la hestoria de Carreño y Gozón, que tienen que ser celebraos y conmemoraos. Y qu'además representen una duda histórica, ya que la mayoría los conceyos (ente los que s'alcuentra Carreño según acta del Plenu del 28-05-1808), prometieron a los sos Reximientos llevantar una tabla cívica, pa "perpetuar la memoria d'aquellos que s'allistaren", y non hai constancia de qu'esta llegara nunca a facese.

- Ello asina, UNIDÁ-Andecha Carreño somete pa la so aprobación la moción que vien darréu:

Primeru.- Qu'esti 25 de mayu de 2008 cúmplense 200 años de la proclamación de soberanía por parte de la Xunta Xeneral del Principáu, que n'usu de la mesma declaró la guerra al Imperiu Francés, firmó la paz y l'alianza militar con Gran Bretaña nel so propiu nome, llevantó un Exércitu Defensivu Asturianu y formó un gobiernu soberanu.
Segundu.- Qu'esos fechos tuvieron gran trascendencia p'Asturies por suponer l'aniciu de la nuestra Historia contemporánea, por marcar les primeres boquiaes del Vieyu Réxime y pola entrada na vida política del conxuntu del pueblu asturianu, axente activu en tol procesu de cambios.
Terceru.- Que'l procesu revolucionariu y soberanista tien una gran importancia simbólica pal pueblu asturianu, ente otres coses por ser la causa de la istauración de l'actual bandera asturiana.
Cuartu.- Qu'esos acontecimientos tuvieron especial importancia pa la nuestra comarca, porque la embaxada encabezada por José María Queipo de Llano partiera pa tierres ingleses dende la costa del Cabu Peñes, asina como'l pol fechu de que dende xunu de 1808 quedara formáu un Reximientu de Candás y Lluanco de voluntarios del Exércitu Defensivu Asturianu, del que tovía se conserva la so bandera nel Muséu del Exércitu de Toledo.
Quintu.- Qu'esos socesos son especialmente dignos de celebrar en tanto que suponen un elementu de memoria compartida por toles corrientes polítiques presentes güei na sociedá asturiana, nel que toes elles puen vese reflexaes por ser, perriba de les distintes tendencies ideolóxiques, la marcha unánime d'un pueblu escontra la dominación y la imposición.
Sestu.- Que s'afite una placa, n'alcordanza de los fechos socedíos n'Asturies y en Carreño y Gozón durante La Francesada, col testu: "Los conceyos de Carreño y Gozón, n'alcordanza del Reximientu de Candás y Lluanco, de L'Alarma y de tolos vecinos y vecines que llucharon al lláu de la Xunta Xeneral y del Exercitu Defensivu Asturianu, contra la dominación francesa, ente 1808 y 1812".
Séptimu.- Que se coloque la copia de la bandera del Reximientu de Candás y Lluanco nun llugar predominante de la sede de la Mancomunidá.
Santi Artime. UNIDÁ-Andecha Carreño
Bandera del Reximientu de Candás y Lluanco

EL CONSEYU SECTORIAL DE MEDIU AMBIENTE DEL CONCEYU DE CARREÑO APRUEBA UNA MOCIÓN CONTRA LA CONSTRUCCIÓN DE LA REGASIFICADORA

La moción del grupu Unidá-Andecha Carreño foi aprobada, por procedimiento d'urxencia, por 8 votos a favor y 4 en contra na pasada reunión del Conseyu del 29 d'abril

El Conseyu Sectorial de Mediu Ambiente ye un órgano consultivu del Ayuntamientu de Carreño, de cálter permanente que tien por obxetu facilitar la participación ciudadana nos asuntos relacionaos col mediu ambiente y la calidá de vida de los vecinos del conceyu.
El Conseyu Sectorial será, amás, una de les principales ferramientes qu'emplegará l'Axenda 21 local pa garantizar la participación vecinal durante la so aplicación nel Conceyu Carreño.
Na reunión ordinaria del paso martes 29 d'abril, el representante del grupu municipal d'Unidá-Andecha Carreño presentó por procedimientu d'urxencia una moción na que, en base a un argumentariu de doce puntos, proponíase qu'el Conseyu Sectorial se manifestara públicamente en contra de la construcción de la planta regasificadora del Musel.
Nel testu defendío pol representante d'Unidá, poníase de manifiestu la preocupante peligrosidá de la istalación, cerca d'importantes núcleos de población como Xibares, Albandi, Aboño, Xove, La Calzada o El Natahoyo. Tamién se refugaba dafechu la construcción de nueves centrales térmiques de ciclo combináu, qu'aumentarán inda más la contaminación atmosférica, y que serán la consecuencia directa de la istalación de la planta de gas. Apuntose qu'Asturies ya exporta 2/3 de la enerxía que consume y que les polítiques de desarrollu sostenible y el protocolu de Kyoto falen de que la enerxía tien que producise cerca de los llugares de consumu.
El conseyu sectorial de Mediu ambiente recordó tamién que la planta va suponer daños pal mediu marinu de Carreño, pol gran consumo d'agua marina como refrixerante de la regasificadora y pol tráfico de buques metaneros frente a la costa de Carreño. Tamién se recordó que'l mesmu proyectu foi refugao en Galicia por un fuerte movimientu vecinal, y que vien de rebote p'Asturies, ensin que nadie falara enantes de la so necesidá p'Asturies.
Finalmente la moción foi aprovada por 8 votos a favor y 4 en contra y va dase comucinación de la mesma al Ministerio de Mediu Ambiente, Al Ministerio d'Industria, Tuirismu y Comerciu, a la Autoridá Portuaria de Xixón y al Gobiernu del Principau d'Asturies.

Grupu municipal d'Unidá–Andecha Carreño

Vídeo, presentación de la moción nel Plenu del Ayuntamientu de Carreño

UNIDÁ-Andecha Carreño: Valoración del retrasu de les obres na Ciudá de Vacaciones de Perlora.

Dende UNIDÁ-Andecha Carreño, entendemos que la noticia del retrasu "nun mínimu de 14 menos" del entamu de les obres na C.V. Perlora ye una mala noticia pa Carreño, qu'últimamente solo recibe proyeutos incompatibles col desarrollu sostenible y altamente contaminantes: Regasificadora, ampliación del Puertu del Musel, Desmonte d'Aboño, nueves centrales de ciclu combináu, Incineradora en Serín, etc. Esti proyeutu, que ye interesante, ye compatible col entornu y que va crear un númberu importante de puestos de trabayu, sigue retrasándose, colos perxuicios que supón pal seutor turísticu y pa tolos vecinos/es de Carreño.
Non entendemos por qué hubo tanta priesa n'echar a los trabayadores de Perlora pa otros puestos, y agora'l PSOE ve normal y aceuta un retrasu mínimu que si ellos calculen en 14 meses, fácilmente llegará a los dos años.
Cuando'l Sr Rabanal suspendió la visita a Carreño prevista pal día 14 d'esti mes, nel que diba esplicar en qué situación taba la C.V. Perlora, alguna noticia mala d'esti tipu se barruntaba. Siguimos pidiendo, como ficimos dende UNIDÁ-Andecha Carreño nel Plenu Municipal del pasáu Xueves, que'l conseyeru d'Economía Sr Rabanal, fixe la fecha de la Reunión que tien pendiente en Carreño y s'aconceye colos portavoces de los grupos políticos, pa poder trasllada-y les entrugues y dudes que tenemos sobre la continuidá del Proyeutu.
A día de güei non sabemos por qué, si una de les condiciones iniciales pa optar a la xestión de la C.V. Perlora yera axustase al planeamientu en vigor, se quier agora camudar esti requisitu y quier cambiase la calificación urbanística. Na presentación pública que se fizo en Candás, con tola parafernalia y publicidá con que suel acompañase'l PSOE, nunca se dixo que yera necesario camudar les normes urbanístiques. Y si ye que yera así, si ya sabíen que facía falta camudar eses Normes Urbanístiques, ta claro que'l Principáu tien qu'acoyese a los trámites que s'esixen a cualquier vecín y qu'estipula la llei, y tien qu'haber un periodu d'esposición pública, d'alegaciones y de revisión y aceutación pol Ayuntamientu, que non se puede acortar.
Dende UNIDÁ-Andecha Carreño, entendemos que'l proyeutu tien qu'axustase a les proteiciones que fixa pa esta costa'l Plan d'Ordenación del Llitoral Asturianu (POLA), que ye quien controla que les actuaciones y les obres seyan paisaxista y ambientalmente respetuoses y acordes col entorno. Dende UNIDÁ-Andecha Carreño vamos esixir que se cumplan les restricciones que plantega'l POLA, y que siga siendo compatible col Plan d'Ordenación del Llitoral como lo yera nun principiu.
Por otru llau, si les obres na Ciudá de Vacaciones de Perlora non van entamar esti branu, esiximos al Principáu que mantenga les zones verdes y les playes en buenes condiciones (xardinería, llimpieza, aseos, etc). Tamién esiximos que se permita l'apertura de los servicios hosteleros de les playes, y que si dende'l Principáu non quieren organizalo, podríen cedese dende l'Ayuntamientu a organizaciones culturales y deportives del conceyu pa que lo esplotaren. Lo que tenemos mui claro y esiximos dende UNIDÁ-Andecha Carreño, ye que non puede repetise la situación del branu pasáu, nel que l'abandonu de les istalaciones y la falta de cuidaos nes playes y nel entornu fizo dar la vuelta pa casa a munchos visitantes.

Santi Artime, Concejal d'UNIDÁ-Andecha Carreño

Debate en el Teatro Prendes

Hoy debate en el Teatro Prendes de Candás a las 20h. con participación de los portavoces de los partidos políticos con representación en el ayuntamiento de Carreño.

En el debate estará Santi Artime concejal de Unidá - Andecha Carreño

Apoyo a la manifestación "Frente al cambio Climático, menos CO2, Regasificadora Non"

UNIDÁ-Andecha Carreño xúnese a la manifestación del día 20 d'Abril, baxo'l llema "FRENTE AL CAMBIO CLIMÁTICO, MENOS CO2" REGASIFICADORA NON, y que ta convocada pola Iniciativa Ciudadana Regasificadora Non.

Carreño ye un de los conceyos d'Asturies más afeutaos polos planes enerxéticos propuestos p'Asturies:

· En Carreño ta asitiada la Térmica d'Aboño, que ye una de les 3 centrales térmiques más contaminantes d'Europa, y que ta en procesu d'ampliación con un tercer ciclu productivu.
· Nel rellenu na desembocadura de la Ría d'Aboño, nestos momentos en litixu ente los Ayuntamientos de Carreño y Xixón, ta en proyeutu la costruición d'una nueva central llétrica de ciclu combináu.
· Somos el conceyu que más direutamente sufre les consecuencies de l'ampliación del Puertu del Musel, tanto poles propies obres como polos planes de futuru de les istalaciones portuaries, que tienen como finalidá aumentar la descarga de graneles sólidos con destino a les centrales térmiques.
· L'autoridá Portuaria tien la intención de desmontar L'Altu Aboño pa facer una zona de serviciu a les instalaciones portuaries, que podría contemplar una nueva central de Ciclu Combinao, afondando na degradación ambiental del valle d'Aboño.
El proyeutu pa construyir una planta Regasificadora nel puertu del Musel supón un grave riesgu pa los vecinos de Carreño, y lleva consigo la construcción d'alrodiu de 11 nueves centrales llétriques de ciclu combinao: 1 en La Perea, 2 en Corvera, 1 en Trubia, 2 n'El Musel, 2 en Llada, 2 en Sotu Ribera (ún d'ellos va inaugurase ya), y 1 n'Aboño a cuenta la regasificadora.

Estos altos niveles de contaminación faen que los índices d'enfermedaes en Carreño tean por riba d'otres zones, como demostró'l Centro Nacional d'Epidemioloxía del Institutu de Salú Carlos III, nel so estudiu publicáu amediaos del añu 2007. Nesti informe, demuéstrase que Carreño rexistra una de les mayores tases de mortalidá na mayoría de les enfermedaes estudiaes.

Dende UNIDÁ-Andecha Carreño non tamos d'alcuerdu con esta apuesta enerxética y con esti modelu económicu p'Asturies, un modelu económicu que crea mui poca riqueza, mui pocos puestos de trabayu, non crea emplegu entorno a estos grandes proyeutos enerxéticos, y que solo nos dexa n'Asturies la Contaminación, altos índices de mortalidá y d'enfermedaes, la degradación del paisaxe y la destrucción del texíu económicu tradicional.

Queremos tamién facer un llamamientu a tolos vecinos/es de Carreño pa qu'asistan a esta manifestación, que se convoca por propia iniciativa ciudadana, y que va celebrase en Xixón el próximu domingu día 20, a les 12:30, con salida de la Playa Poniente.

UNIDÁ-Andecha Carreño

El Martes 8 taba convocada una reunión de la Comisión de Seguimientu de les obres del Musel

UNIDÁ-Andecha Carreño abandona la Comisión de Siguimientu de les obres del puertu del Musel.

Esta Comisión formóse na llexislatura pasada, col fin de facer un siguimientu y plantegar de primera mano a los responsables de les obres d'ampliación del puertu del Musel, los problemes derivaos d'estes obres pa los vecinos/es de Carreño. Esta Comisión ta formada por representantes de los grupos políticos de Carreño, miembros de l'Autoridá Portuaria y representantes de la Unión Temporal d'Empreses (UTE) que tan llevando a cabu les obres.

Dende UNIDÁ-Andecha Carreño entendemos qu'esta Comisión nunca funcionó de manera agil ni fue efectiva pa resolver los problemes derivaos de les obres. Entendemos que se ta usando como un llaváu de cara, pa facer ver a los vecinos que s'atienden les sos quexes, cuando non ye asina. Además, los representantes de l'Autoridá Portuaria y de la UTE nunca actuaron de manera trasparente, siempre escondieron parte de les sos intenciones y los sos proyeutos, y siempre callaron más coses de les qu'informaben.

Dende UNIDÁ-Andecha Carreño rechazamos que, colos problemes que tan enriba la mesa y que planteguen los vecinos, les AAVV y los propios grupos políticos de Carreño (atascos y accidentes na rotonda del empalme, vertidos a la mar, contaminación del aire, parques de carbones, suciedá y deterioru de les víes de comunicación, etc), l'axenda del aconceyamientu de güei non contempla una reunión pa tratar estos temes, sino que se llimita a un recorridu pol centru de recepción, la proyeición d'un videu, la visita al puertu de Xixón y la comida nun restaurante. Poro, non queremos ser cómplices de la UTE nin de l'Autoridá Portuaria pa siguir buscando disculpes a unos problemes que non acaben de resolvese y qu'afeuten direutamente a los vecinos/es de Carreño, y ye por ello polo qu'abandonamos la Comisión de siguimientu de les Obres.

Tamién queremos reiterar el nuestru rechazu al proyeutu d'ampliación del puertu del Musel y a los proyeutos que l'acompañen (Regasificadora, desmonte del Altu Aboño, nuevos Ciclos Combinaos, …), poles graves consecuencies económiques, ambientales, ecolóxiques pa Carreño y p'Asturies, y por apostar por un modelu económicu caducu, que nos aleja de polítiques de desarrollu sostenible, y que destruye más riqueza que la que xenera.

Santi Artime. Conceyal en Carreño d'UNIDÁ-Andecha CArreño

Suspensión de los actos de fin de campaña

7 de Marzu
La Xunta Coordinadora de la Coalición UNIDÁ decidió a primer hora d’esta tarde suspender los actos de campaña previstos pal día de güei, con motivu del atentáu que-y costó la vida al ex conceyal Isaias Carrasco.UNIDÁ condena esti atentáu, qu’espresa un intentu de facer política refugable dafechu para nós, como refuga cualquier clase de violencia.

+ Más información en la web de UNIDÁ

Agenda electoral Jueves 6 de marzo

12.30 horas (Uviéu)
PRESENTACIÓN MANIFIESTO DE APOYO A UNIDÁ.
Los principales candidatos de la coalición presentan el manifiesto de apoyo a las candidaturas de UNIDÁ al Congreso y al Senado que han firmado 100 personas representativas de la cultura asturiana, de los movimientos sociales y de sectores profesionales.
Lugar: Sede de UNIDÁ en Uviéu (Plaza de Riego, número 2, 1º centro)
11.00 horas (Uviéu)
Asistencia a la Concentración contra la línea Lada-Velilla
La cabeza de lista al Congreso Lali García, el número 1 al Senado, Ignaciu Llope, y el número 2 al Congreso acuden a la concentración contra la línea Lada-Velilla que se celebrará frente a la sede de presidencia del Principado.
13.30 horas (Uviéu)
Reparto de propaganda electoral en El Fontán.
Tras la presentación del manifiesto de apoyo, los candidatos repartirán propaganda electoral en el mercado de El Fontán (Uviéu).
19.30 horas (Xixón)
Asistencia a la Concentración de apoyo a los refugiados colombianos en Asturies
La cabeza de lista al Congreso Lali García, y el número 2 al Congreso, Faustino Zapico, acuden a la concentración convocada en la Plaza del Parchís (Xixón).

+ Más información en la web de UNIDÁ

Valoración d'UNIDÁ - Andecha Carreño a rechazu moción contra regasificadora de Xixón

El Plenu del Ayuntamientu de Carreño, na sesión celebrada ayer xueves 28 de Febreru, rechazó colos votos de PP, PSOE, IU (que s'abstuvo) y URAS, la Moción presentada por UNIDÁ-Andecha Carreño contra la construcción de la Regasificadora en el puerto de Xixón. Pola so parte, UNIDÁ-Andecha Carreño, que presentaba la Moción, y UICA dieron el so votu favorable a la Moción.

Tanto PP como PSOE non argumentaron les razones del so apoyu a la Regasificadora, simplemente se basaron en que ye UN proyeutu pol qu'apuesten y qu'apoyen los sos partíos a nivel Estatal, y qu'ellos non van lleva-yos la contraria. Pola so parte IU, con un interés electoral, abstúvose na votación y reconocieron que fueron ellos quienes reclamaron al gobiernu estatal axilizar esti proyeutu p'Asturies.
Ye triste, qu'Asturies seya l'únicu País del Estáu Español onde estos proyeutos xeneren siempre unanimidaes ente los 3 partíos con más presencia n'Asturies, tanto los que tan nel gobiernu como na oposición. Pero más estrañu ye l'apoyu que tamién recibe de los sindicatos mayoritarios d'Asturies.
Dende UNIDÁ-Andecha Carreño entendemos que ye un grave error poner los intereses de les cúpules de los sos partíos por enriba de los intereses de los vecinos de Carreño, que son quien colos sos votos los escoyeron como conceyales de Carreño. Dende UNIDÁ-Andecha Carreño, entendemos qu'estos partíos (PSOE, PP ya IU) demuestren la incapacidá pa defender a los vecinos de Carreño, la so dependencia y servilismu a los sos partíos y vuelven defraudanos como responsables municipales. Ye necesario que dende los Ayuntamientos, como istitución más averada y que tien que velar más direutamente pola seguridá y la salú de los ciudadanos, s'alerte sobre estos proyeutos y se rechacen, independientemente de la postura de cada partía a nivel rexonal o estatal.
Entendemos que tendríen que tomar exemplu de los conceyales n'otros conceyos, como'l casu de Morata de Tajuña, en Madrid, onde los conceyales de PSOE, PP ya IU lleven encerraos nel so Ayuntamientu dende'l día 22 d'esti mes, pa esixir que non se construya una central térmica nel so términu municipal, y que prometieron que non depondrán la so actitú hasta tener un compromisu por escritu de los tres partíos estatales (PP, PSOE ya IU).
Dende UNIDÁ-Andecha Carreño non tamos d'alcuerdu con esti modelu económicu d'Asturies, un modelu económicu que crea mui poca riqueza, mui pocos puestos de trabayu (solo los crea durante la construcción d'estes istalaciones, creando burbuxes d'emplegu), non crea emplegu entorno a estos grandes proyeutos enerxéticos, y que solo nos dexa n'Asturies contaminación, altos índices de mortalidá y d'enfermedaes, la degradación del paisaxe y la destrucción del texíu económicu tradicional. Y preguntámonos qué conceyu y qué calidá de vida quieren dexa-yos a les xeneraciones futures, cuando Asturies a día de güei ya tien una de les atmósferes más contaminaes de la Península.
Dende UNIDÁ-Andecha Carreño anunciamos que siguiremos trabayando pa evitar que'l proyeutu de la Regasificadora salga alantre, y ponga en grave peligru la seguridá y la salú de los vecinos y vecines de Carreño y d'Asturies.

Santi Artime. Conceyal d'UNIDÁ-Andecha Carreño

UNIDÁ entama la campaña electoral

UNIDÁ entamó la campaña el xueves a les 12 de la nueche cola tradicional pegada de cartelos nel centru de Xixón na cai Sanz Crespo (entrada de la Autopista Y). Durante les dos selmanes de campaña los candidatos y candidates de la coalición percorreran Asturies pa facer llegar a la ciudadanía les propuestes de cambiu pal país qu’UNIDÁ propón nestes elecciones.

Moción contra'l proyeutu d'istalación d'una Planta Regasificadora nel Puertu de Xixón

El día 13 de Febreru, UNIDÁ-Andecha Carreño presentó una moción na Comisión de Mediu Ambiente del Ayuntamientu Carreño, oponiéndose al proyeutu d'istalación d'una Planta Regasificadora nel Puertu de Xixón.
De momentu, na Comisión de Mediu Ambiente nengún grupu (escepto UNIDÁ-Andecha Carreño, que la rechaza totalmente y presenta la Moción) se posicionó sobre esti proyeutu, y van debatilo internamente dientro de cada organización política.
Esta Moción va debatise nel próximu plenu municipal que se va celebrar el próximu xueves, 28 de Febreru, y nella tolos grupos políticos van tener que posicionase con respeutu a esti proyeutu.
Na Moción, danse 12 argumentos (que podríen ser más) en contra d'esta planta regasificadora, que podríen resumise en:

1. Non cumple cola distancia de seguridá a núcleos habitaos.
2. Va aumentar la contaminación.
3. De llevase a cabu, aumentase la posibilidá de desmontar l'Altu Aboño.
4. Non xenera puestos de trabayu acordies cola inversión (370 millones d'Euros pa crear 50 puestos de trabayu)
5. Nunca nadie reclamó la so necesidá.
6. L'aporte de Gas Natural p'Asturies ta garantizao pol gasoductu Bilbao-Ferrol.
7. L'impautu visual va ser importante dende la costa central asturiana.
8. Supón nueves amenaces a los caladeros y a la flota pesquera de Carreño.
9. Ye un riesgu constante tener barcos metaneros averaos a la costa.
10. Fadríanos más dependientes de les importaciones de terceros países, toos ellos con problemes d'estabilidá política.
11. L'apuesta pol gas como xenerador enerxéticu torga'l desarrollu d'enerxíes renovables, infinites y non contaminantes.
12. Esta planta regasificadora ta xenerando un movimientu social, ecoloxista, políticu y vecinal a la so escontra importante.

Dende UNIDÁ-Andecha Carreño reiteramos el nuesu frontal rechazu a la istalación d'esta Planta Regasificadora y a los planes Enerxéticos p'Asturies. Asturies ya esporta 2/3 de la enerxía que produz y el Plan Enerxéticu plantega siguir afondando en convertir Asturies na Pila Enerxética del Estáu, quedándonos cola contaminación y la degradación del paisaxe, xenerando mui pocos puestos de trabayu y apostando por una actividá mui poco rentable económicamente. Además, la planta regasificadora impulsa la istalación de 8 a 10 nueves centrales de ciclu combinao, de nueves llinies elleútriques pa sacar la electricidá a la Meseta que destruye zones con alto valos ambiental.

Santi Artime. UNIDÁ-Andecha Carreño

AL ALCALDE-PRESIDENTE
DEL CONCEYU CARREÑO
Asuntu: Moción que se presenta pal so alderique y aprebación nel prósimu Plenu a cellebrar a fines de Febreru de 2008.
L'abaxo firmante, Conceyal d'UNIDÁ-Andecha Carreño d'esta Casa Conceyu, al amparu de los artículos 91.4 y 97.3 del Rial Decretu 2568/86 d'Organización, Furrulamientu y Réxime Xurídicu de les Corporaciones Llocales, tien l'honor de presentar la MOCIÓN que vien darréu pal so alderique y aprebación pol Plenu.

Esposición de motivos:

El Plan Enerxéticu Estatal plantega la construcción nel Puertu d'El Musel d'una planta Regasificadora, pa convertir el gas llíquidu que vien en barcos metaneros a temperatura mui baxa en gas natural, pal so usu en Centrales Eléctriques de Ciclu Combinao.
Les plantes Regasificadores tan catalogaes como instalaciones mui peligroses, al ser el gas llicuao un productu mui inflamable, col que se pueden producise incendios accidentales (el gas llicuao ta considerao l'esplosivu más potente dempués de la bomba atómica).

Teniendo en cuenta que:

1. El llugar onde va asitiase la planta regasificadora non cumple cola distancia de seguridá alredor d'estes instalaciones, que según los espertos tien que superar los tres kilómetros a cualquier nucleu habitáu. (la llexislación de 1977 del Estáu de California estableció una zona obligatoria de seguridá alredor de les terminales de GNL d'algo más de seis kilómetros). A corta distancia de la planta tenemos dellos núcleos de población como Xibares o Aboño en Carreño, además d'El Muselín, Xove, la Calzada y El Natahoyu. Amás, nos terrenos d'El Musel a menos de quinientos metros del futuru asitiamientu de la regasificadora alcuéntrense los depósitos de CLH, AGIP, Petróleos Asturianos y les bombones de Repsol Butanu, produciéndose un efeutu multiplicador en casu d'accidente.
2. La construcción d'esta planta Regasificadora va acompangao de la instalación de nueves Centrales de Ciclu Combinao, que van aumentar la contaminación de Carreño y d'Asturies, que ya figuren nos primeros puestos de contaminación atmosférica del Estáu. Además, Asturies ye un País que ya a día de güei produz más enerxía de la que consume (2/3 de la enerxía producida n'Asturies esportase a otros llugares), y les polítiques de desarrollu sostenible y el Protocolu de Kioto firmáu pol Gobiernu d'España falen de que la enerxía tien que producise cerca de los llugares de consumu, p'amenorgar los impautos del tresporte y les sos pérdides.
3. La construcción de la planta Regasificadora aumenta les posibilidaes de desmontar l'altu Aboño y d'asitiar nueva industria pesada y Ciclos Combinaos nesti llugar. L'Ayuntamientu Carreño ya se posicionó delles vegaes escontra'l proyeutu de desmonte del Altu Aboño.
4. La planta Regasificadora non xenera puestos de trabayu que xustifiquen la so instalación, teniendo en cuenta que pa una inversión estimada de 370 millones d'Euros (si non hai ampliaciones presupuestaries típiques d'estes obres), crearíense non más de 50 puestos de trabayu.
5. Nunca, nin les empreses nin el Gobiernu d'Asturies reclamaron la construcción d'una planta regasificadora, y solo se plantega esti proyeutu pa El Musel cuando por presión vecinal se rechaza una nueva regasificadora en Galicia.
6. L'aporte de gas natural p'Asturies ta garantizao gracies al gasoductu que va dende Bilbao hasta El Ferrol, y qu'anguaño ta duplicándose, asina como pol ramal que conecta con Lleón.
7. L'impautu visual de los grandes tanques d'almacenamientu (el tamañu de los alrodiu de diez tanques necesarios ye superior al de les Bombones de la Campa Torres) va ser importante dende la costa central asturiana, y n'especial dende Carreño.
8. L'actividá de la Regasificadora va suponer daños nel mediu marino y nos caladeros de pesca usaos pola flota de Carreño, pol aumentu del tráficu de grandes buques metaneros, pola necesidá d'aportar inxentes cantidaes d'agua marina p'aumentar la Temperatura del gas llicuao y pasalu a estáu gaseosu.
9. Ye un riesgu constante tener barcos metaneros averaos a la costa. Son una auténtica bomba flotante y por mor a les maniobres d'aproximación, atraque y descarga del gas suponen un riesgu entá más eleváu que la propia planta regasificadora. Enfrente la playa Xibares ta declarao pola Autoridá Portuaria d'El Musel como "zona de fondeamientu de barcos con mercancíes peligroses", polo que s'entiende que los barcos metaneros van esperar equí hasta qu'entren a Puertu.
10. Fadríanos más dependientes de les importaciones de terceros países, toos ellos con problemes d'estabilidá política. Asina, los principales abastecedores de gas al Estáu Español son: Arxelia col 45%, y en menor midía Nixeria, Qatar, Exipto, …, lo que da una idega del riesgu de depender d'esta fuente.
11. El desarrollu del usu de gas como base enerxética pal Estáu, poni más pilancos al futuru del carbón asturianu, que pasará a tener un papel testimonial na producción enerxética, representando agora solo un 30% del consumu d'Asturies. Por otru llau, los precios del gas tan subiendo al mesmu ritmu que los del petroleu, colo qu'esta dependencia del gas pa xenerar electricidá podría aumentar considerablemente la tarifa eléctrica. Amás, siguimos enfotaos en crear enerxía a partir de combustibles fósiles que son finitos, torgando'l desarrollu d'enerxíes renovables, infinites y non contaminantes.
12. El proyeutu de construcción d'esta planta regasificadora ta xenerando un movimientu social, ecoloxista, políticu y vecinal a la so escontra, que tien que ser tenío en cuenta polos políticos y poles alministraciones públiques.

Ello asina, UNIDÁ-Andecha Carreño somete pal so alderique y aprobación la MOCIÓN que vien darréu:

L'Ayuntamientu Carreño alcuerda:

1. Rechazar el proyéutu de'istalar una planta regasificadora nel Puertu del Musel.
2. Que se dea traslado d'esti alcuerdu a:
· Ministeriu de Mediu Ambiente
· Ministeriu d'Industria, Turismu y Comerciu.
· Autoridá Portuaria de Xixón
· Gobiernu del Principau d'Asturies

Candás, Carreño, 13 de Febreru de 2008

Matrix - Asturies. El Gobierno quier facer d'Asturies la pila d'España

Asturies la pila d'España. Resume de cuala ye la situación enerxética agora mesmu n'Asturies y como se nos quier facer la pila d'España.

Paraiso Industrial en Candás

El próximu Vienres 15 de Febreru, a les 20:00 h., nel Teatru Prendes, UNIDÁ - Andecha Carreño proyecta'l documental tituláu "PARAÍSO INDUSTRIAL".

L'actu contará cola presencia de Konchi Rodríguez (una de les direutores del proyeutu), quien esplicará cómo se fizo'l documental y resolverá les entrugues que se-y planteguen. Al final de la proyección podrá entamase un alderique ente tolos presentes.
Nesti documental, "Paraíso Industrial", afondase nes consecuencies p'Asturies del cambiu climáticu y la contaminación, esplícase l'impautu que van suponer p'Asturies los nuevos proyeutos enerxéticos planificaos: Puertu del Musel, Regasificadora, centrales de Ciclu Combináu, Parques Eólicos, presa de Caliao, etc, y dexase nel aire la gran paradoxa que supón el poder conxugar una imaxen d'ASTURIES, PARAÍSU NATURAL cola permisividá hacia la especulación industrial. Tamién se fai un repasu del movimientu social, ecoloxista y vecinal que rechaza estos planes y ta intentado parar estos proyeutos p'Asturies.
Dende UNIDÁ-Andecha Carreño queremos facer estensiva la invitación a tolos vecinos y vecines.
Blog del documental Paraiso Industrial
Trailer:

Se inicia la recogida de firmes contra la planta gas de Xixón