Unidá Nacionalista Asturiana considera imprescindible incluir a les Asociaciones del Conceyu na Sociedá Mista de Turismu que propón el PSOE

Sede de SOFECA

Ante les noticies apaecides na prensa en boca del conceyal de Deportes, nes que s’informa que l’equipu Gobiernu del Conceyu Carreño finalmente va entamar la creación d’una Sociedá Mista de Turismu, con participación de la Cámara de Comerciu, de la Unión de Comerciantes y d’Hosteleros, como tamién proponía’l PP, queremos reiterar públicamente la pitición d'UNA d'incluyir a les Asociaciones del Conceyu nesa entidá.
Dende UNIDÁ NACIONALISTA ASTURIANA siempre, dende la liquidación de SOFECA, apostamos y reclamamos al Equipu Gobiernu del Conceyu Carreñu la creación d’una asociación pa organizar les fiestes y festexos de Candás, a la que denominábamos CONSEYU DE FESTEXOS. Y siempre diximos que pal so funcionamientu, se tomara como modelu organizativu y participativu'l desarrolláu por SOFECA durante gran parte de la so esistencia.
Los últimos gobiernos municipales lleven demostrando dende va años una mala planificación organizativa y una preocupante falta d’idegues, que tan provocando que les fiestes de Candás vayan cada vegada a menos. Entendemos que non se puede dexar la organización de les fiestes esclusivamente nel Ayuntamientu y nos cargos políticos, como non lo tán nel restu de parroquies, que faen recayer la organización de les fiestes nes AAVV y Comisiones de Festexos.
En Carreño tenemos la suerte de tener un texíu d’asociaciones empobinaes a la difusión de la cultura y el deporte como pocos conceyos, y tenemos qu’aprovechar esa bayura pa que’l trabayu d’estes asociaciones se coordine y sirva de motor turísticu y económicu del conceyu. Entendemos que ye nelles en quien hai qu’enfotase pa impulsar y recuperar les fiestes, y creemos qu’hai que da-yos voz y capacidá de decisión a la hora de diseñar les actividaes.
Dende UNIDÁ NACIONALISTA ASTURIANA creemos que ye imprescindible que nesa entidá (llámese Sociedá Mista de Turismu como propón el PSOE, o Conseyu de Festexos como propón UNA), participen con una implicación direuta, comprometida y con capacidá de decisión les diferentes asociaciones culturales, deportives, xuveniles, etc, del conceyu, que tienen que ser les promotores, como en parte ya son, de les actividaes. Poro, volvemos pidir públicamente al equipu gobiernu qu'incluya a les asociaciones del conceyu n’igualdá de condiciones col restu d’entidaes participantes.
Creemos además que ye desacertao querer comparalo cola Sociedá Mista de Turismu de Xixón, nin tamos dimpuestos a que se convierta nuna copia. Non vamos permitir qu’esta nueva entidá se convierta nun comederu de perres, s'use pa colocar en puestos a determinades persones pa pagar favores políticos, o sirva pa querer controlar les actividaes que se faigan y que se propongan dende les diferentes asociaciones.

UNIDÁ NACIONALISTA ASTURIANA

L’ACTUAL CARGU PÚBLICU D’UNIDÁ NACIONALISTA ASTURIANA EN CARREÑO, CEDE’L SO PUESTU DE CONCEYAL

Santi Artime, conceyal d’UNIDÁ NACIONALISTA ASTURIANA nel Ayuntamientu Carreño, cede’l so puestu de cargu públicu. A partir d’agora, tal y como se decidió nun aconceyamientu internu, la representación d’UNA na Casa Conceyu pasará a manes de Xuan Rodríguez, músicu Candasín y miembru históricu de la izquierda nacionaliega en Carreño. Nel plenu del mes de Mayu llevaráse a efeutu la renuncia, y nel plenu de Xunu tomará posesión el nuevu cargu, tal y como marca la llei.
Este cese de funciones del actual cargu públicu, non tien que vese como algo traumáticu, nin significa nengún tipu de problema internu, o discrepancia coles decisiones o plantegamientos que defiende’l partio pa Carreño y p’Asturies. Trátase simplemente de la sustitución, pactada y alcordada fai 2 años, de la persona que-y tocó dende fai 6 años tar representando a UNIDÁ NACIONALISTA ASTURIANA na Casa Conceyu. Ye algo que dende la nuesa organización política vemos como “normal”, que busca que más xente vinculao a la Izquierda Nacionaliega en Carreño garre experiencia nel furrulamientu de la Casa Conceyu, qu’aspiramos a gobernar.
N’UNIDÁ NACIONALISTA ASTURIANA entendemos la política de forma mui diferente a como la ven y la entienden los partíos políticos al usu, que s’aferren al sillón como si-yos fuera la vida nello, y consideren el cargu como algo que-yos correspuende en propiedá. La nuesa visión de la política non ye esa. Vémoslo como un serviciu sin contrapartides que se presta a los vecinos y vecines, y onde les decisiones y postures se fixen asambleariamente nos Conceyos Internos del partio, y onde’l conceyal ye’l meru transmisor d'eses propuestes y esos plantegamientos de tol’l partio.
Esta renuncia al cargu por parte de Santi Artime, en nengún momentu significa una desvinculación de la vida política y de l’actividá del partío, y dexa la puerta totalmente abierta a que nes próximes elleiciones, en dientro dos años, vuelva dir na candidatura d’UNIDÁ NACIONALISTA ASTURIANA, nel puestu de la llista que se decida. Además, y hasta entós, va siguir vinculao al partio y a la política municipal, ayudando y asistiendo al nuevu cargu públicu, y trabayando dende la izquierda ecoloxista y nacionaliega en beneficio de Carreño, d’Asturies y de los sos ciudadanos y ciudadanes.
Pa finar, dicir que la sustitución del actual Conceyal non significa un cambiu nos plantegamientos, nes propuestes o na forma de trabayar y de rellacionase colos vecinos y vecines, coles asociaciones o col restu de partíos políticos representaos na Casa Conceyu tal y como llevamos faciendo dende fai 6 años, y queremos ratificar públicamente tolos compromisos y postures mantenides hasta agora.

Santi Artime – Xuan Rodríguez
UNIDÁ NACIONALISTA ASTURIANA

Rede Eléctrica Española proyecta una nueva LLINIA Eléctrica por Carreño, ante la pasividá del Gobiernu de PSOE-IU

Central térmica d'Aboño

El gobiernu del Estáu, a traviés de Rede Eléctrica Española, proyecta una nueva Llinia Eléctrica de 400.000 V por Carreño, que conecte Carrió, cola futura Subestación de Nueva Tabiella (Gozón). Esti proyeutu apaez contemplao na propuesta de Planificación de los sectores d’Electricidá y Gas 2008-2016 y de Desarrollu de les Redes de Transporte, a traviés del Ministeriu d’Industria, Turismu y Comerciu por mediu de la Subdireición Xeneral de Planificación Enerxética. L'Estudiu d’Impautu Ambiental fue traslladao a la Comisión de Medio Ambiente del 6 de Mayu, onde que se decidieron presentar alegaciones.

La nueva Llinia Eléctrica, de más de 10 Km de llargo, atravesará les parroquies de Carrió, Albandi, Priendes y Perlora, y ta sin decidir si se prollongará a traviés d’El Pieloro o de Llorgozana hasta llegar a Nueva Tabiella, pa la que se proponen 3 emplazamientos, toos nel sur del Conceyu Gozón y con rechazu de colectivos ecoloxistes y vecinales, y de UNIDÁ NACIONALISTA ASTURIANA. El primer d’ellos ente’l barriu d'Iboya y Vioño, el segundu en Cardo, cerca de Perdones, y el terceru al llau del embalse de la Granda, ente San Zabornín y El Posadorio.


Tamién se contempla la construcción d’una nueva Subestación eléctrica en Carrió, al Este de la ya esistente, y que comprenderá una parque eléctrico de 400.000 V con una estensión aproximada de 4 Hectaries.


Esta nueva llinia eléctrica, asina como la nueva Subestación, provocarán un nuevu impautu al paisaxe de Carreño, dañará numberoses tierres agrícoles y afeutará gravemente a les condiciones de vida de munchos vecinos y vecines, afectades ya en gran midida pola contaminación y les instalaciones industriales. Además, esta nueva llinia eléctrica bien a sumase a les tamién proyectades o ya esistentes de Carrió-Nalón, Soto Ribera-Trasona Granda-Tabiella, Carrió-Costa Verde y Trasona-Sotu Ribera-Uxu.


Dende UNIDÁ NACIONALISTA ASTURIANA rechazamos frontalmente este proyeutu, que ye consecuencia de la necesidá d'evacuar la electricidá que se va xenerar cola Central de Ciclu de Combinao Puertu de Xixón, que se pretende instalar a la salida de la Ría d’Aboño. Y rechazamos totalmente los planes del Gobiernu d’Asturies (PSOE-IU) de convertir esti País nel xenerador eléctricu del Estáu, cuando ye una actividá que non xenera riqueza nin puestos de trabayu y sí nos dexa degradación del paisaxe, destrucción del texío económicu tradicional, y grandes niveles de contaminación y enfermedaes vinculades a esa contaminación. Hai que recordar que n’Asturies hai a día de güei, proyectades o en construcción, una Regasificadora y ente 8 y 10 centrales de Ciclu Combinao. Rechazamos totalmente qu’Asturies se convierta na PILA del Estáu.


Dende UNIDÁ NACIONALISTA ASTURIANA tamién queremos denunciar la pasividá del equipu gobiernu de PSOE-IU de Carreño, que se llimiten a facer alegaciones menores a la subestación, al trazao de la LLINIA y a la tramitación alministrativa, pero que nunca s’impliquen nin van al fondu del tema, rechazando frontalmente estos proyeutos nin impidiendo la so tramitación. Y vense condicionaos y ataos porque son los sos mesmos partíos políticos qu’ellos representen quienes lo proponen dende Uviéu o Madrid, y porque ellos mesmos tan d’alcuerdo cola especialización enerxética d’Asturies.





Santi Artime
UNIDÁ NACIONALISTA ASTURIANA

UNIDÁ NACIONALISTA PIDE AL EQUIPU GOBIERNU QUENON CONVIERTA'l MANANTIAL DE L’ABLANAL NUN VERTEDERU

UNIDÁ NACIONALISTA ASTURIANA vuelve pidir al equipu gobiernu del Ayuntamientu Carreño, esta vez públicamente, que lleve a cabo la llimpieza y rexeneración de la parcela onde se sitúa'l manantial de l’Ablanal, n'El Regueral. Dende fai unos años, esti espaciu vien usándose por parte del Ayuntamientu como almacén y depósitu de materiales d’obra sobrantes (adoquines, tuberíes, etc) y d’elementos del mobiliariu urbano retiraos (faroles, xuegos infantiles, la escalera de vixilancia del socorrista, etc).
A día de güei, presenta un aspeutu de total abandonu, y la imaxen qu'ofrez non ye xustificable de nenguna manera. Dende UNIDÁ NACIONALISTA ASTURIANA, entrugámonos ¿con qué llexitimidá va l’ayuntamientu requerir a un constructor o a un vecín que llimpie les sos parceles, si'l propiu ayuntamientu da esti exemplu? Además, y dende fai unos años, ta en vigor un protocolu européu sobre calidá de les agües subterranies, nel que se fixen les condiciones que tienen que cumplir les captaciones d’agua potable.
A traviés d’un conxuntu de recomendaciones, créense 3 perímetros de protección de los manantiales, de más a menos restrictivu según tea más cerca o más lloñe del pozu de captación, pa evitar posibles filtraciones y afecciones a la calidá del agua que puedan llevar a la contaminación d’estes agües subterranies. Fíxase un Perímetru de Protección Inmediata (Zona 1 alredor del pozo), nel que s'impidirá l’accesu públicu.
Fíxase un Perímetru de Protección Cercana (Zona 2 o de prevención), nel que se prohiben o llimiten actividaes como la construcción, industria, depósitu de materiales, etc. Y un Perímetru de Protección Allexada (zona 3 o esterior) nel que se restrinxen determinaos usos. La quexa pola situación del Manantial de L’Ablanal ya fue trasladada al equipu gobiernu en Comisión de Mediu Ambiente fai más de 3 meses, sin qu’hasta agora surtiera efeutu nin s’adecentara la parcela y se retirasen los materiales allí depositaos, polo que facemos agora la quexa públicamente. Creemos además que la situación d’esta propiedá municipal ye un exemplu más de la dexadez del equipu gobiernu y del abandonu que sufren otres munches zones del conceyu.
Dende UNIDÁ NACIONALISTA ASTURIANA si nun plazu razonable non se soluciona esta situación y s’adecenta la parcela, verémonos obligaos a presentar la correspondiente denuncia na Conseyería de Mediu Ambiente, que podría finar cola orden de llimpieza acompañao d’una sanción económica. Esperamos non tener que llegar a la denuncia alministrativa, y que l’equipu gobiernu proceda a la llimpieza y adecentamientu de la parcela onde s’asitia'l Manantial de L’Ablanal. Además, y teniendo en cuenta que la parcela tien una superficie de 8000 m2, y que la restricción d’accesu a la Zona 1 ye d’alrodiu de 20 metros alredor del pozu de captación, proponemos retirar el cierre perimetral actual de tola superficie propiedá del ayuntamientu, y colocalo onde diz la llei y onde ye necesario, ganando asina una superficie d’usu públicu d’unos 5000 m2.
Proponemos tamién la creación d’una zona d’usu y esparcimientu públicu, cola rexeneración y consolidación de la vexetación esistente, la recuperación de la fonte L’Ablanal que brota nun estremu de la parcela, y la eliminación del bardial anexu al camín, que xenera problemes de visibilidá y riesgos nel tráficu.

Santi Artime. UNIDÁ NACIONALISTA ASTURIANA

UNIDÁ NACIONALISTA ASTURIANA denuncia públicamente’l robu de la SGAE a los Conceyos y a los vecinos/es

Dende UNIDÁ NACIONALISTA ASTURIANA, tenemos l’oxetivu d’acercar y aclarar el furrulamientu de la Casa Conceyu, facilitando la transparencia y denunciando aquello que nos paez inxusto. Poro, queremos informar a los vecinos y vecines del Conceyu Carreño de los pagos obligatorios fechos a la Sociedá Xeneral d’Autores y Editores (SGAE), una organización privada, y sin embargu amparada y beneficiada pola llei.
L’Ayuntamientu Carreño, y poro, los vecinos y vecines de Carreño, pagaron direutamente a la SGAE durante l’añu 2008 un total de 14.114 € en conceutu de Derechos d’Autor, que se correspuenden a:
• Fiestes de la Sardina (Orquestes): 2.497 €
• Fiestes del Cristu (Orquestes y Conciertu de Merche): 5.524 €
• Certamen de “La Mina y La Mar”: 549 €
• Teatru Prendes (Cine, Teatru y Música): 5.544 €
El pagu de 2008 ye asemeyáu a los que se faen tolo años, que tan alredor los 15.000 €. Además, nel añu 2005, l’Ayuntamientu fizo frente a les deudes pendientes de 2001 a 2004 que tenía SOFECA cola SGAE, que supusieron otros 15.000 €, y que fueron una de les razones de la desapaición de la Sociedá de Festeyos de Carreño (SOFECA).
Dende UNIDÁ NACIONALISTA ASTURIANA, rechazamos totalmente la obligatoriedá de facer estos pagos a la SGAE y la propia esistencia d’esta organización privada, que diz defender y velar polos intereses de los autores, y que sirve pal enriquecimientu d’unos pocos. Ye verdá que ye necesario velar polos derechos de los Autores, pero que seya l’autor quien direutamente decida la cuantía de la compensación y quien la reciba integramente, sin tener que pasar por intermediarios.
Además, y dende l’aprobación del Canon Dixital, impulsao pol PSOE y aprobao en 2008 dientro la Llei de Propiedá Intelectual, l’Ayuntamientu tendrá que pagar indireutamente por esi Canon, qu'incrementa'l preciu de decenes de productos informáticos, con un sobrecoste por exemplu del 45% por un discu duru, más del 40% por soportes dixitales (CDs y DVDs), el 32% por una impresora, o’l 15% por un escáner. L’Ayuntamientu Carreño (tan incluyíos los telecentros y aldees dixitales) dispón de 108 ordenadores, 48 impresores, 19 escaner, 18 videos/DVD, 8 Fotocopiadores y 3 Fax, además d’un númberu indeterminao de soportes dixitales (CDs y DVDs). Toos estos elementos son renovaos periódicamente pol Ayuntamientu, y dende l’aplicación d’esti Canon Dixital, tanto pa les alministraciones como pa los consumidores, sufrieron un aumentu de preciu significativu.
Esti ye un Canon creao pa facer frente a la piratería y a les copies illegales, que grava a los ciudadanos por ser sospechosos de facer copies, y obliga a la Casa Conceyu a pagar por una actividá que tien llegalmente prohibida. Ye tan ridículu como si Tráficu cobra un impuestu poles infraciones col coche que podamos facer nun futuru. Ye una llei qu’además tuvo un ampliu rechazu social, y que sin embargu foi aprobada en contra de la opinión de la mayoría de los ciudadanos y ciudadanes, y dende UNA esiximos la so derogación.
Por otru llau, el 22 de Xineru dende UNIDÁ NACIONALISTA ASTURIANA solicitamos al Equipu Gobiernu a avanzar na implantación del Software Llibre nos sistemes informáticos de la Casa Conceyu. A día de güei, cada ordenador que se compra lleva un recargo de 90€ pola instalación de Microsoft, en conceutu de llicencia. El Software Llibre ye totalmente gratis, además de non existir virus informáticos, y ye totalmente válidu pal usu domésticu y nes alministraciones. A día de güei, y con esti sistema, l’Ayuntamientu hubiera gastao 9.000 € menos pola compra de los 108 ordenadores.
Santi Artime
UNIDÁ NACIONALISTA ASTURIANA
Entrevista a Santi Artime sobre los pagos a la SGAE

UNIDÁ NACIONALISTA ASTURIANA VALORA LA SENTENCIA DE L’AUDIENCIA NACIONAL SOBRE’L DESMONTE DEL ALTO ABOÑO

Dende UNIDÁ NACIONALISTA ASTURIANA mostrámonos sorprendíos ante la sentencia de l’Audiencia Nacional que resuelve la petición del Ayuntamientu Carreño de paralizar les obres de desmonte del Altu Aboño, y muestra'l so rotundu rechazu a los argumentos daos polos maxistraos de l’Audiencia Nacional. Entendemos además, que con esti precedente, ye difícil esperar una sentencia favorable a Carreño nel otru Recursu pendiente de resolución.
Esta sentencia qu’UNIDÁ NACIONALISTA ASTURIANA conoz agora, ye la rempuesta a una de les dos partes de que se compón el Recursu presentáu por Carreño ante l’Audiencia Nacional:
PRIMERA PARTE: Por un llau l’Ayuntamientu Interpón Recursu Contenciosu-Alministrativu ante la Orden del Ministeriu de Fomentu, de 1 de Febreru de 2008, pola que s'aprueba la modificación del Plan d’Usu de los Espacios Portuarios de Xixón-Musel, y frente a la desestimación del recursu presentáu contra la Resolución de 20 d’Ochobre de 2007 de la Secretaría Xeneral pa la Prevención de la Contaminación y el Cambiu Climáticu, pola que se decide non someter a Estudiu d’Impautu Ambiental el Plan d’Usu de los Espacios Portuarios. Esto ye, l’Ayuntamientu considera que p’ampliar la zona portuaria al Alto Aboño, tien que facese previamente un Estudiu d’Impautu Ambiental.
SEGUNDA PARTE: Por otru llau, y visto que’l primer recursu puede tardar años en resolvese, l’Ayuntamientu solicita la suspensión de les Obres de Desmonte del Altu Aboño hasta que non se resuelva’l primer recursu. De non ser asina y d’entamar les obres, l’Altu Aboño puede tar desmontáu antes de que l’Audiencia Nacional resuelva la petición de Carreño de facer un Estudiu d’Impautu Ambiental. Sobre esta segunda parte del Recursu, ye sobre’l que l’Audiencia Nacional emite sentencia agora, rechazando los argumentos de Carreño y rechazando la petición de paralizar les obres.

Dende UNIDÁ NACIONALISTA ASTURIANA mostramos el nuesu total desacuerdu cola sentencia y sopelexamos:
• L’Audiencia Nacional, cuando diz que “la suspensión de la Obra podría ocasionar un seriu quebranto al interés xeneral, dao que se trata d’un Plan afectante a una actuación con gran proyeición de futuru”, usa argumentos políticos pa emitir el so veredictu, polo que la so supuesta imparcialidá queda nuevamente n’entredichu. Non sabemos por qué hai interés xeneral, cuando a día de güei nin el Gobiernu nin l’Autoridá Portuaria quieren dicir qué van colocar nel Altu Aboño que ye imprescindible pal furrulamientu del Puertu.
• Vemos como l’Audiencia Nacional apoya xurídicamente los intereses centralistes del Estáu, dexando desamparaos y desprotexíos a los vecinos y vecines y a los conceyos pequeños frente a los intereses de los más poderosos. Esto queda demostrao cuando diz que los intereses “defendíos pola Abogacía del Estáu y l’Ayuntamientu de Xixón son de mayor envergadura que los invocaos por Carreño”.
• Diz además que “la suspensión de la Orden supondría la conxestión del Puertu en curtiu plazu, lo qu’acarrea perxuicios económicos al Conceyu de Xixón”. Dende UNA entendemos qu’esto non pasaría si Xixón y l’Autoridá Portuaria reservaren los sos terrenos pa l'actividá Industrial Portuaria, cuando ta destinándolos a colocar actividaes non vinculaes al Puertu (Regasificadora, Central de Ciclu Combinao, Acuariu, Talasoterapia, Urbanizaciones, etc, y agora falen d’un Muséu Naval). Queremos además recordar que cola obra d’ampliación del Puertu del Musel, la esplanada que se va construir nel mar ye equivalente a 300 campos de fútbol. Si con esto non ye bastante, pueden renunciar a la construcción d'instalaciones tan innecesaries, peligroses y contaminantes como la Regasificadora o la Central de Ciclu Combinao.
• L’Audiencia Nacional non asume como argumentu válidu los daños ambientales argumentaos por Carreño, y coloca en primer llugar los argumentos de tipu económicu invocaos por Xixón. Diz además, que los materiales procedentes del desmonte podríen depositase agora na Obra d’Ampliación del Musel, y asina “evitar un importante problema futuru pa desaloxar el material frutu del desmonte y urbanización”. Con esto demuéstrase que'l principal oxetu de desmontar l’Altu Aboño ye la necesidá de material de rellenu pa construir la inmensa esplanada contemplada nel Proyeutu d’Ampliación del Musel.
• Con esta sentencia además, cuando diz que “frente a los intereses de Carreño álcense los intereses del Ayuntamientu de Xixón”, l’Audiencia Nacional fai competente al Ayuntamientu de Xixón pa ordenar y planificar el territoriu del Conceyu de Carreño. Esto ye, Xixón ya non solo se puede facer cola mayor parte de los terrenos ganaos al mar nel rellenu d’Aboño, qu'históricamente siempre fueron de Carreño, sinón qu’agora una sentencia tamién diz que Xixón ye competente pa ordenar y planificar l’Alto Aboño, que ta indiscutiblemente dientro de Carreño.
Dende UNIDÁ NACIONALISTA ASTURIANA queremos reiteranos na oposición a la obra d’Ampliación del Puertu del Musel por razones sociales, ambientales y económiques, como llevamos faciendo dende l’añu 2002, y reiteramos la oposición al Desmonte del Altu Aboño. Creemos además que mientres tolos grupos políticos de Carreño temos claramente a la escontra del Desmonte, l’Ayuntamientu tien mecanismos pa siguir impidiéndolo, y asina vamos esixílo al equipu gobiernu y al resto de grupos políticos.

Santi Artime
UNIDÁ NACIONALISTA ASTURIANA
TEXTO DE LA SENTENCIA

UNIDÁ Nacionalista Asturiana pide aclarar en que va cambiar el proyeutu pa la Ciudá de Vacaciones de Perlora

NOTA DE PRENSA Y NOTICIA DE PRENSA AL RESPECTO
A mediaos del mes d’Avientu, la empresa axudicataria del concursu convocao pol principáu d’Asturies pa la esplotación de la Ciudá de Vacaciones de Perlora, presentó nel Ayuntamientu Carreño una propuesta pa modificar el planeamientu urbanísticu, mediante l’aprobación d’un Plan Especial de Reforma Interior (PERI). Dende UNIDÁ NACIONALISTA ASTURIANA entendemos que ye necesario dalo a conocer a los vecinos y AVV, pa que toos puedan participar y plantegar les sos propuestes y la so opinión, favoreciendo’l debate y facilitando la participación ciudadana.
Con esti PERI propuestu, plantéguense una serie de modificaciones con respeutu al proyeutu inicial que se presentó públicamente en Candás n’Avientu de 2007. Estes modificaciones, delles motivaes por recomendaciones del Principáu, podríen resumise en:
- Cambiu d’ubicación de la Zona Deportiva, acercándola a les víes del tren, pa reservar l’usu habitacional y residencial (Villes) na zona más alloñada del ruíu provocao pol pasu los trenes de FEVE. Esta zona deportiva diría agora situada ente los actuales campos de petanca y el parque infantil, pararelu a les víes.
- Una “Zona d’Usu Hosteleru-Terciariu de Densidá Alta” paralela a les víes, una parte nel actual campu de minigolf, y otra al Oeste de la Playa Carranques. Aquí diríen situaes l’edificiu alministrativu y de recepción y control, y l’Hotel.
- Una “Zona d’Usu Hosteleru-Terciariu de Densidá Media” na que diríen asitiaos los apartamentos y los usos compatibles (tiendes, pubs, etc), situao alrodiu la glorieta Asturies, frente al comedor y al parque infantil.
- Una “Zona d’Usu Hosteleru-Terciariu de Densidá Baxa”, onde diríen situaes les Villes, y que coincidiría cola zona onde ta l’actual campu de Fútbol y les pistes de tenis, hasta l'Este de la Playa Güelgues.
- Un nuevu vial con aparcamientos, paralelu a les víes y que coneute direutamente los accesos a la Ciudá de Vacaciones cola playa Carranques.
A la vista del documentu presentao (PERI), que propón un cambiu urbanísticu p'axustalo a los intereses de la empresa concesionaries y a les recomendaciones del Principáu, dende UNIDÁ NACIONALISTA ASTURIANA sopelexamos:
- El documentu ye mui incompletu y mui inconcretu, y non esplica en detalle en qué consisten los cambios reales col respeutu al proyeutu inicial nin cuál va ser el resultao definitivu. Al nuesu entender, esti non ye un documentu alministrativa nin Téunicamente válidu pa l’Aprobación d’un PERI, y hai que completalu coles actuaciones concretes.
- Non especifica si se van mantener les istalaciones hosteleres y hoteleres (Hotel de 4 estrelles, SPA, talasoterapia, restaurantes temáticos, etc), si van respetase y restaurase los xales (Villes) que tean en buenes condiciones, o si van desapaecer parte de les istalaciones deportives (pistes de tenis, de baloncestu, fútbol, rocódromu, piscina ximnasiu, etc) tal y como se plantega nel proyeutu presentao en Candás fai un añu.
- Non ta claro si va siguir manteniéndose l’actual equilibriu ente zones verdes y edificades. El nuesu votu (como ya diximos en Mayu de 2008), va ser contrariu a aumentar el porcentaxe de superficie edificada, que ta situao pa la CV de Perlora nes Normes Subsidiaries de Carreño nun 0.25 m2/m2. Recordamos qu’en Mayu de 2008 la empresa axudicataria presentó un documentu onde los téunicos municipales consideraben que la edificabilidá aumentaba a 0.45 m2/m2. Entendemos que'l proyeutu tien qu'axustase a la normativa urbanística municipal y a les proteiciones que fixa’l Plan d’Ordenación del Llitoral Asturianu (POLA), y vamos esixir qu’asina seya
- A la vista del documentu, non s’asegura la continuidá de los aparcamientos soterraos, que paez qu’agora sustitúyense por aparcamientos en superficie xunto a les víes del tren nel nuevu vial d’accesu a Carranques, col impautu visual que xenera.
- Si ya les víes planteguen una incomunicación ente la C.V. y la Parroquia Perlora, cola acumulación d’edificaciones paraleles al trazáu de FEVE como se propón nesti PERI (carretera y aparcamientos, istalaciones deportives, edificios alministrativos y de recepción, etc) formase una nueva barrera y fai menos permeables los accesos a la CV. Dende UNA entendemos qu’habría que tender a soterrar les vies en tol trayeutu, y facilitar la comunicación direuta ente l’interior y l’esterior del recintu.
Poro, dende UNIDÁ NACIONALISTA ASTURIANA, y tras estudiar el documentu presentao, entendemos que ye necesario que’l Principáu y les empreses concreten muncho más el proyeutu, y non vamos aprobar nengún cambiu urbanísticu sin tener tola información necesaria, y sin tener el proyeutu definitivu pal so estudiu, y propondremos al restu de grupos políticos que se posiciones de la mesma forma. Creemos que ye la única forma de que Carreño pueda siguir teniendo algo que dicir y pueda influir nel resultao final de la Ciudá de Vacaciones de Perlora, que siempre foi un motor turísticu y económicu pal conceyu. Nesti sentíu, recordamos que tolos grupos políticos de Carreño solicitaron formar parte de la Mesa de Xestión de la Ciudá de Vacaciones (formada por Gobiernu del Principáu y Empreses axudicataries) y el Gobiernu del Principáu impidió y negóse a que Carreño tuviera representao nesa mesa, onde se tomen les decisiones referentes al proyeutu y al futuru de Perlora.
Por otru llau, dende UNIDÁ NACIONALISTA ASTURIANA siguimos creyendo que ‘l proyeutu pa Perlora ta incompletu si non contempla la rexeneración de les playes de Güelgues y Carranques y la recuperación del patrimoniu cultural, natural, históricu ya etnográficu, polo que siguiremos reclamando que’l proyeutu incluya l’estudiu de los yacimientos del Puertu Balleneru d’Entrellusa, la Cueva l’Alborá y la Torre d’Aviao.
Dende UNIDÁ NACIONALISTA ASTURIANA siempre tuvimos a la escontra del procesu de privatización encubierta que plantegaba'l Gobiernu del PSOE d’Asturies pa la Ciudá de Vacaciones de Perlora. Siempre entendimos que’l futuru de la C.V. de Perlora pasaba por una correcta xestión, que non se taba faciendo nos caberos años, pero una xestión que siempre permaneciere en manes públiques. Agora que la obra ya ta concedida a los empresarios privaos y el gobiernu del PSOE privatizó la xestión, esperamos qu’esti proyeutu sirva de revulsivu pal seutor turísticu en Carreño, y sirva de contrapesu a la preponderancia que tien la industria na economía del Conceyu. Esperamos tamién, qu’a la hora de facer les contrataciones de personal tengan prioridá los vecinos del Conceyu, que se siga permitiendo l’accesu públicu y llibre a tol recintu, y que se respete la tipoloxía de les edificaciones.
Esti proyeutu, que ye interesante, que tien que ser compatible col entornu y que va crear un númberu importante de puestos de trabayu, sigue retrasándose, colos perxuicios que supón pal seutor turísticu y pa tolos vecinos/es de Carreño. El plazu dao pa finar les obres nun entamu yera pal añu 2010, pero pola falta de capacidá del Principáu pa xestionalo, y la falta de comunicación col Ayuntamientu Carreño, difícilmente tará terminao entes de 2012.
Queremos tamién recordar, qu'UNA sigue reclamando una reunión ente los grupos políticos y el conseyeru d’Economía, Sr. Rabanal p’aclarar toos estos aspeutos. Esta pitición ya fue tramitada pol Alcalde de Carreño fai 3 meses y el Sr Rabanal niégase a fixar esi aconceyamientu pa esplicar la situación, los cambios concretos y los plazos del proyeutu pa la CV de Perlora.

Santi Artime
UNIDÁ NACIONALISTA ASTURIANA

Denuncia sobre la situación del monte Areo

Dende UNIDÁ NACIONALISTA ASTURIANA damos por cumplíu l'oxetivu de la denuncia presentada pola situación del Área Recreativa del Monte Areo, puesto que l'equipu gobiernu, con una rapidez a la que non tamos avezaos (solo 5 díes dempués de presentar la quexa), repara y repón tolos deterioros. La situación del Monte Areo fai 15 díes yera llamentable, como se puede ver nes semeyes que presentamos al ayuntamientu. UNIDÁ NACIONALISTA ASTURIANA nunca miente nin mentirá a los sos vecinos. La prueba ta en que l'Ayuntamientu reconoz que repón "cinco tableros de las mesas rotos, ocho bancos, siete parrillas altas, once parrillas bajas y 35 papeleras". Si esto lo repón, ta claro que ye que faltaba o taba roto. Dende UNIDÁ NACIONALISTA ASTURIANA siguiremos defendiendo'l Monte Areo, trabayando dende la Casa Conceyu pa recuperalo ambientalmente y esixendo completar les escavaciones arqueolóxiques (de los 36 dólmenes catalogaos, namás que 8 tan escavaos y estudiaos).
Artículo de La Nueva España

UNIDÁ NACIONALISTA ASTURIANA APOYARÁ LES ORDENANCES FISCALES

UNIDÁ NACIONALISTA ASTURIANA, tras ser aceptaes les sos propuestes, aprobará les Ordenances Fiscales pal 2009.
Dende UNIDÁ NACIONALISTA ASTURIANA, entendemos que les Ordenances Fiscales non tienen que ser un meru documentu de recaudación d’impuestos, sinón que tienen que buscar oxetivos y sirvir como instrumentu pa meyorar el Conceyu. Ta claro qu’a naide-y presta pagar impuestos, pero son necesarios pa crear una sociedá más igualitaria y xusta, y pa repartir la riqueza de los que más tienen.
Durante estos años, UNIDÁ NACIONALISTA ASTURIANA propuso y consiguió que s’aprobaren delles medides:
Bonificaciones fiscales p'aquelles viviendes qu'instalen o tengan instalaos sistemes pal aprovechamientu lléutricu de la enerxía solar p'autoconsumo (bonificaciones nel IBI y nel ICIO).
Bonificaciones fiscales p'aquelles obres o instalaciones que favorezan les condiciones d’habitabilidá de los discapacitaos (bonificaciones nel ICIO).
Bonificaciones del 90% del IBI pa les viviendes con enerxía solar.
Bonificaciones fiscales nel IBI pa les cooperatives agraries qu’existan o s’instalen en Carreño.
Propusimos crear nuevos tramos según consumo na tasa d’abastecimientu d’agua, diferenciando entre consumo pa uso ganadero, industrial o domésticu.
Bonificaciones fiscales nel ICIO p'aquelles obres de rehabilitación d’edificios con interés social, cultural, históricu o artísticu que lo xustifiquen.
Bonificaciones na viñeta pa los coches que tengan menor incidencia na contaminación, como los lléutricos o híbridos.
Bonificación nel ICIO pa obres de construcción de foses séptiques.
Bonificación nel ICIO pa obres d’aforru enerxéticu o d’instalación d’enerxíes renovables. etc
Pal añu 2009, UNIDÁ NACIONALISTA ASTURIANA fizo delles propuestes que busquen siguir meyorando les Ordenances Fiscales de Carreño, y tras la negociación col restu de grupos políticos, finalmente aceutáronse les siguientes:
 Propónse una bonificación nel IBI pa families numberoses, d’un un 30% pa viviendes con valor catastral menor a 25.000 €, y del 20% pa viendes con valor catastral ente 25.000 y 40.000 €.
 Propónse rebaxar nun 25% l'incrementu del IPC aplicable a la Tasa Fiscal 301 (conocía como Viñeta). Esto ye, mientres l’IPC aplicable al restu d’impuestos y tases ye del 4.5, pal casu la viñeta l’incrementu ye un 25% menor, del 3.375. Este ye un impuestu direutu aplicable a los ciudadanos, y del qu'únicamente los vecinos y vecines se va beneficiar.
 Respeutu a la Tasa Verde, dende los servicios económicos de la Casa Conceyu, entienden qu'agora non hai fixaos los mecanismos pa poder aplicala. Puestos además en contautu col Ayuntamientu gallegu de Cerceda, únicu qu’hasta agora la tien en vigor, esplícasenos que nunca la pudieron cobrar, y que s’encuentren el pleitos llegales coles empreses por esta tasa. Dende UNIDÁ NACIONALISTA ASTURIANA trabayaremos na Casa Conceyu pa poder aplicala l’añu qu’entra, y esixiremos al equipu gobiernu que cree los mecanismos necesarios pa poder aplicala: cálculu de güeya ecolóxica (Huella Ecológica) del conceyu, asesoramientu llegal, cálculos de costes del control de les emisiones, cálculu de daños a cultivos, etc. Mientres tanto, propusimos y fue aprobao, aplicar un incrementu del 40% pal IBI Especial, que se cobra al Puertu de Xixón y a la Térmica d’Aboño. Esto supón que la recaudación aplicable a esti impuestu pa estes empreses aumenta en 115.000 €, que puede dir destinao a los mesmos oxetivos pa los que diba destinao la Tasa Verde, como ye meyorar el mediu Ambiente y la calidá de vida de los vecinos.
Poro, tras ser aceutaes les nuestres propuestes, UNIDÁ NACIONALISTA ASTURIANA va apoyar la propuesta d'Ordenances Fiscales pal añu 2009 presentada pol equipu gobiernu, y qu’amiesta estes propuestes.
Santi Artime. UNIDÁ NACIONALISTA ASTURIANA

UNIDÁ NACIONALISTA ASTURIANA apoya’l recursu n’Audiencia Nacional y la suspensión de les obre de Desmonte Altu Aboño

Dende UNIDÁ NACIONALISTA ASTURIANA, apoyamos el Recursu ante l’Audiencia Nacional y apoyamos tamién la suspensión de les obres mientres esti recursu non se resuelva xudicialmente, y queremos reiteranos na oposición a la obra d’Ampliación del Puertu del Musel por razones sociales, ambientales y económiques, como llevamos faciendo dende l’añu 2002, y reiteramos la oposición al desmonte del Altu Aboño.
Queremos tamién, como ya ficimos nos medios de comunicación, pidir equí, públicamente dende UNIDÁ NACIONALISTA, la destitución de Menéndez Rexach como presidente de l’Autoridá Portuaria de Xixón pol proyeutu d’Ampliación del puertu del Musel tal como ta contemplao, pola so nefasta xestión, pol intentu de desmonte del Altu Aboño en contra de los plantegamientos de Carreño, pol intentu d’engañu a los vecinos y vecines, y pol pocu respetu que tien ante esti recursu llegal plantegao dende Carreño. Entendemos que l'Autoridá Portuaria demuestra mui pocu espíritu democráticu y mui pocu respeutu pola xusticia, polos representantes públicos de Carreño y polos propios vecinos y vecines.
Por nuestra parte, vamos llegar hasta’l final, y creemos que sí se puede parar el desmonte y la destrucción del Altu Aboño si dende Carreño tolos grupos políticos nos mantenemos na oposición frontal al proyeutu, y confiamos en que'l Recursu se resuelva favorablemente a los intereses de Carreño, porque según los xuristes de la Casa Conceyu y la Mancomunidá Cabu Peñes, hai razones pa ello.
UNIDÁ NACIONALISTA ASTURIANA

UNIDÁ NACIONALISTA ASTURIANA OPÓNSE A l'AMPLIACIÓN DE LA ESPLANACIÓN DE TUDELA VEGUÍN

Dende UNIDÁ NACIONALISTA ASTURIANA oponémonos al proyeutu p’ampliar la superficie d’esplanación solicitada por Tudela Veguín, S.A., que ya fue entamada nel añu 2006 nos terrenos averaos a la propia fábrica. Esta llicencia d’esplanación concedía fai 2 años provocó un gran rechazu ente los vecinos d’Albandi y Carrió, y supón que la zona industrial d’Aboño siga creciendo y medrando hacia l’Oeste. A día de güei, l'AVV de Xibares tien presentao un contencioso por esti tema, que sigue sin resolvese.
El proyeutu en sí ye una ampliación del proyeutu de Payares de 2005, pa facer una esplanación con voladures nos terrenos de Tudela Veguín, averaos a los que ya tienen concedía la llicencia. Compriende una superficie de 45.000 m2, con un volumen de desmonte de 320.180 m3, de los qu'una parte importante pueden usase na esplanada d’El Musel.
Dende UNIDÁ NACIONALISTA ASTURIANA camentamos que l’ampliación de la llicencia d’esplanación que se solicita al ayuntamientu, ye un desmonte encubierto del Altu d’Aboño, cuyu principal interés y fin, tamién ye consiguir material de rellenu pa la obra d’ampliación del puertu del Musel. Esto vien a ratifícalo'l que Tudela Veguín, nel documentu que presenta, en nengún momentu xustifica’l proyeutu, nin por una necesidá de la fábrica d'ampliar les instalaciones, nin la negativa a conceder la llicencia supón que se vaya impidir nenguna inversión o comprometer puestos de trabayu. Solamente se xustifica pol “interés social”, que ye mui discutible. Toos sabemos que finalmente, dempués de sacar el material pa rellenar el Musel, esti espacio será ocupao p'almacenar nueves montañes de mineral.
Finalmente, dende UNIDÁ NACIONALISTA ASTURIANA, proponemos que se faiga l'alternativa 0 que plantega nel Estudiu d’Impautu Ambiental, que ye “non facer l'ampliación de la esplanación”, y negarémonos na Comisión de Mediu Ambiente y d’Urbanismu a conceder la llicencia pal proyeutu.

SEGUNDU CERTAME DE CURTIOS EN LLINGUA ASTURIANA DE LA MANCOMUNIDÁ D’EL CABU PEÑES

Ye oxetu del concursu’l facer un curtiu en Llingua Asturiana (de temática llibre) con un llargor d’unos quince minutos recoyendo amás una referencia de la propia Mancomunidá y del Serviciu de Normalización Llingüística asina como de la Conseyería de Cultura y Turismu como muérganos o entidaes qu’entamen y/o sofiten esti certame.
La entrega de la documentación pue facese en mano (nes oficines de la Mancomunidá con señes: C/Braulio Busto, 2 – 2u, 33430 Candás – Carreño; tfnu. 985872421, n’horariu d’atención al públicu de 9:00 a 14:00 hores), por persona interpuesta, o per corréu certificáu y con acuse recibu (paquete postal exprés), en tal casu tien de remitise per fax al nu 985 87 25 22, dientro del plazu presentación, el resguardu del mentáu unviu.
Ha presentase nuna carpeta o sobre col títulu: “Segundu Certame de Curtios en Llingua Asturiana de la Mancomunidá Cabu Peñes” asina como’l nomatu del autor. Dientro del sobre ha axuntase un sobre zarráu colos datos del autor (nome, apellíos, señes, teléfonu y nomatu) y títulu del trabayu. La fecha tope pa entregar esti material sedrá’l 1 d’avientu de 2008 (llunes) a les 14:00 hores.
Pa más información pue consultar llamando al Serviciu de Normalización Llingüística de la Mancomunidá n’horariu de 10:00 a 14:00 hores y nos tfnos. 985872406 (martes y xueves) y 985883532 (llunes, miércoles y vienres) o per corréu electrónicu a la dirección: mmcp.llingua@asturnet.es
Les BASES del CONCURSU puen consultase na páxina web de la Mancomunidá Cabu Peñes: www.faronorte.org asina como n’otres páxines y medios afayadizos.

Convocatoria por una República Asturiana n’Uviéu

La federación de partíos Unidá Nacionalista Asturiana (UNA) vien de facer un llamáu a la participación de la so militancia na manifestación convocada pol coleutivu Ensame República Asturiana, en defensa de los valores repúblicanos, socialistes y soberanistes p’Asturies, el próximu xueves a les 20:00 hores n’Uviéu.
D’esta miente, la so estaya de mocedá, UNA-Mocedá, va participar activamente na convocatoria y amás d’ello valora mui positivamente’l so calter unitariu. Poro, pide a toles asturianes y asturianos, especialmente a la xente mozo, que amuese’l so sofitu asistiendo a la manifestación prevista’l día enantes de los “Premios Príncipe de Asturias”.

La Tasa Verde pa Carreño y les propuestes d'Unidá Nacionalista Asturiana pa les Ordenances Fiscales

L'Ayuntamientu Carreño ta nestes selmanes nel procesu d'ellaboración y revisión de los Impuestos y les Ordenances Fiscales pal añu 2009. En les propuestes d'Unidá Nacionalista Asturiana destaca la Tasa Verde, esto ye, una tasa con vocación ambiental sobre les emisiones de CO2 y SO2

Dende UNIDÁ NACIONALISTA ASTURIANA, entendemos que les Ordenances Fiscales non tienen que ser un meru documentu de recaudación d'impuestos, sinón que tienen que buscar oxetivos y sirvir como instrumentu pa meyorar el Conceyu. Y UNA felicitase de que tolos años se desarrolle un debate d'esti tipu, qu'hasta la llegada de la izquierda nacionaliega a la Casa Conceyu non se daba, y les propuestes llimitábense a subides lliniales, pero nunca proponiendo intencionalidaes y oxetivos. Ta claro qu'a naide-y presta pagar impuestos, pero son necesarios pa crear una sociedá más igualitaria y xusta, y pa repartir la riqueza de los que más tienen. Nesti sen, como dende fai 6 años, presentamos a la Comisión d'Hacienda nueves propuestes cola intención de dar más carga social y mediambiental a la política fiscal de Carreño.
Durante estos años, UNIDÁ NACIONALISTA ASTURIANA propuso y consiguió que s'aprobaren delles medides como bonificaciones nel IBI y nel ICIO rellacionaes cola instalación d'enerxía renovable o obres d'aprovechamientu enerxéticu; nuevos tramos según el consumo na Tasa d'Abastecimientu d'Agua, diferenciando entre consumo pa uso ganadero, industrial o domésticu; bonificaciones pa obres de rehabilitación d'edificios catalogaos; bonificaciones p'aquelles obres o instalaciones que favorezan les condiciones d'habitabilidá de los discapacitaos; bonificaciones na "viñeta" pa los vehículos que contaminen menos; bonificaciones pola instalación de foses séptiques y depuradores, bonificaciones pa les empreses por facer contratos de llarga duración, etc.

Pal añu 2009, UNIDÁ NACIONALISTA ASTURIANA fai tres propuestes, buscando oxetivos mediambientales y sociales:

- En xeneral, proponemos una subida que nel casu de les Tases ye del últimu IPC Interañal conocío (4.5%), y pa los Impuestos una subida del 75% del últimu IPC Interañal conocío (3,4%). - Proponemos, nel casu de families numberoses, una bonificación nel IBI del 25% pa la vivienda habitual y con un valor catastral menor de 60.000 €, fixando tamién un máximu d'ingresos y de patrimoniu pa los beneficiarios.

- Proponemos grabar nel Impuestu del IBI a les viviendes vacies o desocupades, pa facilitar que se saquen al mercáu, bien en venta o alquiler, y consiguir facilitar l'accesu a la vivienda. Entendemos que ye con propuestes d'esti tipu como se puede entamar a solucionar el problema de vivienda que sufrimos n'Asturies y Carreño. Entendemos que non ye lóxico qu'en Candás existan más de 700 viviendes "vacies o desocupades" según fuentes del propio Principáu, y la única solución que se plantega ye construyir más. Exemplos como'l de Lluanco, onde dempués de facer 6.000 viviendes el preciu non baxó, la xente mozo sigue sin poder independizase, y la mayoría son usades como 2ª residencia 2 meses al añu, demuéstramos que siguir construyendo non ye'l camín pa solucionar el problema de vivienda d'esti País.

- Proponemos, como idega más novedosa, la creación d'una TASA VERDE. Esto ye, una tasa con vocación ambiental, qu'a día de güei solamente t'aprobada nun ayuntamientu d'A Coruña, anque más ayuntamientos ya tan plantegándose creala. Esta tasa sería un instrumentu fiscal aplicable a les grandes empreses, qu'incide sobre'l coste que supón pa la Casa Conceyu la llabor alministrativa d'inspección, control y autorización pa continuar l'actividá xeneradora d'emisiones de CO2 y SO2, y pa ello, fixaríase una cuota por tonelada emitida al añu de CO2 y SO2. Creemos qu'hai que facer real la máxima de "el que contamina, paga", y paga polo menos el coste real de sufrir esa contaminación. D'esta manera la Casa Conceyu podría emplegar más fondos pa meyorar el mediu ambiente y la calidá de vida, imputables y recaudables a les empreses a través d'esa tasa. Por exemplu, recaudaría dineru pol coste que-y supón la creación de la Oficina Ambiental, pol coste de la compra d'aparatos mididores de la contaminación, pola puesta a disposición de los vecinos de los medios materiales y llegales pa meyorar la calidá de vida, pola creación de barreres vexetales y reforestación, o pol coste que supondrá, si se lleva a cabo, crear un nuevu emplazamientu pa los vecinos más afeutaos pola actividá industrial.

Dende UNIDÁ NACIONALISTA ASTURIANA, entendemos qu'en Carreño esisten problemes por resolver lo suficientemente graves como pa proponer esos oxetivos, estos cambios y esta nueva Tasa Verde: problemes de vivienda, especulación urbanística, pérdida de patrimoniu, necesidaes sociales, necesidaes educatives, o problemes mediambientales, y con unes ordenances fiscales non se van iguar de sópitu, pero tienen que, polo menos, espresar una intencionalidá pa resolver estos problemes. Creemos que solamente fai falta la voluntá política pa llevales a cabu.

UNIDÁ NACIONALISTA ASTURIANA respeutu a la sovención de COGERSA

Con respeutu a la polémica creada ente les AAVV d'Ambás y Tamón pola sovención que tolos años concede COGERSA, dende UNIDÁ NACIONALISTA ASTURIANA sopelexamos:
Dende fai 10 años, COGERSA concede sovenciones (nesti añu de 54.000 €) a cada una de les parroquies llimítrofes col vertederu, hasta un total de 4, correspondientes a los conceyos de Xixón, Llanera, Corvera y Carreño. Hasta l'añu 2006, la sovención que daba COGERSA yera únicamente pa la parroquia d'Ambás, y con esta sovención los vecinos proponíen les obres y les inversiones que se teníen que facer. A partir del añu 2007, COGERSA incluye na sovención tamién a la parroquia de Tamón, sin aumentar l'importe y sin especificar cómo se tien que repartir nin qué porcentaxe ye pa caúna de les AAVV. A partir d'esi momentu, Ambás niégase a renunciar a una parte, y Tamón esixe'l 50% de la sovención.
Dende que se crea'l problema nel añu 2007, UNIDÁ NACIONALISTA ASTURIANA xunto col resto de partíos políticos del Ayuntamientu Carreño, vien esixendo a COGERSA qu'amplíe al doble la sovención que concede en Carreño, pa qu'Ambás non pierda dineru, y pa que Tamón reciba una sovención igual a la del restu de parroquies. A día de güei siguimos esixendo que COGERSA amplíe la sovención pa que tanto Ambás como Tamón reciban lo mesmo que reciben el restu de parroquies afectaes d'otros conceyos.
Dende UNIDÁ NACIONALISTA ASTURIANA comprendemos totalmente la postura de les dos AAVV, tanto la d'Ambás, que non quier perder dineru, como la de Tamón, que reclama lo qu'entiende que ye suyo. Nesti casu, la función del ayuntamientu ye únicamente facilitar a l'AVV la fiscalización de les factures, axilizar la contratación y facer un siguimientu de les obres. Entendemos qu'esti ye un problema que crea y que tien que resolver COGERSA, aumentando la sovención o indicando cuánto dineru ye pa cada parroquia. La mayor dificultá pa repartir el dineru y tomar una decisión ta nes propies condiciones que pon COGERSA, qu'esixe que los vecinos de les dos parroquies dean el visto bueno a les obres que s'executen con cargu a la sovención. Si cualquiera de les dos asociaciones se niega a aceptar el repartu o les actuaciones, la sovención quedaría paralizada. Poro, l'Ayuntamientu tien les manes atades mientres que non haya un alcuerdu de les dos Asociaciones Vecinales, o COGERSA amplíe la sovención. Si l'Ayuntamientu decide repartila al 50%, y Ambás se niega, paralizaríase la sovención. Por otru llau, si l'Ayuntamientu decide que seya íntegramente p'Ambás, y Tamón non lo aceuta, la sovención tamién quedaría paralizada.
La postura D'UNIDÁ NACIONALISTA ASTURIANA ye la mesma que fai un añu: siguir esixendo que se duplique la sovención, y mientres tanto que la Casa Conceyu siga almacenándola hasta que COGERSA especifique cómo hai que repartila, o hasta que les AAVV d'Ambás y de Tamón, se pongan d'alcuerdu. Otra posibilidá, anque esto podría suponer la cancelación de la sovención, ye devolvela y que COGERSA la xestione direutamente colos vecinos.
Pa finar, tamién queremos denunciar esta estratexa de COGERSA d'enfrentar a los vecinos. Si los vecinos tan engarraos pola llimosna que supón la sovención, estos non van organizase pa esixir garantíes ambientales y controles nel vertederu, nin van esixir medides de seguridá pol tráficu de camiones nos accesos, nin van siquiera parase a plantegar un debate sobre la idoniedá de la Incineradora que se pretende costruir, y que va empeorar más tovía les condiciones de vida de los vecinos averaos al vertederu y de tol área central asturianu, y a la qu'UNIDÁ NACIONALISTA ASTURIANA s'opón xunto con otros munchos colectivos ecoloxistes y vecinales.

UNIDÁ NACIONALISTA ASTURIANA de CARREÑO