L'Ayuntamientu Carreño, a propuesta d'UNIDÁ-Andecha Carreño, convocará beques d'investigación pa completar l'estudiu de la toponimia menor del Conceyu

L'Ayuntamientu Carreño, a propuesta d'UNIDÁ-Andecha Carreño, convocará beques d'investigación pa completar l'estudiu de la toponimia menor del Conceyu, en collaboración cola Academia de la Llingua Asturiana.
Esti proyeutu propuestu por UNIDÁ-Andecha Carreño cuenta cola implicación del Conceyal de Cultura, y foi aprobáu na Comisión de Cultura del 17 de Xineru por tolos grupos políticos. Inicialmente, y en collaboración cola Academia de la Llingua Asturiana, l'Ayuntamientu convocará estes beques pa facer los trabayos d'investigación, y será l'Academia quien los vaya publicando. Al final d'esti procesu, y colos trabayos de toles parroquies completaos, l'Ayuntamientu recopilará y editará un llibru con tola toponimia menor del Conceyu.
Esta propuesta trata de recuperar y evitar que se pierdan los nomes tradicionales de llugar asturianos: nomes d'accidentes xeográficos, montes, praos, cases, ríos, fontes, etc, y pretende rescatar la sabiduría popular y les denominaciones tradicionales que durante sieglos foron emplegaes polos vecinos y vecines de Carreño. Les denominaciones van acompangaes d'una curtia descripción de caúna d'elles, gracies a les informaciones de bonos falantes y conocedores de la xeografía.
D'esta mena, y con esta propuesta, nesta llexislatura completaráse la recopilación de los nomes de llugar asturianos de les parroquies del Conceyu. Esti proyeutu d'investigación toponímica foi entamáu nos años 90 pola Academia de la Llingua Asturiana, que ya tien investigaos y publicaos pa Carreño los estudios de les parroquies de Tamón, Ambás, El Valle y Candás, polo que les beques diríen dirixíes a les 8 parroquies que tienen pendiente l'estudiu.
A día de güei, l'Academia de la Llingua Asturiana tien publicáu l'estudiu toponímicu d'unes 125 parroquies de les 1000 qu'aproximadamente tien Asturies. Carreño convertiríase, xunto con Amieva, nel primer conceyu que completa l'estudiu de la toponimia menor.
Dende UNIDÁ-Andecha Carreño entendemos que ye un estudiu que non se puede dilatar más nel tiempu, ya que cada añu que pasa van perdiéndose más denominaciones tradicionales, por un llau pola desapaición de les persones que les conocen y les aprendieron por tradición oral de los sos antepasaos, y por otru llau pola desapaición de la forma de vida rural y en relación direuta cola naturaleza.
Na mayoría les vegaes, les denominaciones tradicionales recueyen la hestoria y la descripción de los llugares, y la perdida d'estos topónimos significa la imposibilidá d'entender históricamente'l so orixen. Asina, por exemplu un llugar denomináu Noval, posiblemente indique'l nome d'una "tierra qu'acaba de cultivase o con viñes recién plantaes", o un llugar denomináu El Cuetu refiérese a un "cerru o una colina peñascosa".
Dende UNIDÁ-Andecha Carreño siguiremos trabayando por recuperar, normalizar y dignificar la Llingua Asturiana, como'l mayor y más importante patrimoniu que tenemos los/es asturianos/es, y la más peculiar de les señes d'identidá d'Asturies.

Santi Artime. UNIDÁ-Andecha Carreño

UNIDÁ-ANDECHA CARREÑO PIDE RECUPERAR EL PATRIMONIU HISTÓRICU Y CULTURAL DE LA CIUDÁ DE VACACIONES DE PERLORA

Dende UNIDÁ-Andecha Carreño, ya nel añu 2004 tuvimos a la escontra del procesu de privatización encubierta que plantegaba'l Gobiernu del PSOE d'Asturies pa la Ciudá de Vacaciones de Perlora. Siempre entendimos que'l futuru de la C.V. de Perlora pasaba por una correcta xestión, que non se taba faciendo nos caberos años, pero una xestión que siempre permaneciere en manes públiques.

Opusímonos al derribo del edificiu Jacobo Campuzano, como máximu esponente d'una arquitectura de corte rexonalista, que se dio n'Asturies a mediaos del sieglu XX, y del que los informes de los téunicos del Principáu falaben en tou momentu d'una rehabilitación conservando la estructura, y solo n'última opción, del derribo. Esta última opción foi la única que contempló la Conseyería de Cultura del Principáu, que ya incluyó un añu antes una partida nos presupuestos pa esi "derribo" cuando non taben fechos siquiera esos informes téunicos.

Criticamos la postura y l'actitú del Principáu pa colos trabayadores de la C.V. de Perlora, poco dialogante al negase la Conseya Ana Rosa Migoya a recibir al Comité d'Empresa de los trabayadores y a falar con ellos, y por tenelos durante muncho tiempu pendientes d'un destín del que lo desconocíen tou, del que non se-yos aclaraba nada, y que sirvió pa enfrentar a los trabayadores de Perlora colos trabayadores de les instalaciones onde diben dir destinaos.

Pero agora que'l mal ya ta fecho, agora que la obra ya ta concedida a los empresarios privaos y el gobiernu del PSOE tien tomada la decisión de privatizar la xestión, agora que los trabayadores tan destinaos n'otros puestos, y agora que l'edificiu Jacobo Campuzano ya ta valtao y non tien remedio, dende UNIDÁ-Andecha Carreño queremos proponer idegues y cambeos al proyeutu inicial pa la Ciudá de Vacaciones de Perlora.

Esperamos qu'esti proyeutu sirva de revulsivu pal seutor turísticu en Carreño, y sirva de contrapesu a la preponderancia que tien la industria na economía del Conceyu.

Esperamos tamién, qu'a la hora de facer les contrataciones de personal tengan prioridá los vecinos del Conceyu, que se siga permitiendo l'accesu públicu y llibre a tol recintu, se respete la tipoloxía de les edificaciones, y se contemple la recuperación de les playes y el patrimoniu cultural y históricu de tol complexu, como asina pidimos al conseyeru Javier Rabanal cuando presentó'l proyeutu na Casa Conceyu.

Dende UNIDÁ-Andecha Carreño entendemos que'l proyeutu queda incompletu y coxu, si non se contempla la rexeneración de les playes, pero sobre tou de la playa de Güelgues, que durante los caberos años foi declarada Bandera Negra impidiéndose'l bañu nes sos agües, siendo una de les poques playes del Cantábricu que recibió esi catalogación. Habría que facer estudios de calidá sanitaria de l'arena d'esta playa y facer un saniamientu completu de la zona. Tamién ye necesario recuperar la lladera Oeste d'esta playa, onde dende fai años hai un argayu que fai peligrosu'l so usu y mengua la estensión de la propia playa.

Ye necesario tamién recuperar el patrimoniu cultural ya históricu que s'alcuentra na C.V. Perlora. El proyeutu, tal como se contempla na documentación que s'aportó, va disponer d'aloxamientos hoteleros, d'espacios deportivos, d'unes instalaciones pal fuelgu y el descansu, d'un mirador y una camín pa disfrutar del paisaxe, de restaurantes y servicios gastronómicos, etc, pero non apaez nengún proyeutu cultural asociao al complexu turísticu. Hasta'l día de güei, el PSOE ya nos demostró a tolos asturianos/es el so nulu interés y sensibilidá pa col patrimoniu cultural d'Asturies, que ta en xeneral nuna situación de completu abandonu. Esperamos que los empresarios que van a partir d'agora xestionar esti complexu y van facer les obres, tengan esa sensibilidá que xeneralmente s'echa en falta nes instituciones públiques. Poro, entendemos que la recuperación, estudiu y puesta en valor d'estos elementos históricos y culturales puede ayudar a complementar les posibilidaes que tien Perlora a la hora d'atraer a visitantes, y además costaría poco dineru cuando falamos d'una inversión alrodiu de 90 millones d'Euros. Poro, ye necesario que'l proyeutu contemple la recuperación de la Bolera que ta a la vera de la playa de Güelgues, y que se complete l'estudiu y la escavación de los yacimientos que tan alrodiu la playa Carranques, que puedan ampliar l'atractivu de la C.V. de Perlora. Estos yacimientos son el Puertu Balleneru d'Entrellusa y la Cueva l'Albora, al Oeste de la playa, y la Torre d'Aviao, asitiada al este d'esta playa, nel Picu'l Castiello, en Dormón.

Puertu Balleneru d'Entrellusa : habría que completar les investigaciones y escavaciones arqueolóxiques, y podría sirvir de complementu al futuru Muséu de la Pesca y la Industria Conservera de Candás, y el Muséu Marítimu de Lluanco. Ye facil además, que durante les obres na Ciudá de Vacaciones, apaezan restos d'edificaciones y ferramientes vinculaes a esti puertu pesqueru, asina como güesos de cetáceos.

Cueva L'Albora : anque difícilmente podría ser visitable, habría que completar les escavaciones arqueolóxiques y esponer los materiales encontraos.

Torre d'Aviao : supón un perfectu balcón sobre la mar, cuya vista abarca dende la punta la Baca hasta'l Cabu Torres. Habría que facer una llimpieza de la vexetación de la zona y completar les escavaciones arqueolóxiques de tol complexu, onde previsiblemente va apaecer la estructura de tola fortificación, y podría convertise nun elementu cultural de primer orden.

Santi Artime
Conceyal d'UNIDÁ-Andecha Carreño

Conceyu Abiertu d’UNIDÁ en Candás

El próximu 29 de xineru UNIDÁ va celebrar en Candás dende les 10.30 de la mañana un Conceyu Abiertu nel que se van evaluar la trayectoria hasta esti momentu y definir llínies de trabayu pa 2008.

UNIDÁ-Andecha Carreño rechaza la propuesta d'urbanización del paséu marítimu, presentada pola familia de los Pola

A mediaos del mes de Noviembre, aconceyaos l’arquitectu y el promotor d’esti proyeutu con miembros d’UNIDÁ-Andecha Carreño, trasladónos el so proyeutu de Reforma del paséu marítimu de Candás.

Esti proyeutu contempla baxar l'actual calzada 1 metro, soterrándola y xenerando aparcamientos; y desmontar el monte Fuxa, pa costruir a lo llargo del paséu marítimu un boulevar comercial y una llinia d’edificaciones y adosaos (dende Casa La Carioca hasta la subida pala Formiga por Perán), tralladando l’hotel Marsol dende’l so actual emplazamientu, pa colocalo n’horizontal a media lladera del monte.

Dende UNIDÁ-Andecha Carreño rechazamos totalmente esti proyeutu, por delles razones:

El beneficiu públicu pa los vecinos/es de Carreño non s’atopa por nengún llau (nel sieglu XXI, non ye válidu nin defendible eliminar una montaña col argumentu de que “da sombra a una playa”), y sin embargo toos podemos imaxinar la especulación enorme que significa un proyeutu urbanísticu d’esti calibre.
Traslada'l modelo urbanísticu y turísticu mediterraneu a la costa asturiana, un modelu destructivu, fracasáu y agotáu, que conduz a un turismu de mases, mui poco interesante dende criterios económicos y de sostenibilidá ambiental, y con gran impautu visual y paisaxísticu, que nos separa de los estándares de calidá turística que queremos pa Carreño. A 5 Km de Candás, na Urbanización de Peroño, tenemos un exemplu mui claru d’una actuación similar y que representa cuál ye’l modelu d’urbanismu que non queremos pa les nuestres costes.
Ye un proyeutu que ta a la escontra de la propia llei de Costes, y del POLA (Plan d’Ordenación del Llitoral Asturianu). Entendemos que ye un proyeutu que choca totalmente colos criterios urbanísticos qu'estes dos leyes proponen pa la costa Asturiana, y que polo tanto fáenlo inviable. Esperamos qu’estes leyes tan restrictives pa los vecinos, lo seyan tamién cuando se trata de grandes promotores y grandes proyeutos urbanísticos, y non pase como nel proyeutu de desmonte del Altu Aboño onde, pa facer viable'l proyeutu, s’anularon les protecciones qu’estes leyes proponen pa la costa.
Esti proyeutu non ye compatible col actual proyeutu de reforma del paséu marítimu, aceptáu por tolos grupos políticos del Ayuntamientu, cuyes obres ya tan llicitades y en marcha, y cuya paralización supondría grandes compensaciones económiques pa la empresa que ta actualmente faciendo estes obres de reforma, compensaciones que tendríemos que pagar con fondos públicos tolos asturianos y asturianes.
Rechazamos l’argumentu del bien públicu que supondría eliminar l’Hotel Marsol, puesto que l’impautu visual y paisaxísticu d’esta obra sería mayor que l’impautu que supón agora la presencia del Hotel. Recordamos que cuando fai 6 años se realizaron obres nel Hotel Marsol, esti edificiu taba fuera d’ordenación, y yera’l momentu d’entamar una negociación colos propietarios pa baxa-y l’altura o emplazalu n’otru llugar (como asina pidimos dende UNIDÁ-Andecha Carreño), y foi la negativa del equipu gobiernu del Ayuntamientu Carreño pa entamar estes negociaciones quien impidió buscar un nuevu emplazamientu pal hotel.
Hai maneres muncho menos agresives de consiguir aparcamientos nel paséu marítimu qu’una obra d’esta envergadura. Nel añu 2006, dende UNIDÁ-Andecha Carreño presentamos alegaciones a les obres del paséu marítimu pa consiguir aumentar l’aparcamientu de Palmera, cubriéndolo ya integrándolo na lladera del monte Fuxa. Les alegaciones presentámosles n’Abril de 2006, y tovía non recibimos contestación por parte del Delegáu del Gobiernu, anque’l proyeutu ya ta aprobáu y les obres tan llicitaes y en marcha.
Entendemos que l’aumentu de la zona de playa en Candás pasa por facer aportes d’arena a la playa de Palmera y por recuperar la Playa de Rebolleres, y non por destruir el monte Fuxa p'aumentar les hores de Sol na en Palmera.
Pa finar, dende UNIDÁ-Andecha Carreño preguntámonos si non será la necesidá d’acopio de materiales de rellenu pa la obra faraónica del Superpuertu del Musel, con grandes problemes técnicos y mediambientales pa conseguir esplotar canteres en zones cercanes, lo que lleva a plantegar el desmonte del Monte Fuxa, y a retirar millones de metros cúbicos de piedra de la lladera, qu’habría que depositar en dalgún llau, y que pola so cercanía diríen a les obres del Musel.

Santi Artime
Conceyal d’UNIDÁ-Andecha Carreño
Candás, 05 de Xineru de 2008