jueves, 10 de junio de 2010

INCINERACIÓN Nueva cacicada del Alcalde de Carreño

UNA en la pasada concentración contra la incineración celebrada el 6 de junio en El Náutico de Xixón, convocada por el "Conceyu escontra la Incineración" y la "Plataforma de Ganaderos y Afectados por la Incineradora". -Foto Asturias Verde-

Dende UNIDÁ NACIONALISTA ASTURIANA, refugamos la decisión unillateral del Alcalde Carreño, Ángel Riego, de non ceder un llocal onde puedan aconceyase los ganaderos y agricultores del conceyu contrarios a la costrucción d'una incineradora de residuos nos terrenos de COGERSA, según apaez publicao na prensa, el 8 de xunu.

La pitición de los ganaderos y agricultores de disponer d'un llocal onde aconceyase, foi tratada nuna comisión informativa cellebrada na Casa Conceyu el caberu mes de Mayu, na que s'alcordó que l'Ayuntamientu cedería un llocal y non s'opondría a que los ganaderos del conceyu s'organizasen pa tratar y aldericar sobre la costrucción de la incineradora. Agora, y con esta negativa, l'Alcalde ta comporándose como un cacique, que non respeta los alcuerdos y decisiones tomaes democráticamente pola mayoría de los grupos políticos, y que refuga toes les iniciatives y plantegamientos que non coinciden cola postura del so partíu políticu.

Dende UNIDÁ NACIONALISTA ASTURIANA esiximos al alcalde una rectificación y que ceda el llocal solicitao. Si esta rectificación non se produz, presentaremos una moción d'urxencia nel próximu plenu municipal, pa obligar al alcalde a la cesión del llocal. Asinamesmo, queremos traslladar tol nuesu apoyu a los ganaderos y agricultores, que se tan dando cuenta de los perxuicios que supondrá pa les sos esplotaciones ganaderes y agrícoles la construcción de la planta incineradora. Hay que recordar, que países como Francia prohiben la comercialización de la lleche y los productos agrícoles producíos nos 15 Km alrodiu d'una incineradora. Esto, d'aplicase n'Asturies, afeutaría direutamente a una de les fasteres con mayor implantación de ganaderíes de lleche (Carreño, Gozón, Corvera, Llanera, Xixón, Siero, etc), y supondría'l final d'un seutor mui maltratao y amenazao poles nefastes polítiques agrícoles y ganaderes, tanto les aplicaes nos caberos años, como tamién poles ya aprobaes y qu'entrarán en vigor prósimamente.

Dende UNIDÁ NACIONALISTA ASTURIANA siguimos y siguiremos oponiéndonos a la construcción de la incineradora de COGERSA, por razones ambientales, sociales, estratéxiques y económiques:

Ye falso que cola construcción de la incineradora non hay qu'ampliar o facer un nuevu vertederu de residuos. La incineración xenera residuos (cenizes tósiques), que suponen ente'l 20 y 30% del volumen inicial, y que siguen necesitando un vertederu. Cola incineradora non se pieslla l'alderique sobre'l vertederu, sinon que lo trasllada nel tiempu, a dientru de 15 o 20 años.

La construcción de la incineradora fae que les polítiques de reciclaxe de residuos pasen a un segundu llugar, contradiciendo lo que tolos muerganismos (estatales, europeos ya internacionales) aconseyen pal tratamientu la basoria: Reciclar, Reutilizar y Reducir. Tamién va implicar una subida del recibu que toos y toes pagamos pol tratamientu y recoyida de les basories, asina como la renuncia a la creyación d'un gran númberu de puestos de trabayu si s'apostara pol reciclaxe y la xestión sostenible de los residuos domésticos.

Asturies tien una de les peores calidaes del aire de tol estáu español, y sofrimos un de los mayores índices d'enfermedaes y morbilidá rellacionao cola contaminación almosférica. La inicneradora va suponer la lliberación a l'almósfera de dioxines, furanos y metales pesaos que son ellementos canceríxenos y qu'aumenten les patoloxíes asmátiques y les enfermedaes pulmonares, agravando esta situación.

Dende UNIDÁ NACIONALISTA ASTURIANA siguiremos refugando con toles nueses fuercies y recursos la costrucción de la incineradora.