miércoles, 28 de octubre de 2009

PROPUESTES UNIDÁ NACIONALISTA ASTURIANA PA LES ORDENANCES FISCALES PAL 2010

L’Ayuntamientu Carreño ta ellaborando y revisando los Impuestos y les Ordenances Fiscales pal añu 2010.

Dende UNIDÁ NACIONALISTA ASTURIANA, entendemos que les Ordenances Fiscales non tienen que ser un meru documentu de recaudación d’impuestos, sinón que tienen que buscar oxetivos y sirvir como instrumentu pa meyorar el Conceyu. UNA felicitase de que tolos años se desarrolle un debate d’esti tipu, qu'hasta la llegada de la izquierda nacionaliega a la Casa Conceyu non se daba, y les propuestes llimitábense a subides lliniales, pero nunca proponiendo intencionalidaes y oxetivos. Ta claro qu’a naide-y presta pagar impuestos, pero son necesarios pa crear una sociedá más igualitaria y xusta, y pa repartir la riqueza de los que más tienen. Nesti sen, como dende fai 7 años, presentamos a la Comisión de Facienda nueves propuestes cola intención de dar más carga social y mediambiental a la política fiscal de Carreño. Una de les formes más operatives ye fomentar una política fiscal basada nes bonificaciones.
Durante estos años, UNIDÁ NACIONALISTA ASTURIANA propuso y consiguió que s’aprobaren bonificaciones nel IBI y nel ICIO rellacionaes cola instalación d’enerxía renovable, obres d’aprovechamientu enerxéticu, o bonificaciones a families numberoses; nuevos tramos según el consumo na Tasa d’Abastecimientu d’Agua, diferenciando entre consumo pa uso ganadero, industrial o domésticu; bonificaciones pa obres de rehabilitación d’edificios catalogaos; bonificaciones p'aquelles obres o instalaciones que favorezan les condiciones d’habitabilidá de los discapacitaos; bonificaciones na “viñeta” pa los vehículos que contaminen menos; bonificaciones pola instalación de foses séptiques y depuradores, bonificaciones pa les empreses por facer contratos de llarga duración, etc.

Pal añu 2010, UNIDÁ NACIONALISTA ASTURIANA fai delles propuestes:
- En llinies xenerales, proponemos una conxelación de les Tases ya Impuestos, en base a que l'IPC interañal del mes d'Ochobre ye negativu.
- Proponemos una bonificación del 75% nel ICIO pa les obres de restauración de fachades, col oxetivu de favorecer a aquellos vecinos y vecines o comunidades de propietarios que pretendan adecentar les sos fachades. Esta bonificación vien a completar la ya aprobada en 2006, a propuesta d'UNA, onde se creaba una bonificación d'hasta'l 90% pa obres n'edificios catalogaos.
- Proponemos un aumentu al máximu de la Tasa por Llicencies de Movimientu de Tierres. Esta Tasa grava sobre tou a les canteres y a los constructores, y l'aumentu máximu llegal ye d'alrodiu del 10%.
- Proponemos un aumentu del 75 % na Ordenanza Fiscal 111 relativa a ocupación de suelu públicu por caxeros electrónicos. Comparándola con otros conceyos, la Tasa que paguen los bancos en Carreño por istalar caxeros electrónicos na cai ye mui baxa. Proponemos subila de los 115 € que paguen agora, hasta los 200 €.

UNIDÁ NACIONALISTA ASTURIANA

Manifiesto de UICA y UNA en defensa de los intereses de Carreño

MANIFIESTU DE UICA Y UNA EN DEFENSA DE LOS INTERESES DE CARREÑO

Les organizaciones UICA y UNA, ante les graves consecuencies pa Carreño de los planes venceyaos a l'ampliación del Musel entamades pol gobiernu del Principáu cola collaboración del resto grupos municipales de Carreño, queremos facer público el siguiente comunicau:

Tanto UNA como UICA desmárquense de la política collaboracionista de los grupos PSOE, PP e IU, los cuales concedieron licencia municipal pa destruir una sexta parte del alto aboño. Ante esti fecho, dase por rota la unidá d'aición que fasta'l momento había na Casa Conceyu y que tanto UICA como UNA sofitaben.
Camentamos que'l conceyu de Carreño ta indefenso, pola pasibidá y complicidá del gobierno municipal y del resto de grupos municipales, colos planes que'l gobiernu del Principáu quier facer en Carreño.
Dende UNA y UICA afitamos que nun podemos dir de la mano de partíos que mienten a la ciudadanía y supediten los intereses de les sos xerarquíes polítiques a los intereses del conceyu.
Refugamos l'ampliación del Musel tal y como ta contemplada y los proyeutos a los que va asociao (desmonte del Alto Aboño, construcción de Regasificadora, construcción de centrales de ciclo Combinao), poles graves consecuencies ambientales, estratéxiques, sociales y económiques p'Asturies, y onde'l conceyu de Carreño ye y va ser el más afeutao.
UICA y UNA xunen los sos esfuercios porque sentimos la necesidá del conceyu de Carreño de dar una rempuesta política y ciudadana en defensa de los intereses de los ciudadanos de Carreño y d'Asturies en xeneral, col convencimientu de que los planes del gobierno del Principáu cola complicidá del gobiernu municipal al respeutu de les obres del Musel, van suponer una degradación de la calidá de vida de los habitantes del nuesu conceyu.

SI QUIÉS SABER LA VERDÁ SOBRE L'AMPLIACIÓN DEL MUSEL Y LOS SOS EFECTOS EN CARREÑO, VEN AL CONCEYU INFORMATIVU QUE CELLEBRAREMOS EL VIENRES 6 DE PAYARES NA CASA LA CULTURA DE CANDÁS A LES 8 LA TARDE.