martes, 23 de junio de 2009

UNIDÁ NACIONALISTA ASTURIANA (UNA) CONSIDERA QUE’L PIESLLE D'ALBO PUDO EVITASE

El pieslle de la fábrica de Conserves Albo ye una mui mala noticia pa Carreño, que ve como nun añu desapaez totalmente la so industria conservera. D’esta forma acabase definitivamente con uno de los pegoyos de la socioeconomía del conceyu y con una de les señes identitaries más carauterístiques de la nuesa hestoria.
Dende UNIDÁ NACIONALISTA ASTURIANA queremos solidarizanos colos/les 130 trabayadores d'ALBO y les sos families, a los que sólo se-yos ofrecen dos posibilidades: el paru o la emigración. Amás, tamién aprovechamos pa manifestar el nuesu apoyu a toles aiciones que decidan poner en marcha pa defender los sos puestos de trabayu.
El pieslle d’Albo, que se sabía dende fai tiempu, yera una desgracia que pudo evitar el gobiernu municipal y l'autonómicu, si realmente tuvieren interés nello. Pero non, nin PSOE, nin IU punxeron munchu interés, cosa que per otra parte, contrasta cola so actitú “manirrota” pa con otres empreses del conceyu.
¿O acasu nun recuerden l’alfombra colorada que dambos pusieron a la multinacional estadounidense DU PONT pa instalase en Tamón? ¿Cuánto dineru costó a los contribuyentes asturianos les ayudes que-y dieron a esa empresa? Y güei… ¿cuántos vecinos de Carreño trabayen nesta empresa?
Y ye que paez ser que’l modelu de desarrollu que-y presta al Gobiernu d'Asturies, y a los tantes veces cómplices del PP, ye’l que desprecia la producción de sectores tradicionales d'esti País, como l'agricultura, la ganadería o la pesca, en base a un supuestu progresu mal entendío. Asina, mientres el sector primario y de tresformación desapaez, desestructurando'l mediu rural y les villes asturianes, a ellos vémoslos defender con entusiasmu les térmiques, les llinies d’alta tensión, l’ampliación del musel, les regasificadores, la industria pesada contaminante o los trenes d’alta velocidá pela costa.
Un modelu de desarrollu que dexa n'Asturies poca riqueza y trabayu, y sí muncha contaminación, degradación del paisaxe y un enorme coste económicu y social. Como exemplu valga la Regasificadora y la Central de Ciclu Combinao del Puertu de Xixón, con un coste de más de 600 millones d'Euros, que van crear menos puestos de trabayu que los que se destruyen col pieslle d'Albo.
L'actual crisis capitalista ye la disculpa perfecta pa qu'Albo pueda llevar a cabo los sos planes. Mientres tanto, los gobiernos que tanto defenden la economía de llibre mercao, llenen agora de perres públiques la banca privada. N'Europa, como n'Asturies, como en Carreño, los despidos, los espedientes de regulación d'emplegu y la non renovación de contratos tan tornándose cada día nel drama de millones de trabayadores que, como siempre, son los que paguen les consecuencies de la situación.
Ye necesario y urxente parar esto y parar a los que tan destruyendo'l futuru d'esti Conceyu, d'Asturies y de los vecinos y vecines.

Grupu muncipal d' Unidá Nacionalista Asturiana

miércoles, 17 de junio de 2009

L'AYUNTAMIENTU CARREÑO DISCRIMINÓ POR MOR DEL SEXU, INCUMPLIENDO LA LLEI, NES CONTRATACIONES PA LOS TALLERES D'EMPLEGU

Ayuntamiento de Carreño

El pasau llunes 15 de xunu, l'Ayuntamiento Carreño procedió a la contratación de personal temporal, en base al plan d'emplegu llocal, pa los Talleres d'Emplegu nos módulos d'Albañilería, Xardinería y Turismu. Nel casu de los dos caberos (Xardinería y Turismu), únicamente permitía aspirantes muyeres, polo que les persones de sexu masculín yeren descartaos.
Estos planes d'emplegu, promovidos pol Gobiernu del Principáu xunto colos sindicatos mayoritarios, tan destinaos a demandantes d'emplegu mayores de 25 años iscritos nes oficines del Serviciu Públicu d'Emplegu, y prioricen la contratación de paraos de llarga duración, persones con discapacidá y muyeres víctimes de violencia de xéneru. Esti tratu preferente y esta discriminación positiva pa con estos colleutivos, cola que dende UNIDÁ NACIONALISTA ASTURIANA tamos d'alcuerdu, non quier decir que seya esclusivu y restrictivu, y que si non perteneces a dalgún d'ellos tengas que tar descartáu.
Creemos además qu'esti non ye'l camín pa algamar la necesaria igualdá efeutiva ente homes y muyeres, nin ye esti'l camín pa finar cola discriminación que sufren munches muyeres nos procesos de contratación o nos propios puestos de trabayu.
Dase el casu además, d'una sentencia reciente nel que se condena al Ayuntamientu d'Uviéu a volver repetir un procesu selectivu similar desarrollau en marzu d'esti añu, y nel que tamién s'escluyo a los aspirantes homes.
Poro, dende UNIDÁ NACIONALISTA ASTURIANA rechazamos les bases de contratación y el procesu seleutivu, que entendemos que supón una grave discriminación por mor del sexu, que va a la escontra la llei, que puede ser recurrible llegalmente, y que posiblemente los aspirantes que non pudieron acceder a les places lo denucien al xulgáu.
Dende UNIDÁ NACIONALISTA ASTURIANA pidimos que se vuelva facer el procesu seleutivu dende l'entamu, nel que se bonifiquen y se discrimine positivamente a les persones pertenecientes a los colectivos beneficiaos (paraos de llarga duración, persones con discapacidá y muyeres víctimes de violencia de xeneru), pero nel que non s'ecluya a naide por razón del sexu. Esperemos que l'equipu gobiernu de PSOE-IU recapacite, y que non se convierta nun nuevu enguedeyu xudicial al que mete a la Casa Conceyu.

Castellano:

EL AYUNTAMIENTO DE CARREÑO DISCRIMINÓ POR RAZÓN DE SEXO, INCUMPLIENDO LA LEY, EN LAS CONTRATACIONES PARA LOS TALLERES DE EMPLEO
El pasado lunes 15 de junio, el Ayuntamiento de Carreño procedió a la contratación de personal temporal, en base al plan de empleo local, para los Talleres de Empleo en los módulos de Albañilería, Jardinería y Turismo. En el caso de los dos últimos (Jardinería y Turismo), únicamente permitía aspirantes mujeres, por lo que las personas de sexo masculino eran descartados.
Estos planes de empleo, promovidos por el Gobierno del Principado junto con los sindicatos mayoritarios, están destinados a demandantes de empleo mayores de 25 años inscritos en las oficinas del Servicio Público de Empleo, y priorizan la contratación de parados de larga duración, personas con discapacidad y mujeres víctimas de violencia de género. Este trato preferente y esta discriminación positiva hacia estos colectivos, con la que desde UNIDÁ NACIONALISTA ASTURIANA estamos de acuerdo, no quiere decir que sea exclusivo y restrictivo, y que si no perteneces a alguno de ellos tengas que estar descartado.
Creemos además que este no es el camino para conseguir la necesaria igualdad efectiva entre hombres y mujeres, ni este es el camino para terminar con la discriminación que sufren muchas mujeres en los procesos de contratación o en los propios puestos de trabajo.
Se da el caso además, de una sentencia reciente en la que se condena al Ayuntamiento de Uviéu a volver a repetir un proceso selectivo similar desarrollado en marzo de este año, y en el que también quedaron excluidos los aspirantes varones.
Por ello, desde UNIDÁ NACIONALISTA ASTURIANA rechazamos las bases de contratación y el proceso selectivo, que entendemos que supone una grave discriminación por cuestión de sexo, que va contra la ley, que puede ser recurrible legalmente, y que posiblemente los aspirantes que no pudieron acceder a las plazas lo denuncien en el juzgado.
Desde UNIDÁ NACIONALISTA ASTURIANA pedimos que se vuelva a realizar el proceso selectivo desde el principio, en el que se bonifique y se discrimine positivamente a las personas pertenecientes a los colectivos beneficiados (parados de larga duración, personas con discapacidad y mujeres víctimas de violencia de género), pero en el que no se excluya a nadie por razón del sexo. Esperemos que el equipo de gobierno de PSOE-IU recapacite, y que no se convierta en un nuevo embrollo judicial al que meten al Ayuntamiento.

UNIDÁ NACIONALISTA ASTURIANA

martes, 16 de junio de 2009

UNIDÁ NACIONALISTA ASTURIANA propón a la Mancomunidá del Cabu Peñes que tramite la “DENOMINACIÓN D’ORIXEN PROTEXÍO” pa la MARAÑUELA y el FARIÑÓN

Marañueles

UNIDÁ NACIONALISTA ASTURIANA propuso, na Xunta de Mancomunidá celebrada el 5 de Mayu, que la Mancomunidá del Cabu Peñes entame los trámites pa protexer al Fariñón (o Fariñona) y la Marañuela, baxo la “Denominación d’Orixen Protexío”, o alguna otra de les catalogaciones de calidá alimentaria que tien la Unión Europea.
La Xunión Europea dispón de tres sellos de calidá p'alimentos, col oxetivu de protexer y valorar la calidá alimentaria, que son la Denominación d’Orixen Protexío, la Indicación Xeográfica Protexío y la Especialidá Tradicional Garantizao. En algún d’ellos podríen incluise estos dos productos tradicionales del Cabu Peñes.
La Marañuela y el Fariñón son esclusivos y comunes a los dos conceyos, y pueden fomentase y revitalizase con un mínimu d’apoyu istitucional. Les Denominaciones d’Orixen y Denominaciones Específiques, son un instrumentu fundamental pa protexer, diferenciar y valorizar productos que tienen una calidá y singularidá específica, aportando munchos beneficios económicos, sociales y culturales pa la zona xeográfica amparada. Poro, tan fomentándose como elementu estratéxicu de desarrollu rural y fixación de población.
Creemos que la inclusión en dalgún de los sellos de calidá alimentaria de la Unión Europea puede suponer un impulsu pa la so producción, y puede ser una fuente d’ingresos y de creación de trabayu nos dos conceyos. Además, implica una promoción gratuita pola gran difusión en folletos, promociones turístiques o publicaciones gastronómiques que se da a los alimentos asina catalogaos. Non hai qu’olvidar tampoco, la protección que supón ante posibles fraudes y facilita'l cumplimientu de normatives sobre trazabilidá, hixene y mediu ambiente. Tamién ye importante dicir, que permite y facilita qu’empreses de Carreño o Gozón vinculades a estos productos, pasen a formar parte del “Club de Calidá Certificada”, denominación baxo la que la Conseyería de Mediu Rural y Pesca del Principáu d’Asturies promociona los productos de calidá.
Creemos además, que ye conveniente que seya la Mancomunidá quien faiga la pitición y la tramitación, y que non seya un únicu ayuntamientu l'impulsor, ya que podría dar llugar a a disputes llocalistes y a enfrentamientos ente un y otru conceyu.
Anque sí ye verdá que la marañuela ye más visible y más conocida, el fariñón alcuéntrase desapaecío de la mayoría de los establecimientos hosteleros y práuticamente ye desconocío fuera de Carreño y Gozón. Ye triste ver cómo la mayoría d’establecimientos hosteleros ofrecen nes sos cartes y menús la morciella matachana, y mui pocos ofrecen un productu propiu como’l fariñón.
N’Asturies, baxo la “Denominación d’Orixen Protexío” alcuéntrense productos como los Quesos Cabrales, Casín o Afuega’l Pitu, la Sidra d’Asturies, el Choscu de Tinéu o la Xata Asturiana, ente otros.
El Fariñón ye una embutido que s’ellabora en tiempu la matazuga, y que se fai con tocín de gochu, cebolla, sangre y pimentón. La Marañuela faise con fariña, güevos, mantega y zucre, y direrénciense en Carreño y Gozón básicamente na cantidá de clares de güevu añadíes.

UNIDÁ NACIONALISTA ASTURIANA

sábado, 6 de junio de 2009

Unidá Nacionalista Asturiana considera imprescindible incluir a les Asociaciones del Conceyu na Sociedá Mista de Turismu que propón el PSOE

Sede de SOFECA

Ante les noticies apaecides na prensa en boca del conceyal de Deportes, nes que s’informa que l’equipu Gobiernu del Conceyu Carreño finalmente va entamar la creación d’una Sociedá Mista de Turismu, con participación de la Cámara de Comerciu, de la Unión de Comerciantes y d’Hosteleros, como tamién proponía’l PP, queremos reiterar públicamente la pitición d'UNA d'incluyir a les Asociaciones del Conceyu nesa entidá.
Dende UNIDÁ NACIONALISTA ASTURIANA siempre, dende la liquidación de SOFECA, apostamos y reclamamos al Equipu Gobiernu del Conceyu Carreñu la creación d’una asociación pa organizar les fiestes y festexos de Candás, a la que denominábamos CONSEYU DE FESTEXOS. Y siempre diximos que pal so funcionamientu, se tomara como modelu organizativu y participativu'l desarrolláu por SOFECA durante gran parte de la so esistencia.
Los últimos gobiernos municipales lleven demostrando dende va años una mala planificación organizativa y una preocupante falta d’idegues, que tan provocando que les fiestes de Candás vayan cada vegada a menos. Entendemos que non se puede dexar la organización de les fiestes esclusivamente nel Ayuntamientu y nos cargos políticos, como non lo tán nel restu de parroquies, que faen recayer la organización de les fiestes nes AAVV y Comisiones de Festexos.
En Carreño tenemos la suerte de tener un texíu d’asociaciones empobinaes a la difusión de la cultura y el deporte como pocos conceyos, y tenemos qu’aprovechar esa bayura pa que’l trabayu d’estes asociaciones se coordine y sirva de motor turísticu y económicu del conceyu. Entendemos que ye nelles en quien hai qu’enfotase pa impulsar y recuperar les fiestes, y creemos qu’hai que da-yos voz y capacidá de decisión a la hora de diseñar les actividaes.
Dende UNIDÁ NACIONALISTA ASTURIANA creemos que ye imprescindible que nesa entidá (llámese Sociedá Mista de Turismu como propón el PSOE, o Conseyu de Festexos como propón UNA), participen con una implicación direuta, comprometida y con capacidá de decisión les diferentes asociaciones culturales, deportives, xuveniles, etc, del conceyu, que tienen que ser les promotores, como en parte ya son, de les actividaes. Poro, volvemos pidir públicamente al equipu gobiernu qu'incluya a les asociaciones del conceyu n’igualdá de condiciones col restu d’entidaes participantes.
Creemos además que ye desacertao querer comparalo cola Sociedá Mista de Turismu de Xixón, nin tamos dimpuestos a que se convierta nuna copia. Non vamos permitir qu’esta nueva entidá se convierta nun comederu de perres, s'use pa colocar en puestos a determinades persones pa pagar favores políticos, o sirva pa querer controlar les actividaes que se faigan y que se propongan dende les diferentes asociaciones.

UNIDÁ NACIONALISTA ASTURIANA

martes, 2 de junio de 2009

L’ACTUAL CARGU PÚBLICU D’UNIDÁ NACIONALISTA ASTURIANA EN CARREÑO, CEDE’L SO PUESTU DE CONCEYAL

Santi Artime, conceyal d’UNIDÁ NACIONALISTA ASTURIANA nel Ayuntamientu Carreño, cede’l so puestu de cargu públicu. A partir d’agora, tal y como se decidió nun aconceyamientu internu, la representación d’UNA na Casa Conceyu pasará a manes de Xuan Rodríguez, músicu Candasín y miembru históricu de la izquierda nacionaliega en Carreño. Nel plenu del mes de Mayu llevaráse a efeutu la renuncia, y nel plenu de Xunu tomará posesión el nuevu cargu, tal y como marca la llei.
Este cese de funciones del actual cargu públicu, non tien que vese como algo traumáticu, nin significa nengún tipu de problema internu, o discrepancia coles decisiones o plantegamientos que defiende’l partio pa Carreño y p’Asturies. Trátase simplemente de la sustitución, pactada y alcordada fai 2 años, de la persona que-y tocó dende fai 6 años tar representando a UNIDÁ NACIONALISTA ASTURIANA na Casa Conceyu. Ye algo que dende la nuesa organización política vemos como “normal”, que busca que más xente vinculao a la Izquierda Nacionaliega en Carreño garre experiencia nel furrulamientu de la Casa Conceyu, qu’aspiramos a gobernar.
N’UNIDÁ NACIONALISTA ASTURIANA entendemos la política de forma mui diferente a como la ven y la entienden los partíos políticos al usu, que s’aferren al sillón como si-yos fuera la vida nello, y consideren el cargu como algo que-yos correspuende en propiedá. La nuesa visión de la política non ye esa. Vémoslo como un serviciu sin contrapartides que se presta a los vecinos y vecines, y onde les decisiones y postures se fixen asambleariamente nos Conceyos Internos del partio, y onde’l conceyal ye’l meru transmisor d'eses propuestes y esos plantegamientos de tol’l partio.
Esta renuncia al cargu por parte de Santi Artime, en nengún momentu significa una desvinculación de la vida política y de l’actividá del partío, y dexa la puerta totalmente abierta a que nes próximes elleiciones, en dientro dos años, vuelva dir na candidatura d’UNIDÁ NACIONALISTA ASTURIANA, nel puestu de la llista que se decida. Además, y hasta entós, va siguir vinculao al partio y a la política municipal, ayudando y asistiendo al nuevu cargu públicu, y trabayando dende la izquierda ecoloxista y nacionaliega en beneficio de Carreño, d’Asturies y de los sos ciudadanos y ciudadanes.
Pa finar, dicir que la sustitución del actual Conceyal non significa un cambiu nos plantegamientos, nes propuestes o na forma de trabayar y de rellacionase colos vecinos y vecines, coles asociaciones o col restu de partíos políticos representaos na Casa Conceyu tal y como llevamos faciendo dende fai 6 años, y queremos ratificar públicamente tolos compromisos y postures mantenides hasta agora.

Santi Artime – Xuan Rodríguez
UNIDÁ NACIONALISTA ASTURIANA