viernes, 13 de mayo de 2011
LES MENTIRES DE LA CIUDÁ DE VACACIONES DE PERLORA
Derribo hotel de la Ciudá de Vacaciones -Foto AsturiasVerde.com-Nel añu 1954, la dictadura franquista crea la Ciudá de Vacaciones de Perlora. Durante 50 años foi un motor económicu de primer orde pa Carreño y p'Asturies. El 12 d'avientu de 2005, el PSOE, un partido que se diz d'izquierdes, ordena la demolición de la Residencia Jacobo Campuzano y entama a privatizar el complexu residencial, poniendo fin a la Ciudá de Vacaciones de Perlora.
Un procesu que tien responsables claros: Ana Rosa Migoya, Jaime Rabanal, Ángel Riego y Javier Becerra (xerente del complexu). Toos ellos facilitaron y favorecieron el pieslle de la CV de Perlora.
Un procesu oscurantista, con errores técnicos, enllén de desprecios, d'engaños y de mentires a los vecinos y vecines de Perlora y a los trabayadores de la Ciudá de Vacaciones, sin permitir debate, propuestes nin alternatives.
Una mentira qu'entamó'l xerente Javier Becerra con una pésima xestión, despidiendo trabayadores, permitiendo'l deterioru de les instalaciones y favoreciendo la reducción del presupuestu y de los beneficios.
El derribu del edificiu Residencia, símbolu de la CV de Perlora, basáu n'informes técnicos falsificaos, continuó cola mentira. Favorecida además pola participación del alcalde de Carreño, Ángel Riego, que concedió'l permisu de derribu a la escontra del alcuerdu mayoritariu de la Comisión d'Urbanismu y del Plenu Municipal, con un resultáu que recuerda'l derribu de la fábrica d'Ojeda.
La Conseyera de Cultura Ana Rosa Migoya y el Gobiernu d'Asturies, mintieron a los vecinos y al Ayuntamientu cuando en 2006 aseguraron que había 3 empreses interesaes n'invertir en Perlora y rellanzar el complexu turísticu.
Siguió mintiendo'l conseyeru d'Economía Jaime Rabanal, cuando en 2007, na presentación pública del anteproyeutu pa la CV de Perlora, aseguró que los plazos d’obra diben respetase y que la mayor parte de les villes-xalés sedríen conservaes como memoria de lo que significó Perlora. Meses dempues pudimos comprobar cómo'l proyeutu solo respetaba 11 de les 240 villes-xalés. Otra mentira.
Mintió tamién el conseyeru cuando dixo que se diba respetar la capacidá edificatoria y el porcentaxe de zones verdes, y dempués vemos que'l proyeutu presentáu duplica les zones edificaes.
Engañó'l gobiernu d'Asturies a Carreño n'abril de 2008 cuando aprobó una resolución eximiendo a les empreses de cualquier responsabilidá si renunciaben a desarrollar el proyeutu.
Y mintieron otra vegada Ana Rosa Migoya y Jaime Rabanal en mayu de 2010, cuando aseguraron na Xunta Xeneral del Principáu que “el proyeutu de Perlora ye imparable”.
Toes estes mentires demuéstrennos cómo los actuales dirixentes y representantes políticos de los asturianos y asturianes tán asitiaos na mentira continua y nel despreciu a la ciudadanía, y cómo ye urxente y necesaria una rexeneración y sustitución de los políticos y les fuerces polítiques (PSOE-PP-IU), que tán llevando a Asturies a la ruina económica, incapaces de presentar una alternativa seria, creíble, sostenible y realista pa cambiar esta dinámica.
Lo que tenemos claro los vecinos y vecines de Carreño, ye que gracies al PSOE vamos pasar otru branu sin la CV de Perlora, que nun hai nengún proyeutu pa reabrir el complexu residencial, y que de siguir el PSOE gobernando, tenemos munches duldes de que Perlora abra dalgún día.
Dende UNIDÁ NACIONALISTA ASTURIANA, en tou momento rechazamos el pieslle y privatización de la Ciudá de Vacaciones de Perlora. Presentamos mociones na Casa Conceyu, participamos y convocamos movilizaciones xunto colos trabayadores, ofrecimos alternatives y propuestes pa la recuperación, rellanzamientu y potenciación, intentamos impedir el derribu d'edificios y defendimos la continuidá de Perlora Pública y Social pal disfrute de toos y toes, pero fue inutil.
N'UNIDÁ NACIONALISTA ASTURIANA apostamos por mantener la esencia y valores que ficieron de Perlora un exemplu de instalación vacacional integrada na Natura, calteniendo y recuperando les más de 200 villes y respetando l'equilibriu ente zona edificada y zones verdes.
OTRU AIRE PA CARREÑO
VOTA UNA-Bloque por Asturies
LA CONTAMINACIÓN, EL GRAN PROBLEMA DE CARREÑO
El conceyu Carreño sufre un ataque mediuambiental ensin precedentes por parte del gobiernu (PSOE-IU), cola pasividá cómplice del PP. La degradación ambiental del Conceyu ye un fechu innegable, reconocíu por casi toos. Y como consecuencia d’ello, la calidá de vida y la salú de los vecinos y vecines de Carreño ta cada día más amenazada.
La concentración d'industria contaminante y peligrosa nun tien parada en Carreño, convirtiendo al nuesu conceyu na zona más contaminada d'Asturies. A la presencia de Arcelor, Tudela Veguín, la Térmica d'Aboño y la DUPONT, bien a sumase agora la reciente ampliación d'El Musel hacia Carreño, la regasificadora, y los proyeutos pa instalar una Incineradora con un nuevu vertederu en COGERSA, dos centrales de Ciclu Combináu y nueves subestaciones y tendíos eléctricos.
Son munches les iniciatives, mociones, propuestes, manifestaciones, concentraciones o plataformes ciudadanes que impulsó o nes que participa y participó UNA, xunto a los vecinos y vecines a favor del mediuambiente y en contra del acosu industrial. La mayoría d'elles recibió una total falta d'apoyu por parte del gobiernu de Carreño, cuando non directamente el rechazu, el despreciu o poniendo torgues so desarrollu.
¿Qué ventaxes sacamos los vecinos y vecines de Carreño de ser tan permisivos con les empreses instalaes, de siguir ampliando'l suelu destinao a les grandes industries, o de siguir proyeutando polígonos industriales? Mui poques. Basta ver que malpenes el 10% de la población de Carreño trabaya nes grandes industries y polígonos instalaos en Carreño. Sicasí, los perxuicios son munchos.
El Centru Nacional d'Epidemioloxía del Institutu de Salú Carlos III, vinculáu al Ministeriu de Ciencia y Innovación, sitúa a Asturies y especialmente a Carreño, nos primeros puestos por índices de muertes por cánceres y enfermedaes relacionaes cola contaminación. Y un reciente estudiu de la Universidá d'Uviéu y l'Hospital San Agustín, constata una rellación directa ente la contaminación y el riesgu de contrater enfermedaes nos fetos nel embarazu.
A esto súmase la destrucción del texíu económicu tradicional (pesca, ganadería y agricultura), l'alteración y degradación del paisaxe, la desapaición de playes, aumentu de la contaminación y los vertíos na mar, los ríos y les agües soterrañes, daños a la flora y la fauna, lluvies de ceniza y grafitu, etc.
Na defensa del Mediu Ambiente tenemos que ser esixentes coles empreses, les alministraciones y los responsables políticos, porque vanos la vida nello. Nun se trata de que la industria desapaeza, trátase de facer que cumplan estrictamente la llei en materia mediuambiental. Por eso, la defensa del mediuambiente y la esixencia d’un desarrollu verdaderamente sostenible, ye’l pegoyu de la nuesa propuesta política.
OTRU AIRE PA CARREÑO
VOTA UNA-Bloque por Asturies
martes, 3 de mayo de 2011
Una-Bloque por Asturies oponse a la construcción de una subestación y llínia eléctrica en Carreño
Dende UNA-Bloque por Asturies de Carreño oponémonos al proyeutu pa costruir una nueva Subestación Eléctrica en La Reboria, asina como una llínia eléctrica de más de 12 Km de llargo, que pasará poles parroquies de Prevera, Albandi, Priendes, Quimarán, El Valle y Llorgozana, en Carreño, hasta Cardo en Gozón. Poro, dende UNA-Bloque por Asturies presentamos allegaciones propies al Estudiu d'Impautu Ambiental, nes que basándose en argumentos llegales, téunicos, estratéxicos, mediu ambientales y sociales, pedimos a Rede Eléctrica Española qu'anule el proyeutu.
La nueva Subestación y Llínia Eléctrica tienen como oxetivu evacuar la producción eléctrica xenerada poles centrales de ciclo combinado que se istalen nel Puertu d'El Musel, y apaez contemplao na propuesta de Planificación de los sectores d’Electricidá y Gas 2008-2016. Este proyecto provocará un nuevu impautu al paisaxe de Carreño, dañará numberoses tierres agrícoles y perxudicará gravemente les condiciones de vida de munchos vecinos y vecines, afectaos ya en gran midida pola contaminación y les instalaciones industriales.
Rede Eléctrica ya presentó esti proyeutu a la Casa Conceyu en mayu de 2009, y n'un primer momentu proponía istalar la subestación en Carrió, y les llínies de evacuación d'Enerxía hasta Nueva Tabiella (Cardo) pasaríen por Albandi, Priendes, Perlora y El Pieloro. N'aquel momentu, el conceyal d'UNA fue l'únicu que rechazó la so costrucción y denunciamos en nota prensa (21-05-2009) la “pasividá del equipu gobiernu de PSOE-IU de Carreño, que se llimiten a facer alegaciones menores a la subestación, al trazao de la llínia y a la tramitación alministrativa, pero que nunca s’impliquen nin van al fondu del tema rechazando frontalmente estos proyeutos nin impidiendo la so tramitación”. ¿Tan d'acuerdo el resto de grupos políticos a favor de la subestación si esta se istala en Carrió? ¿Siguen apoyando la llínia eléctrica si va pol trazao anteriormente propuesto? ¿O ye que tan en contra agora que hubo rechazu y movilización vecinal, tamos en periodo electoral y tienen miéu perder votos?.
Vemos contradictoria y oportunista la postura de PSOE, IU y PP, qu'impulsen y aprueben la costrucción d'una Regasificadora y centrales de Ciclo-Combinao n'El Musel, y dempués tan en contra de les consecuencies. Entendemos además, que ya había qu'haber actuao fai dos años, y haber movilizao a los ciudadanos y ciudadanes.
Dende UNA-Bloque por Asturies rechazamos totalmente los planes del Gobiernu d’Asturies (PSOE-IU) col apoyu del PP, de convertir esti País nel xenerador eléctricu del Estáu, cuando ye una actividá que non xenera riqueza nin puestos de trabayu y sí nos dexa degradación del paisaxe, destrucción del texío económicu tradicional, y grandes niveles de contaminación y enfermedaes vinculades a esa contaminación.
UNA-Bloque por Asturies
Candás-Carreño, 03 de Mayu de 2011
viernes, 8 de abril de 2011
LA GRAN MENTIRA DE LA INCINERADORA. COGERSA PLANTEA UN VERTEDERU DE 100.000 m2 EN CARREÑO
Dende UNIDÁ NACIONALISTA ASTURIANA (UNA), denunciamos públicamente la gran mentira que supón la istalación d’una Incineradora de residuos n'Asturies.
COGERSA y el Gobiernu Asturianu (PSOE-IU), col apoyu del PP, siempre xustificaron la Incineradora pola falta d'espaciu nel actual vertederu, y que si non se construía, habría qu'espropiar terrenos pa un nuevu vertederu de basures. Agora, viendo'l “Documento Urbanístico y el Informe de Sostenibilidad (ISA) del Plan Territorial Especial del Área de Tratamiento Centralizado de Residuos de Asturias (PTE)”, cúmplense les nueses prediciones, y podemos ver que la Incineradora nun pieslla el debate sobre el vertedero, sinón que lu tresllada nel tiempu, a dientro de 10 años. Como venimos diciendo dende UNA, les incineradores (incluso les más modernes), xeneren ente un 20-30% de residuos en forma de cenices, amás d’una gran cantida d’agua de llavau y residuos altamente peligrosos, y siguen necesitando un vertederu onde depositalo.
Con esti documentu qu'agora se publica, vese el planeamientu d’equí hasta l'añu 2030. Y puede comprobase cómo se plantea una espansión de COGERSA en Carreño, principalmente na parroquia de Tamón, de 160.000 m2, de los que la mayor parte son pa un nuevu vertederu pa les cenices tóxiques xenerades pola Incineradora. ¿Como ye posible qu’una istalación que ñaz cola disculpa de que'l vertederu COGERSA nun medre, pueda plantear una expansión tan grande?
Dende UNA siguimos y siguiremos oponiéndonos a la construcción de la incineradora de COGERSA, por razones ambientales, sociales, estratéxiques y económiques:
• La construcción de la Incineradora fae que les polítiques de reciclaxe de residuos pasen a un segundu llugar, contradiciendo lo que tolos muerganismos (estatales, europeos ya internacionales) aconseyen pal tratamientu la basoria: Reciclar, Reutilizar y Reducir. (Asturies lleva años nos últimos puestos n'índices de reciclaxe, solo empeoraos por Murcia).
• La construcción d'una Incineradora va implicar una subida del recibu que toos y toes pagamos pol tratamientu y recoyida de les basories (como ya reconoz el gobiernu de PSOE-IU, el recibu multiplicarase por 5), asina como la renuncia a la creyación d'un gran númberu de puestos de trabayu si s'apostara pol reciclaxe y la xestión sostenible de los residuos domésticos.
• Asturies tien una de les peores calidaes del aire de tol estáu español, y sofrimos ún de los mayores índices por enfermedaes y morbilidá rellacionao cola contaminación almosférica. La inneradora va suponer la lliberación a l'almósfera de dioxines, furanos y metales pesaos que son ellementos canceríxenos y qu'aumenten les patoloxíes asmátiques y les enfermedaes pulmonares, agravando esta situación. Son muchos los toxicólogos y médicos que, basaos n'estudios científicos rigurosos,se oponen radicalmente a la incineración de residuos por sus importantes impactos pa la salud.
Dende UNIDÁ NACIONALISTA ASTURIANA, defendemos otru sistema de xestión de residuos: integral, eficiente, trasparente, non destructor de materies primes y que non estroce la salú de los asturianos y asturianes. La nuesa rempuesta ye clara:
NON A LA INCINERADORA
UNIDÁ NACIONALISTA ASTURIANA de Carreño
Candás-Carreño, 6 d'Abril de 2011
jueves, 17 de febrero de 2011
LA CAPIYA SAN ANTONIO SÍ TA EN PELLIGRU DE DESAPAECER, COMO LLEVEN DENUNCIANDO LOS VECINOS DELLOS MESES
La capiya de San Antonio -Foto Asturias Verde-La dexadez y la falta de medides del equipu gobiernu ponenla en seriu pelligru.
Dende Unidá Nacionalista Asturiana (UNA), y dempués de l’alarma xenerada polos vecinos y vecines alvirtiendo de los continuos argayos que se producíen nos cantíles que se topen alredor de la capiya San Antonio, na Comisión d’Urbanismu del 18 de Xineru, UNA entrugó al equipu gobiernu cuála yera la so situación rial, si se seguíen produciendo argayos y cuáles yeren les posibles soluciones. La rempuesta foi la siguiente: “La zona fue inspeccionada por el aparejador municipal. La conclusión es que a día de hoy la zona es segura ya que la capilla está cimentada en una zona rocosa”.
La rempuesta ye tan escueta como errada , ya que na Comisión d’Urbanismu cellebrada güei 17 de Febreru, un mes dempues d’aseguranos que nun corría nengún pelligru, anunciasenos que la zona ye insegura y esiste la posibilidá de que los argayos destruyan esti iconu del patrimoniu de Carreño. Amás dícen-nos que la so destrucción pue producise en cualquier momentu, polo que s'entamen los tramites pa cambiar la so ubicación actual ya intentar salvala.
Dende UNA paeznos una tomadura de pelo y una falta de seriedá y de previsión mui grande. Non entendemos cómo ye que fai un mes la capilla taba en zona segura y agora haya qu’axilizar los trámites pa intentar salvala, y non tengan la seguridá de que se llegue a tiempu.
Nun entendemos que los téunicos de la Casa Conceyu faigan valoraciones tan a la llixera ensin qu’esistan estudios xeolóxicos, y muncho menos entendemos qu’esto se consienta dende el Gobiernu Llocal.
Pa mas inri, esti nun ye un casu aislao, ya que son munchos los llugares de Carreño onde la inestabilidá de los suelos fai peligrar, ya non solo los terrenos nin el patrimonio, sinon tamien la integridá de les persones. Dende UNA llevamos munchu tiempo solicitando que s'entame un Plan pa estabilizar les lladeres del monte Fuxa, del prau Gervasia (na so caída pal muelle), y la del Cementeriu hacia Rebolleres.
Naguamos que, a pesar de la desastrosa actuación del Gobiernu, lleguemos a tiempo de salvar la Capiya y que dalguién, por una vegada, dea la cara n’esti asuntu, asumiendo responsabilidades. Esperamos tamién que se tomen medides pa qu’esto nun vuelva a pasar.
Candás-Carreño, 17 de Febreru de 2011
UNIDÁ NACIONALISTA ASTURIANA de Carreño
Suscribirse a:
Entradas (Atom)