UNIDÁ NACIONALISTA ASTURIANA respeutu a la sovención de COGERSA

Con respeutu a la polémica creada ente les AAVV d'Ambás y Tamón pola sovención que tolos años concede COGERSA, dende UNIDÁ NACIONALISTA ASTURIANA sopelexamos:
Dende fai 10 años, COGERSA concede sovenciones (nesti añu de 54.000 €) a cada una de les parroquies llimítrofes col vertederu, hasta un total de 4, correspondientes a los conceyos de Xixón, Llanera, Corvera y Carreño. Hasta l'añu 2006, la sovención que daba COGERSA yera únicamente pa la parroquia d'Ambás, y con esta sovención los vecinos proponíen les obres y les inversiones que se teníen que facer. A partir del añu 2007, COGERSA incluye na sovención tamién a la parroquia de Tamón, sin aumentar l'importe y sin especificar cómo se tien que repartir nin qué porcentaxe ye pa caúna de les AAVV. A partir d'esi momentu, Ambás niégase a renunciar a una parte, y Tamón esixe'l 50% de la sovención.
Dende que se crea'l problema nel añu 2007, UNIDÁ NACIONALISTA ASTURIANA xunto col resto de partíos políticos del Ayuntamientu Carreño, vien esixendo a COGERSA qu'amplíe al doble la sovención que concede en Carreño, pa qu'Ambás non pierda dineru, y pa que Tamón reciba una sovención igual a la del restu de parroquies. A día de güei siguimos esixendo que COGERSA amplíe la sovención pa que tanto Ambás como Tamón reciban lo mesmo que reciben el restu de parroquies afectaes d'otros conceyos.
Dende UNIDÁ NACIONALISTA ASTURIANA comprendemos totalmente la postura de les dos AAVV, tanto la d'Ambás, que non quier perder dineru, como la de Tamón, que reclama lo qu'entiende que ye suyo. Nesti casu, la función del ayuntamientu ye únicamente facilitar a l'AVV la fiscalización de les factures, axilizar la contratación y facer un siguimientu de les obres. Entendemos qu'esti ye un problema que crea y que tien que resolver COGERSA, aumentando la sovención o indicando cuánto dineru ye pa cada parroquia. La mayor dificultá pa repartir el dineru y tomar una decisión ta nes propies condiciones que pon COGERSA, qu'esixe que los vecinos de les dos parroquies dean el visto bueno a les obres que s'executen con cargu a la sovención. Si cualquiera de les dos asociaciones se niega a aceptar el repartu o les actuaciones, la sovención quedaría paralizada. Poro, l'Ayuntamientu tien les manes atades mientres que non haya un alcuerdu de les dos Asociaciones Vecinales, o COGERSA amplíe la sovención. Si l'Ayuntamientu decide repartila al 50%, y Ambás se niega, paralizaríase la sovención. Por otru llau, si l'Ayuntamientu decide que seya íntegramente p'Ambás, y Tamón non lo aceuta, la sovención tamién quedaría paralizada.
La postura D'UNIDÁ NACIONALISTA ASTURIANA ye la mesma que fai un añu: siguir esixendo que se duplique la sovención, y mientres tanto que la Casa Conceyu siga almacenándola hasta que COGERSA especifique cómo hai que repartila, o hasta que les AAVV d'Ambás y de Tamón, se pongan d'alcuerdu. Otra posibilidá, anque esto podría suponer la cancelación de la sovención, ye devolvela y que COGERSA la xestione direutamente colos vecinos.
Pa finar, tamién queremos denunciar esta estratexa de COGERSA d'enfrentar a los vecinos. Si los vecinos tan engarraos pola llimosna que supón la sovención, estos non van organizase pa esixir garantíes ambientales y controles nel vertederu, nin van esixir medides de seguridá pol tráficu de camiones nos accesos, nin van siquiera parase a plantegar un debate sobre la idoniedá de la Incineradora que se pretende costruir, y que va empeorar más tovía les condiciones de vida de los vecinos averaos al vertederu y de tol área central asturianu, y a la qu'UNIDÁ NACIONALISTA ASTURIANA s'opón xunto con otros munchos colectivos ecoloxistes y vecinales.

UNIDÁ NACIONALISTA ASTURIANA de CARREÑO