Intervención d'Unidá-Andecha Carreño nel plenu de presupuestos 2008, el 4 de Xunu, 2008

Como ya anunciamos na cabera comisión d'Hacienda, non vamos apoyar el presupuestu municipal. Hai que dar un solu votu pa too: presupuestu l'ayuntamientu, presupuestu los patronatos, plantiya municipal y pa la ufierta d'emplegu público. Sí apoyamos munches de les partíes, sí apoyamos los presupuestos de los patronatos, pero hai que dar un solu votu, y dende UNIDÁ-Andecha Carreño, dempués de valorar el presupuestu en so conxuntu, asina como de valorar l'aición de gobiernu del caberu añu, vamos dalu a la escontra.
Ye esti un presupuestu que toos contábemos que diba aprobase colos votos de PSOE, IU y URAS, pero sorpréndemos la decisión d'UICA, que tamién va aprobalos sin sacar, al menos al nuesu entender, una propuesta relevante. Gran parte de les sos peticiones esplicaes na Comisión d'Hacienda son estudios, estudios previos, planes y concursos d'idegues. Cuando la llexislatura pasada foron el partíu que más vegaes y más bruscamente polemizó coles actitudes del equipu gobiernu, qu'agora cambie'l so votu y vaya de la mano del PSOE al que descalificaron de toles maneres, d'IU que fizo desapaecer l'aparcamientu de 1u Mayu y del que quedó bautizáu como superconceyal, non lo entendemos.
Dende UNIDÁ-Andecha Carreño creemos que tenemos razones abondes pa esplicar a los vecinos el nuesu votu negativu, y voi intentar esponelo:
Por un llau, porque'l presupuestu municipal entendemos qu'hai qu'intentar que tea aprobao nel primer trimestre del añu. Había'l compromisu públicu además, asumío pol equipu gobiernu durante'l debate del presupuestu del añu 2007, de tenelo p'antes del mes de Febreru, y tamos en Xunu, y ya pasó mediu añu 2008. Non mos val la disculpa de que non se puede tener primero, cuando na mayoría los conceyos apruébenlo nesti plazu de 3 meses. Sabéis que retrasalu tanto trai problemes, dificulta xustificar gastos, o por exemplu, siempre lo comento nes comisiones, dificulta de les AAVV, Asociaciones Culturales, de Festeyos, etc, pa planificar adecuadamente les sos actividaes.
D'otra miente, tampoco cumple ún de los puntos programáticos y políticos básicos d'UNIDÁ, como ye afondar na Democracia Participativa y la Participación Ciudadana. Creemos que fomentar la Participación ye la única manera de da-yos a los vecinos/es la capacidá d'actuar direutamente, y de da-yos la capacidá real de facer cambios na vida política municipal y nos presupuestos municipales. Y mientres esto non se faiga, y ye verdá qu'al entamu va ser abegosu pola novedá, pero polo menos non exista la intención de facelo, mientres non se siga l'exemplu d'otros Ayuntamientos qu'ellaboraron y ellaboren los presupuestos de forma participativa colos vecinos/es, la Izquierda Nacionaliega representada na Casa Conceyu non aprobará un presupuestu municipal. Entendemos que non queráis ellaborar los presupuestos d'esta manera que pidimos, pero nosotros llevámoslo nel programa eleutoral y vamos ser coherentes con ello.
L'equipu gobiernu munches veces argumenta que presentándolos al Conseyu de Participación Ciudadana ye bastante, y ya los fai asina participativos. Creo que tais equivocaos neso. Entendemos que la forma de presentalo a les AAVV non ye l'adecuada. Y non soi yo solo quien lo digo. Tamién vos lo dicen les propies AAVV, qu'asina ellos non pueden posicionase, qu'esta non ye la manera de presentalo, que sin tiempu pa revisalo y pa valoralo col restu los vecinos ellos non van dicir nada.
Los sindicatos municipales, presentes na Comisión de Personal, tamién espresaron el so rechazu al presupuestu. Pueden compartise o non los sos plantegamientos, pero na cabera Comisión de Personal, y traslladao a votación la plantiya municipal, tolos sindicatos votaron a la escontra de la so aprobación por non contener les demandes que plantegaben en materia llaboral.
Cuando falamos de les inversiones na Zona Rural, siempre, dende que tamos representaos na Casa Conceyu, criticamos el Plan Integral. Nosotros siempre dicimos qu'esto non ye un Plan Integral, y que les parroquies rurales de Carreño tienen munches necesidaes y non únicamente d'asfaltu y de lluz. Entendemos que con meyores polítiques dende los Ayuntamientos y dende Asturies pueden meyorase les inversiones y rentabilizar meyor el dineru. Con parte d'estes perres, podría crease, por exemplu, un serviciu d'autobús rural, qu'acerque a los vecinos/es a Candás o a otros puntos del conceyu, al ambulatoriu, a la plaza o pala mocedá los sábados pola nueche.
Siguimos sin ver dineru p'actuar nel patrimoniu históricu desperdigao pol conceyu. Siempre falamos d'un plan Arqueolóxicu pal Monte Areo o pa evitar que s'esboroñe'l Torruxón de Yebio. Y siguimos sin ver que camude l'actitú pa con esi patrimoniu. Fai poco, tovía denunciamos la corta sin control que se taba faciendo al llau del Castru La Barrera. Ye dalgo que vengo denunciando continuamente sin qu'haya un mecanismu organizáu y sistemáticu na Casa Conceyu pa evitalo. Y refiérome a que, por exemplu, danse llicencies pa plantar montes d'ocalitos en zones onde hai fontes públiques (creo que toos sabemos qu'un monte d'ocalitos enriba'l manantial d'una fonte col tiempu acaba secándola). Creo qu'hai qu'articular los mecanismos necesarios na Oficina Téunica pa impidilo y que se protexan adecuadamente'l nuesu patrimoniu natural, cultural y históricu. Llevo algo que llevo denunciando dende la llexislatura pasada y non veo que se tomen midíes que dean resultaos.
Sigue sin haber nengún tipu de política de mocedá. Por non tener, non tienen un sitiu onde xuntase y organizase. Son los olvidaos poles alministraciones. Y sigue sin haber tampoco polítiques de vivienda pa la mocedá. Non se si la burbuxa inmobiliaria esplotó, dúdolo, pero los problemes p'acceder a una vivienda por parte la mocedá siguen siendo los mesmos. Y dende la Casa Conceyu tien qu'actuase. Nosotros siguimos falando d'una Casa la Mocedá y de la creación d'un Parque de Vivienda público. Entiendo que non lo veis, non tais d'alcuerdu, en tolos plenos de presupuestos me los dicís, pero nosotros siguimos creyendo que ye necesario.
Non tamos pa nada d'alcuerdu cola partida de 170.000 € destinada a costruir l'acera pa la piscina. Siempre defendimos que'l camín más curtiu, más guapu y más seguru pa dir a la piscina yera'l camín del Sevillanu, siguimos defendiéndolo, y non tamos d'alcuerdu con facer esta acera. ¿Fízose la ponte?
Sigue sin destinase'l 0.7% pa cooperación internacional. Y non solo non mos vamos acercando a esa cifra, sinón que cada vegada'l porcentaxe ye menor. Pasamos d'un 0.48, un 0.46 un 0.52 l'añu que más s'acercó a esa cifra, a ponenos esti añu nun 0.33. Entendemos qu'a tolos partíos se-yos llena la boca falando de solidaridá y d'ayuda al desarrollu, y dempués non queda namás qu'en papel moyáu y non hai de verdá un braeru compromisu. Entendemos que polo menos esi 0'7% tendría que tar reservao p'apoyar iniciatives de cooperación, lo mesmu que s'aseguren los sueldos a los funcionarios o se sabe qu'hai que pagar la lluz.
Non vemos nenguna partida destinada a siguir avanzando realmente na creación d'un Muséu la Pesca y la Industria Conservera n'Ortiz. Creo que'l proyeutu ta bastante abandonao y paralizáu, y espero que non quede en papel moyao, como los proyeutos tamién plasmaos en planos que ya se presentaron nos 80 y 90 na Casa Conceyu. Hai una partida de 60.000 destinada a restaurar pieces que tan en mal estáu. Paez ser que valió p'algo la polémica de fai dos años, pero creemos que munches d'elles ya se perdieron. Vamos intentar salvar lo que queda, ye imprescindible, pero esto non ye invertir pa facer realidá'l Muséu.
Entendemos además, que con un presupuestu non solo s'aprueba'l repartu de les perres, sinón que tamién sa aprueba o non l'actividá política del equipu gobiernu nel caberu añu. Sí ye verdá que non hubo polémiques importantes, non como na pasada llexislatura, pero non podemos dar la nuesa aprobación a la xestión del equipu gobiernu.
Con respeutu al Mediu Ambiente en Carreño y a les midíes que se tomen, vamos dar un marxen de confianza a la Conceyala. La situación mediambiental ye ún de los temes más críticos en Carreño y tá trabayándose, creo que con resultaos más lentos de lo deseable, pero creo que tan faciéndose coses. Vamos esperar a los resultaos a mediu plazu asina como al debate del PXOU, pa dende UNIDÁ-Andecha Carreño volver a plantegar delles propuestes, y ver la postura final d'IU. Aplaudimos decisiones como la denuncia del desmonte del Altu Aboño a l'Audiencia Nacional, tomada por unanimidá por tolos grupos o'l sistema de recoyida de basoria urbana con cubos de quita y pon, pero sigue habiendo actitúes y decisiones que nos preocupen, como por exemplu que ni PSOE nin IU votaren la moción contra la Regasificadora, sin entender realmente'l riesgu que supón esa istalación pal mediu Ambiente y pa la seguridá de los vecinos/es de Carreño.
Sigue sin haber un control urbanísticu eficiente, y sigue siéndose mui permisivu coles empreses y costructores. Vertederos d'empreses costructores na trasera de la Fábrica d'Albo, o situaciones como la que sufrimos los vecinos de la Calle'l Carbayu, más de 3 meses llevantada, entendemos que requieren que se tomen midíes con mayor rapidez. O situaciones como la del Barriu'l Pibidal, a quien quedó de dásellos solución pal branu pasáu, dempués pa les navidaes, y ya tamos nel branu otra vegada. Actuaciones como'l pasu soterráu de les vies al aparcamientu'l Molín, que non respeta l'accesu a minusválidos, y que sí creemos que ye fácilmente solucionable, entendemos que son equivocaes y qu'hai que meyorar.
Sigue sin dase una solución al problema del aparcamientu, nin acaba d'abrise de verdá un braeru debate ente los grupos políticos de la Casa Conceyu pa buscar soluciones. Atrevome a dicir que la única midida que se tomó y que se vió de verdá algo, foi la d'Andecha d'habilitar el llateral de la Plaza la Baragaña. Y non me val el prau de Gervasia. Eso non ye nenguna solución, y va intentar facese esti añu otra vegada. Espero, de verdá, que la Conceyala d'Urbanismu recapacite y non lo permita esti branu.
La situación de la llingua ye la mesma que na llexislatura pasada. Hai una falta de respetu y despreciu pa col asturianu y los asturfalantes. Hai una toponimia oficial, aprobada por tolos grupos que tamos güei equí representaos, y que non s'emplega anque lo pida insistentemente y anque haya una Moción aprobada nun plenu municipal. Sí me paez positivu esi conveniu que se va firmar cola academia la Llingua Asturiana y la creación d'una beca d'investigación toponímica. Y felicito por ello al conceyal de Cultura. Pero lo socedío va poco cola páxina Web Oficial del Ayuntamientu Carreño demuestra que siguís considerándolo algo accesorio y que puede esperar, cuando la única manera de salvar el mayor patrimoniu cultural d'Asturies ye defendela y emplegala, aplicando midíes pa dignificar, normalizar y oficializar el so usu. A la hora d'afrontar midíes normalizadores pa la llingua, dende l'equipu gobiernu munches vegaes discúlpense col argumentu presupuestariu, polo qu'entendemos qu'al non haber partida específica reservada, non hai una intención real de dignificar y normalizar la llingua asturiana.
Observamos una total descoordinación ente'l gobiernu de Carreño y el del Principáu. Y eso que son los dos del PSOE. Nótase descoordinación y falta de pesu en temes como l'ampliación del Musel hacia Carreño y el desmonte l'altu Aboño, como la situación de la CV Perlora, como lo socedío cola grada y col campu'l Candás, y qu'agora sí paez que va invertise dineru del Principáu. Esta descoordinación non ye nada bueno pa Carreño. Y creemos que ye responsabilidá del equipu Gobiernu, y del PSOE sobre tou, que pa eso coinciden en Carreñu y Asturies, negociar ante'l Principáu les inversiones y los proyeutos que tienen pa Carreño. Los fechos dannos la razón de que les coses non se tan faciendo de forma correcha.
Quiero tamién remembrar, que'l presupuestu vótase en conxuntu, y que ye un únicu votu, y que sí ye verdá que dende Andecha tamos d'alcuerdu con delles partíes qu'apaecen ehí reflexaes, munches de les cuáles sofitamos nes diferentes comisiones d'ayuntamientu.
Si sofitamos la inversión de 275.000 pa la Tribuna del Candás, y viendo agora que'l Principáu va invertir otros 600.000, creemos que puede quedar una zona deportiva curiosa, y solucionar los problemes qu'hai pa usar los campos de futbol, vestuarios, la situación del Club Victoria, etc. Anque sí ye verdá que preocúpanos lo poco definío que ta tou.
Sofitamos partíes como la de proyeutos mediambientales, el centru de día, los planes pa modernizar l'Ayuntamientu, l'ampliación de la Biblioteca, les partíes destináes a meyorar el suministru d'agua y el saniamientu, etc.
Les nueses propuestes tan recoyíes nel nuesu programa eleutoral, que ye lo que venimos defender equí, en nome de los vecinos/es que nos dieron la confianza nel eleiciones. Non tenéis namás que garrar el programa, o atender les peticiones qu'UNIDÁ-Andecha Carreño fai nes Comisiones pa tener el nuesu apoyu. Tanto la ellaboración del presupuestu participativu como les propuestes que plantegamos son viables y munches d'elles prioritaries pa Carreño, y non fai falta namás que la voluntá política pa desarrollales y llevales a cabu, y mientres que non haya esa voluntá política, Andecha Astur non aprobará nengún presupuestu d'esta Casa Conceyu.