Andecha Astur nun aprueba el Plan Xenral d'Ordenación de Carreño

El grupu municipal presentó delles alegaciones al PXO presentao na última Comisión d’Urbanismu del mes de xunetu. Les modificaciones d’Andecha Astur defienden la necesidá d’articular una ordenación del territoriu al serviciu de la protección ambiental, del desarrollu urbanu sostenible y de la calidá de vida de los vecinos. Andecha criticó el Plan porque ta diseñao como una ferramienta más pal crecimientu urbanísticu ya industrial.
Amás, les torgues na finaciación tan llevando a los conceyos asturianos a una situación de xantaxe, na que la única vía p’atropar suelu públicu ye al traviés de les cesiones na urbanización de grandes espacios.
Les alegaciones nun foron compartíes pol gobiernu muncipal, lo que posiciona a la nuesa organización claramente a la escontra de l’aprobación inicial del Plan nel Plenu del Ayuntamientu.

RESUMEN D’ALEGACIONES D’ANDECHA ASTUR
- Inclusión d'una ordenanza forestal que permita una planificación ordenada y sostenible ambiental y ecolóxicamente, de les plantaciones forestales del conceyu Carreño.
- Proteición y blindaxe d'aquelles zones onde esista la posibilidá d'esplotación de nueves canteres, p'asegurar un braeru control de la Casa Conceyu sobre'l so territoriu.
- Non ampliar la zona Urbana de Candás más al Oeste de l'actual carretera AS-110.
- Protexer la lladera’l monte que cai hacia'l Ríu La Granda, dende Polideportivu hasta'l Camín del Sevillanu, posibilitando asina la comunicación ente'l Polideportivu y el Campu Fútbol cola Piscina Mancomunada y el Camín del Sevillanu.
- Declarar y ampliar la fastera alredor del Polideportivu Municipal como d'equipamientu públicu.
- Articular el PERI de Perlora como Núcleos Rurales
- Protexer ambientalmente’l Monte Fuxa, impidiendo l'alteración de tola lladera de la sierra, de la vega del ríu y la vexetación del Bosque de Ribera, y de los praos de siega hasta l'As-110.
- Declarar y catalogar el monte La Forca como proteción pasiaxística, col finxu de consiguir una Parque urbanu-forestal dende capilla San Roque hasta camín de la Forca, recuperándolo ambientalmente con especies autóctones y comunicándolo col área recreativa de la Fonte los Ángeles.
- La “Zona Verde” planificada n'Aboño, dexala cola proteición de costes, con mayores niveles de proteición.
- Creyación de Conseyu Seutorial del Padrimoniu Cultural del Conceyu Carreño.
- Aumentar en xeneral la zona d'equipamientu públicu nes parroquies, alrodiu de les equipaciones ya esistentes, en previsión de nuevos servicios básicos pa la zona Rural.
- Impulsar la proteción paisaxística de la fastera del Tranqueru.