Propuestes d'Andecha Astur pa meyorar l'apacamientu en Candás

16-Febrero-2007 Andecha Astur de Carreño cellebró na tarde del llunes 12 una reunión con representantes de l’Asociación d’Hostelería y de Comerciantes de Carreño, onde se trató la problemática pola falta de places d’aparcamientu en Candás
Nesta reunión, Andecha Astur trasladó sus propuestes pa crear nueves places d’aparcamientu en Candás, tanto p’aliviar el problema esti veranu, como de cara a buscar una solución definitiva a mediu plazo
Desde Andecha Astur de Carreño, mostrámonos favorables a sacar el tráficu de los cascos urbanos y aumentar les zones peatonales, pero siempre reservando espacios afayaízos pal estacionamientu de los vehículos. Y esta ye una tendecia que se ta dando na mayoría los pueblos. Pero en Candás, entamaron a peatonalizase les calles sin tener en cuenta que yera necesario reservar y facer nueves zones d’aparcamientu.
El problema de la falta d’aparcamientu ye responsabilidá de tolos gobiernos municipales que tuvo Carreño dende fai 20 años, non solo d’esti que sufrimos actualmente. Anque sí ye verdá, que nos caberos años, de la mano del PSOE y d'URAS, la situación llegó a un punto insostenible. Y agora, buscar soluciones ye difícil. Pero hai que buscales y alcontrales.
Andecha Astur lleva tiempu proponiendo alternatives a la falta d’aparcamientu, y nesi sentí propuso:
• Aumentar aparcamientu de Palmera, cubriéndolo ya integrándolo na lladera del monte Fuxa. Andecha Astur presentó alegaciones al proyeutu de reforma de la fachada marítima solicitando la meyora d’esti aparcamientu. Les alegaciones presentámosles n’Abril de 2006, y tovía non recibimos contestación por parte del Delegáu del Gobiernu, Sr Trevín. (Testu de parte de les alegaciones presentaes por Andecha Astur al proyeutu de reforma de la fachada marítima de Candás: Dende Andecha Astur, entendemos que’l proyeutu quedaría incompletu si non s’actua nel aparcamientu esistente en la lladera baxo’l monte Fuxa, frente a la playa de Palmera. El proyeutu contempla la sustitución de la superficie asfáltica que tien anguaño, por una d'adoquín, nes mesmes condiciones que se reformará la carretera. Esti aparcamientu ye mui usáu nel branu y los fines de selmana, y con una pequeña aportación económica estra, meyoraríase considerablemente la so capacidá y quedaría integráu completamente nel entornu, reduciendo l’impautu visual. Dende Andecha Astur, proponemos una actuación global, costruyendo una planta d’aparcamientos baxo la qu’hai anguaño, que quedaría al mesmu nivel que la carretera y permitiría duplicar la capacidá d’esti aparcamientu, pasando de les 30-35 places a unes 65-70 places d’aparcamientu públicu. Al mesmu tiempu, y pa correxir el grave impautu visual que ya provoca l'aparcamientu d’anguaño, proponemos colocar una cubierta y recubrila con especies vexetales que cuelguen hacia la fachada principal, pa que quede totalmente integrada na lladera’l monte Fuxa y corrixa l’impautu visual..”).
• Mantener aparcamientu de 1u Mayu, buscando nueva ubicación pa les viviendes sociales. Entendemos que ye prioritario mantener esti aparcamientu pa evitar que la situación s’agrave más tovía.

Y Andecha Astur de Carreño propón una riestra de medíes inmediates y de medíes a mediu plazu:
INMEDIATES
1. Estudiar la posibilidá de delimitar una zona na esplanada del muelle p'aparcamientu. Andecha Astur va estudiar esta propuesta, a pitición de l'Asociación de Comerciantes y Hosteleros, siempre y cuando se respeten les condiciones puestes por Andecha: de tal manera que non interfiera ni presente peligro pa los paseantes, se respeten les terraces del muelle, y non entorpezca les llabores perqueres.
2. Eliminar la raya mariella de toes aquelles zones onde non seya necesaria, al non interrumpir el tráficu los posibles vehículos estacionaos.
3. Modificar tráficu al comienzo de la c/ Braulio Busto, dende C/Costitución hasta Calleja Nolo (a l'altura d'heladería), permitiendo un únicu sentíu de circulación (entrando por C/Costitución) y con posibilidá d'aparcar nos dos llaos, onde se pueda. Tamién s’habilitaría una zona específica pa carga y descarga, en C/Costitución.
4. Aparcar nos dos llaos na C/ Pardies, como ya se fai en díes de fiesta y non se creen problemes de circulación.
5. Habilitar como zona d’aparcamientu los terrenos averaos al Colexu Poeta Antón, con pase rodáu por C/Pepe La Mata y peatonal por C/ San Antonio.

A MEDIU PLAZU
• Crear un accesu al aparcamientu del Molín por Pedro Braña (al llau del Apeaderu).
• Estudiar una nueva disposición pal aparcamientu enfrente l’ambulatoriu (C/La Cruz), eliminando muretes.
• Crear nueves zones d’aparcamientu na zona del almacén municipal nel parque del Carbayu, ampliando’l parque y habilitando espacios d’aparcamientu.
• Crear zona d’aparcamientu na futura ampliación del parque Santaruga.
• Crear zona d’aparcamientu na futura urbanización prevista entre la C/ Zapardel y Palomares.
• Estudiar la creyación d’un aparcamientu municipal soterráu. Pa ello, Andecha Astur propón como posible ubicación, situalo baxo la fábrica d’Ortiz (futuru Muséu de la Pesca) y la plaza aledaña, trasera al Hotel Marsol.

Dende Andecha Astur de Carreño, tamos convencidos que ye imprescindible mantener, protexer y apoyar al Pequeñu Comerciu y la hostelería, como parte imprescindible pa la propia esistencia de los pueblos, y pa evitar lo que dende fai años tamos viendo: que Candás se convierta nuna ciudá dormitoriu.
Por ello, Andecha Astur solicitará al Ayuntamiento que ponga en marcha les 5 medides INMEDIATES que propón, y que non tendríen nengún coste económicu.

Santiago Artime. Conceyal d’Andecha Astur de Carreño.