lunes, 14 de mayo de 2007

Andecha Astur de Carreño rechaza la creyación d'una ZALIA en Quimarán

13-Marzo-2007 Andecha Astur de Carreño muestra’l so rechazu frontal y rotundu a la posibilidá d’istalar una ZALIA (Zona d’Actividaes Lloxístiques ya Industriales) en Quimarán
Andecha lleva tiempu denunciando que Carreño ta convertiéndose nel polígonu industrial de la zona centro d’Asturies (esi inventu que llamen Ciudá Astur), sin que los vecines/es de Carreño veamos qu’eso nos suponga ventaxes.
Dende Andecha Astur de Carreño, siempre nos posicionamos a la escontra de l’ampliación del Musel tal como taba planificada, y quedámonos solos xunto colos vecinos de Carrió nesa oposición inicial. Andecha opónse al proyeutu del Superpuertu del Musel por cuestiones económiques, estratéxiques y mediambientales, y siempre diximos que Carreño diba ser el Conceyu d’Asturies más direutamente perxudicáu poles obres de costruición del Superpuertu. En Carreño tenemos que soportar la contaminación y los problemes que suponen les grandes industries: tenemos que tragar con DU PONT, con Tudela Veguín y la cantera d’El Perecil, cola térmica d’Aboño y los parques de Carbones y con Arcelor-Mittal.
Y agora, col proyeutu de Superpuertu, además de perxuicios direutos al sector pesqueru y turísticu, van intentar destruir l’altu Aboño y colocar ellí nueva industria pesada, intentaron abrir una cantera en Coyanca, vamos tener que soportar una carretera de conexón al puertu pa mercancíes peligroses por Aboño, vamos sufrir la regasificadora, y agora van rematanos cola creyación d’un polígonu industrial vinculáu al puertu, de 3,5 millones de m2, y que va finar con una de les poques zones con valor paisaxísticu y natural que queden nel conceyu: el Valle de Carreño.

Dende Andecha Astur queremos reiterar nuestru más profundu rechazu a la creyación de la Zalia por:
• El desarrollu industrial d’Asturies non tien que facese a costa de los vecinos, si no con ellos.
• Ye grave que, ante l’inminente fin de los Fondos Europeos p’Asturies p’acelerar la converxencia con Europa, se destine’l dineru non a resolver les deficiencies estructurales de la economía asturiana, sinón a amontonar formigón improductivu.
• Tan solu’l 3% de del tráficu actual del Musel correspuende a carga xeneral, el tipu de carga demandante de les ZAL.
• L’ampliación del Musel va destinada a convertir y especializar el Musel nun puertu graneleru, y por ello non se xustifica la costruición de nenguna ZAL.
• La pérdida de rentes agraries, ganaderes y turístiques non se compensa pola supuesta riqueza que xeneraría la ZALIA.
• El Valle de Carreño, xunto col Monte Areo, ye una zona a protexer y conservar, y ye necesaria la so proteición a traviés del PORNA.

Dende Andecha Astur de Carreño, consideramos qu'anque finalmente non se faiga equí la Zalia , bien porque les presiones vecinales lo impidan, o bien porque les intenciones del PSOE asturianu seyan asitiala n’otru llau, hai que dexar bien nidio qu'El Valle de Carreño non se toca, y tien que mantener los actuales usos: residencial, turísticu, agrícola y ganaderu.
Santiago Artime, Conceyal d’Andecha Astur en Carreño

2 comentarios:

Anónimo dijo...

Los de IU defienden la ZALIA de Gijón como un logro. Ya vereis como cuando terminen lo de Serín queran hacer otra en Quimaran.

Anónimo dijo...

JODIDOS VAMOS A ESTAR EN GUIMARÁN. ¿Los partidos piden nuestro voto; pero quien vota por la gente que vive en les aldeas?